Marcos 6:12-39

¹²janua jawen tsumabu buake buakexun dabe tibi kaxun jatu yusin taewakin: —Dioskidi man chakabumis jenetan matun shinan betsa wadikanwen— jatu wakin

¹³yushin chakabu kainmakin kaya wakubainkin isin teneaibu xeniwen dapuxkin jatun isin mainwankubaunibukiaki.

¹⁴Janua jawada Jesúskidi chania akeakeaibu xanen ibu Herodesin ninkatan jawen tsumabu yuikin: —Nashimanika Juan mawashina ana bestenshinxun jawen kushipa Jesúski maewa jatun jawen kushipawen atimaska jawa nun atiduma Jesúsun jatu uinmaikiki— ikaya

¹⁵januxun juni betsan jawen shinanen yuikin: —Ja Jesúsdan, Elías ana jushianki. Elías ikibikain— ikaya betsandi yuikin: —Ja Diosun jancha yuixunika nukun xenipabube jiwepauni betsaki, ja Jesúsdan— ikaibun

¹⁶Herodesin jatu ninkatan yuikin: —Jabaa! Juan en jatu yunua texteimabudan, ma bestenshinamenkain— inikiaki.

¹⁷Herodesin eska shinankin anidan, matu yuinun ninkakanwen. Badi betsatian Herodesin jawen betsa Filipon ain Herodías mebinmaken Juanen nemakin yuikin: —¿Jaskakin min betsan ain mebintan min ainwainmamen? Jaskatimajaidaki. Ainwanyamawe— akubainaya atimas jawen ainkidi shinain jenekatsi ikama nuikin xanen ibu Herodesin jawen policiabu yunua Juan achixun mane dispiwen menextan bichiti jiwe medan bichiabun

¹⁹xanen ibun ain Herodías Juanki sinatakin jatu tenanmanun ikaya

²⁰jakia Herodesin jaska Juan juni pepa unankin jawen ain nemakubainkin dasibi jawen yusian ninkabiakubainkin jawen shinan pewadiama ikunkainaya

²¹janua jawen badi janu kaini taxniaya januxun jatu beyusmakin nawamakatsis ikin jabu jatubetan yunumisbu inun, soldadobu xanen ibubu inun, Galilea anu pei ichapayabu jawen jiwe anu jatu ichawaxun jatu pimaya Herodíasin jawen bene padankin Juan jatu tenanmakatsis ikaya

²²Herodíasin bake chipash jatu nawaxunkin xanen ibu Herodes inun ja jatu pimakin ichawa jatu benimawaya Herodesin jawen aniwa yuikin: —Jawada min ea yuka en mia inanxanaii— iwanan,

²³yubakin ana yuikin: —Jawada betsa betsapa min ea yuka nukun mai pakea namakis paxkaxun en mia yunutiduki— akaya

²⁴ninkatan chipash nawai mainkaini kaxun jawen ewa Herodías yukakin: —Ewaan, ¿jawa yukatanpa?— aka jawen ewan yunukin: —Nashimanika Juan jatu textemaxun jau mia jatu bemaxunun ja ea atanwen— aka

²⁵jawen epa xanen ibu Herodes anu jawaida ana jikikain yuikin: —Na jabiatian Nashimanika Juanen buxka ea inandiwe, sapa kenchakidan— aka

²⁶jawen juinti metexekei punu nukatan Nashimanika Juan tenankatsi ikamabia ja jatu pimaibu bebunxun jawen aniwa ma yubai ninkakanxunwen taexun jawen yuba binumakatsi ikama

²⁷jakimamadi ja soldado bichiti jiwe anu jau katanun xanen ibun yunukin: —Juanen buxka textexun ea bexuntanwen— aka

²⁸soldado kaxun bichiti jiwe medanua Juan textetan jawen buxka sapa kenchaki nanebidan bexun ja chipash inan ja chipashan jawen ewa inanikiaki.

²⁹Jaska wakin Juan tenankanxu jawen tsumabun ninkatan bexun jatu yukatan jawen yuda bibain maiwati anu maiwanibukiaki.

³⁰Janua jawen kushipayabu yunua butani Jesúski ana jaki dasitan jaska wakubauntanshinabu Jesúski chania akeakei meneabun

³¹yudan kaian Jesúski ichabu janixun jawen tsumabun pitidubumaken Jesúsun jatu yuikin: —Benanta jatu dapaxkabain jadia juindukunyunun bukanwen— jatu wabaini

³²janua Jesús jawen tsumabubes xaxun inatan kai janu tsua jiweabumanu buaibun

³³jakia Jesúsun jatu jenebaini kakin mae tibi dunkebainai uin Jesús dunkenanain bechibaini chibain kushibaini mae bestibu tibi anuabudi bui Jesús jikidiama jabu dukun bebunkidi jikia maniabun

³⁴Jesús xaxuwen kai keti itan xaxu anua butukainkin yudan kaian uin jatuwen nuijaidakin jabu chaxuwan uinikauma keskabuwen taea jatuwen dabanan ikin jatu yusin taewaxun betsa betsapawen jatu yusinbaiaya

³⁵janua ma badi kaya jawen tsumabu Jesús dapi buxun yuikin: —Ma badi kaikiki. Nenu tsua jiweabumaki.

³⁶Na yudan kaianen jabun jania pitidubumaki. Ja mae udama tibi anua jau misi bixun pitan jau jaskadabaintanunbun jatu nichindiwe— akabu

³⁷Jesúsun jatu kemakin nemakin: —Jaska jatu wama, matun jatu pimakanwen— jatu wa januxun jawen tsumabun yuikin: —¿200 día nun dayai peiwen jatu misi bixuntanpa, jau pinunbunan?— akabu

³⁸Jesúsun jatu yukakin: —¿Jati misi man jayamenkain? Uintankanwen— jatu wa buxun uintanxun yuikin: —Meken besti misi inun baka dabe besti nun jayaki— akabu

³⁹januxun jawen tsumabu Jesúsun yunukin: —Jatu ichawa akeakekanwen. Ja basiki jau tsaununbun jatu yunukanwen— jatu wa