MAAKU 6:12-39 - Luda yã takada kũ Bisã yão

MAAKU 6:12-39

Click on verse(s) to share them!

¹²Akũ ò dà zɛ́n ò nɛ̀sɛlitɛna waazi kɛ̀ gbɛ̃nↄnɛ

¹³ò tãnanↄ gòḿma dasi, ò nísi màma gyãrenↄa dasi ò ń wérekↄ̃a.

¹⁴Kí Hɛrↄdu yã pìnↄ mà, zaakũ Yesu tↄ́ kà gu sĩnda pínkia. Gbɛ̃kenↄ tɛn pi Yahaya Da'itɛkɛri mɛ́ à fùtɛ bona gan, abire yãin à gbãna lè àtɛn daboyãnↄ kɛ.

¹⁵Gbɛ̃kenↄ pì Iliasumɛ, gbɛ̃kenↄ pì annabiimɛ lán annabi yãnↄ doke bà.

¹⁶Kũ Hɛrↄdu mà à pì: Yahaya kũ ma a mìi zↄ̃̀ mɛ́ à vù bona gan.

¹⁷Zaakũ Hɛrↄdu dokↄ̃nↄ pì mɛ́ à a vĩ̀ni Filipi nↄ Hɛrↄdia sìa à sɛ̀. Kũ Yahaya dìgↄ̃ onɛ a vĩ̀ni nↄ sinaa manaro, akũ Hɛrↄdu tò ò Yahaya kũ̀ ò mↄ̀ↄ kàa ò a dà kpɛ́siran.

¹⁹Hɛrↄdia sↄ̃ à Yahaya pɛ̃tɛ̃ kũnamɛ à ye à a dɛ, ama adi zɛ́ lero,

²⁰zaakũ Hɛrↄdu dↄ̃̀ kũ Yahaya bi Luda gbɛ̃ súsumɛ, akũ àdi vĩna kɛnɛ àdi tó ò wari dↄaro. Tó à gɛ̀ɛ à a yã ma, laasun dì gɛ̃mmɛ. Bee kũ abireo àdigↄ̃ ye a fàaibonaai.

²¹Hɛrↄdia zɛ́ è Hɛrↄdu ina gↄrↄ kↄ̃kↄ̃ zĩ. Hɛrↄdu gbãnadenↄ kũ soza gbɛ̃ zↄ̃kↄ̃nↄ kũ Galili gbɛ̃ bɛ̀ɛrɛdenↄ kàkara pↄ́blekia.

²²Akũ Hɛrↄdia nɛ́nↄkpare gɛ̃̀ à ũ wã̀. À kɛ̀ Hɛrↄdunɛ nna kũ a nibↄnↄ ń pínki, akũ kína pì nɛ́ pìinɛ: Pↄ́ kũ ń yei ǹ a wɛ́ kɛma, mani n gba.

²³Akũ à ɛ̀ra à pìnɛ: Ma la dànnɛ pↄ́ kũ n a wɛ́ kɛ̀ma pínki, mani n gbamɛ, bee ma kpata kpaatɛ.

²⁴Akũ nɛ́nↄkpare pìi bò à gɛ̀ɛ à a da là à pì: Bↄ́n mani wɛ́ kɛaa? Akũ a da pìnɛ, Yahaya Da'itɛkɛrii mìi.

²⁵Gwe gↄ̃̀nↄ à ɛ̀ra à sù likalika à gɛ̀ɛ à ò kínanɛ: Má yei ǹ ma gba Yahaya Da'itɛkɛrii mì dana tiree gũn la tera.

²⁶Akũ kína pↄ yàka manamana, ama kũ à la dà nibↄnↄ wára yãin adi fↄ̃ à gì doro.

²⁷Akũ kína pì a dogari ke zĩ̀ gↄ̃̀nↄ, à pìnɛ à gɛ́ à a mì zↄ̃ à mↄ́o. Akũ à gɛ̀ɛ à a mìi zↄ̃̀ kpɛ́siran

²⁸à dà tiree gũn à sù à kpà nɛ́ pìia, akũ à kpà a daa.

²⁹Kũ Yahaya ìbanↄ yã pìi mà, akũ ò sù ò a gɛ̀ɛ sɛ̀ ò vĩ̀.

³⁰Yesu zĩ̀rii pìnↄ sù a kĩnaa, akũ ò yã kũ ò kɛ̀nↄ kũ yã kũ ò dàńnɛnↄ ònɛ pínki.

³¹Òtɛn gɛ́ òtɛn su, akũ Yesu kũ a zĩ̀rinↄ dí zɛ́ le ò pↄ́ blè sero pari yãi. Akũ à pìńnɛ: À mↄ́ ò gɛ́ gusarɛ ó tɛ̃nɛ ò kámma bo fíti.

³²Akũ ò dà zɛ́n gó'itɛ gũn òtɛn gɛ́ gusarɛ ńtɛ̃nɛ.

³³Kũ gbɛ̃nↄ ń gɛnaa è, ò ń dↄ̃, akũ ò bò wɛ̃tɛ kũ wɛ̃tɛo dasi ò bàa lɛ̀ gɛ̀sɛ ò kà gwe ń ã.

³⁴Kũ Yesu bò gó gũn, à gbɛ̃nↄ è dasidasi, akũ ò kɛ̀nɛ wɛ̃nda, zaakũ ò de lán sã kũ ò dã̀ri vĩronↄ bàmɛ. Akũ àtɛn yã dańnɛ manamana.

³⁵Kũ ifãntɛ̃ bùsa, akũ a ìbanↄ nài ò pì: Gu dí bi sɛ̃̀ntɛpↄrↄtumɛ, akũsↄ̃ gu tɛn si.

³⁶Ǹ gbɛ̃nↄ gbarɛ ò tá bura kũ lakutu kũ ò kú kãninↄa, ò pↄ́ wɛtɛ ò lú ò ble.

³⁷Akũ Yesu wèḿma à pì: À pↄ́ kpáḿma ò ble. Akũ ò pìnɛ: Ń ye ò gɛ́ burodi lú andurufu ↄgↄ wàa do ò kpáḿma ò blen yá?

³⁸Akũ Yesu ń lá à pì: Burodi mɛ̀n ũgban á vĩi? À gɛ́ gwa. Kũ ò kà, ò pì: Burodi kun mɛ̀n sↄↄro kũ kpↄ̀ↄo mɛ̀n pla.

³⁹Akũ à pìńnɛ: À gbɛ̃nↄ vutɛvutɛ sɛ̃̀la bↄ̀tↄↄa gã̀agãa.