Mak 6:12-39

¹²Ol dem klostuman bin goaut ane spik dis mesiz blo God po ebriwan de. Ol bin spik diskain, ‘Yupla ebriwan mas libe ol nugudwei blo yupla nau.’

¹³Ane dempla bin tekemaut ebri nugudspirit ane dempla bin prea den kapsaid oliboil wea ol sikpipol po meke dempla kam orait.

¹⁴Orait nau, King Erod Antipas em bin lisen pipol ebriwea tokbaut Zizas. Sam pipol bin tok diskain, ‘Ei! Diswan ai tingk em i Zon Baptaizman uda bin kamlaipgen. Daswai dis man Zizas gad paua po meke ol mirikal nau.’

¹⁵Ol nada pipol bin spik, ‘Diswan dat longtaim spesilmesizman, neim blo em Ilaiza.’ Ol nada pipol bin spik diskain, ‘Em wase wan dem spesilmesizman prom bipotaim.’

¹⁶Bat wen Erod bin lisen, em bin spik, ‘Diswan Zon Baptaizman uda ai bin gibe oda po kate ed blo em. Em bin kamlaipgen.’

¹⁷Wail Zon Baptaizman bin stil laip, em bin ebritaim graul po Erod, ‘Ei, i no rait po yu po maret da oman blo bala blo yu.’ Erodias i bin da oman blo bala blo Erod, neim Pilip, bat Erod bin maret em. Wen Zon bin tok diskain, dat oman blo Erod, Erodias bin ebritaim prapa wail po Zon. Erodias bin wande Erod po gibe oda po kile Zon, bat Erod no bin wande kile em, so em bin mata oda dem amiman po kesem ane lokem insaid zeilaus. Wen Zon bin insaid zeilaus, Erod bin lugautem prapagud bikoz em sabe Zon bin gudman blo God. Ebritaim wen Erod i yan wea Zon, em bin laik po lisen po em bat wen demtu pinis yan, Erod bin ebritaim wori bikoz em no sabe wanem po mekem baut wanem Zon bin tokbaut.

²¹Nau Erod bin meke big pisting po batdei blo em. Em bin inbait ebri edman wea gabman blo em, ebri kapten blo ami blo em ane ol dem elda blo Galali po kam ane kaikai wea em. Ane seimtaim nau Erodias bin paine wei po kile Zon Baptaizman.

²²Da gel blo Erodias i bin kam insaid wea da pati ane em bin dans po dempla ane ebriwan bin luk em. Erod ane ol pren blo em bin nadakain api po luk da gel dans. So Erod bin aske da gel diskain, ‘Mai gel, aske mi po eniting yu wandem, ai go gibem po yu.’

²³Den em meke dis promis po da gel. Em spik diskain, ‘Ai go gibe yu eniting yu wandem, iben ap blo ebriting ai gad.’

²⁴Wen da gel bin pinis dans em bin go po Erodias, mama blo em ane aske em diskain, ‘Wanem ting ai go aske Erod po?’ Mama spik po em baigen, ‘Aske Erod po ed blo Zon Baptaizman.’

²⁵Da gel bin ariap gobaigen po Erod ane spik po em diskain, ‘Ai wande yu po kate ed blo Zon Baptaizman ane pute ed blo em antap wea trei ane kare em kam po mi.’

²⁶Wen da king bin lisen dis tok em bin nadakain sore, bat em bin sem po spik no po da gel, prant wea ebriwan uda bin de wea em.

²⁷Erod bin sane wan amiman go po da zeilaus po kate ed blo Zon ane tekem kambaik po em. Da amiman bin go ane kate ed blo Zon de insaid wea da zeilaus,

²⁸ane em bin kare da ed kam antap wea trei ane gibem po da gel. Den da gel bin gibem po mama blo em.

²⁹Wen dem klostuman blo Zon bin lisen Zon bin ded, dempla bin kam po teke da bodi ane bere em.

³⁰Orait. Dem misnareman blo Zizas bin pinis goraun ol dem biliz. Wen ol bin kambaik, ol bin spik po Zizas wea dempla bin go ane wanem dempla bin mekem ane wiskain ol bin tok ane tise ol dem pipol de.

³¹I bin gad plenti pipol raun wea Zizas ane plenti pipol bin kip kam ane go. Zizas ane dem misnareman blo em no bin gad taim po kaikai. So Zizas spik po dempla, ‘Kam, yumpla go po kuaiatples sole yumpla ken spel.’

³²So ol bin zamp insaid wan bot ane go po kuaiatples.

³³Bat plenti pipol bin luk dempla go. So dem pipol bin ran go wea da said blo da leik po dat ples wea Zizas bin go. So dempla i bin kesem de pas.

³⁴Wen Zizas bin go antap wea sanbis, em bin luk i gad tumas pipol de weit po em. So Zizas bin pil nadakain sore po dem pipol bikoz dempla wase smolsip nogad no man po lugaut dempla. So Zizas bin tise dempla plentiting.

³⁵Wen i bin klostu po dak, dem klostuman bin kam ane spik po Zizas, ‘Ei Masta. I stat po dak nau ane diswan em i ples wea i nogad nating.

³⁶Yu sanewei dem bigmob pipol go po dem klostu biliz so dempla ken go baie kaikai.’

³⁷Zizas bin ansa dempla baigen, ‘No! Yupla gibe dempla kaikai.’ Nau dempla bin ansa diskain po em, ‘Mipla go nide eit mant pei po pide dempla ebriwan. Yu wande mipla po spene dat mas mani po pide dempla?’

³⁸Ane Zizas aske dem klostuman, ‘Ei, yupla gad eni kaikai? Yupla go nau ane paindaut.’ Den dem klostuman bin kambaik ane spik po Zizas, ‘Mipla bin paine paib smol bred ane tu smol pis.’

³⁹Nau Zizas bin spik po dem klostuman po spik ol dem pipol po splitap po smol mob ane sidaun daun wea da gras.