Markus 6:12-39

¹²Lakea ri vano, ri vara e huriki ri gi pulo a vilone ria.

¹³Ri lili tala e huriki a hanitu, ri biri na nibiri e huriki ri giloa, ri vakamahuri ria.

¹⁴E Herod a hariki i longo a maka maki e Isu i rata, a vuhuna a rane Isu ni lohoka vona pali na tanga lobo. E huriki ranga ri ta maea, “Ra viri iea e Ioanes, a mari ni vahilolo, a Vure i vakamahuri mulea na matenga, lakea i tahoka a nitora ni rata a nivakasiri.”

¹⁵Pali e huriki ranga ri taki ta ia e Elaisa. E huriki ranga ri taki ta ia a propet tara, i manga e huriki a propet hosi.

¹⁶Pali e Herod, na tahuna i longo a ngava nga, i ta maea, “Iau a palakudua hosi a lohone Ioanes, pali ngane i mahuri mule tabu na matenga!” I ta mavonga, a vuhuna

¹⁷hosi e Herod i parangi vona e Herodias, e girihine tarina e Pilip. Pali e Ioanes i takia e Herod, i ta maea, “I uka ma a vilo na vinara go parangi tabu e girihine tarimu.” E Herodias, i madihi a hatena vona e Ioanes, lakea i ngaru ni rabalakia. Pali i uka dalana, a vuhuna e Herod i mangenge ne Ioanes, i matakaria. I lohoka vona ia a bakovi kamumu, i kiripiripi a vilona. E Herod i vivi ni longoa a vinara ne Ioanes. Pali na parava ranga bara i loho lege vona a vinara ne Ioanes. Muri i rudu vakuku, ni gi lakavu e Ioanes, ni gi kolotata, ni gi ru dili na bavi.

²¹Muri e Herodias i maragisi vona a maki i ngarua. Na parava ni poda vona e Herod, e Herod i ratea a habu, i gale palupu e huriki a bolekori vona, a ubu na tara vona, a bakovi dagi o Galili, ri gi valai na habu.

²²E tune Herodias a ngatavine i dili, i raulo, i rata e Herod turana e huriki ri valai na habu vona ri vivi. Lakea a hariki i takia a koma ngatavine, “A ra maki o ngarua bara habia vomu.”

²³Muri i kaba i ta maea, “A ra maki o nana vona, bara habia vomu. A tabeke na harikianga nau tara bara habia.”

²⁴A koma ngatavine i pagitala i nanea e kinana, “A ra maki ga nana vona?” E kinana i koli, i ta maea, “O nana vona a gine Ioanes, a Mari ni Vahilolo.”

²⁵A koma ngatavine i malaviriri kunana, i laho hari dili mai a hariki, i ta maea, “A ngaru go palakudua a lohone Ioanes a mari ni vahilolo. Muri o habia nau a gina.”

²⁶A hariki i lege a lohona, pali i uka ma i ngaru ni ta pupukari vona, a vuhuna i kaba na matane huriki ri bele na habu.

²⁷Lakea i malaviriri kunana i rudua a nugumaheto ge palakudua a lohone Ioanes, ge bole vilia a gina. A bakovi i vano, i palakudu pololilo na bavi a lohone Ioanes.

²⁸I ru langea na sika, i bole vilia na hariki. Lakea a hariki i habia na koma ngatavine. Muri a koma ngatavine i vano i habia ne kinana.

²⁹E huriki a murimuri ne Ioanes ri longoa a velengana, ri vano, ri bolea a podana, ri tanua. Pali ngane, e Herod i pahaluhoia e Isu ta ia e Ioanes i mahuri mule na matenga.

³⁰E huriki a apostolo ne Isu ri vapopo turane Isu, ri vakalongoa vona a maka maki ri rata, ri tovo e huriki vona.

³¹E huriki ala kupo ri laho viri varola, ri pahakari ria ni kani, lakea e Isu i taki e huriki a apostolo vona, “Mu valai turagu, si gi lakea na hini i ngeki, si gi malo taro vonga.”

³²Lakea ri rike na aga, ri vore lakea na tabeke i ngeki, ta ri gi made kikeri vonga.

³³Pali na tahuna ri vano, e huriki ala kupo ri matai ria, ri matakilala ria, lakea e huriki na tanga lobo ri nunu pololilo, ri bele muga vonga.

³⁴Na tahuna e Isu i bele, i matai ria, i dodo ria, a vuhuna ri manga a sipsip, i uka matakari ne ria. Lakea i vakatubu ni tovo ria na maki i kupo.

³⁵I tabalahehe pali a haro, lakea e huriki a murimuri vona ri takia, ri ta maea, “Ra hini nga a tabeke i ngeki, i tabalahehe pali a haro.

³⁶O rudu e huriki, ri gi lakea na robo viliha nga, na maka tanga, ri gi kona a maki ni kani.”

³⁷E Isu i koli, i ta maea, “Mu vakani ria!” Ri ta maea ria, “A moni ni kona a maki ni kani ne ria vona bara i vatovotovo turana mapana viri i leho na keva i polotolu! Pali i uka ma i kamumu si gi kona a maki ni kani ne ria.”

³⁸Lakea i nana ria, “I riva a bret mu tahoka? Mu vano mu matai.” Ri matai pali, ri hamule, ri vakalongoa e Isu ri ta maea, “A bret i lima, a manu i rua.”

³⁹Lakea e Isu i vakuku e huriki ri gi made vapopo na varili gomagoma.