Markus 6:12-39

¹²Seogpa, aobarenang aneko piekti, “A'undi mali-malia uropne lepsisut,” aro ambarelamsiek.

¹³Ambarelamsiekti, Yesusti sinag mikipne pipsiogneag agha phia nimi kulomag ulamogne maikno yag lanalamsiek. Nimi niktop nimi maikno babe kemelamsiekti, kal saitun wana lolterop mag usoghag pelaglamsiekti, Yesus poneko mikipne pere agha wali nenelamsiek.

¹⁴Undo unulamekpa, nimiri Yesusti ulamogne sembe a'ero-a'ero seneraglamek. Nenneri, “Allah yubu silimu tiplamek nimiri samenag ulamek saog uro, el babe Allah yubu silimu tiptopne wamlari ulamla,” senelamek. Nenneri, “Allah yubu silimu tiptopne Elia nen samoro yaori, el agha ane to?” senelamek. Nimi nhon-nhondi Yesus sembe senelamekti, “El Yohanes, nimi maghag pelengehiropne poneko wamla. Yohanes poneko samenag tebao aghana nen kamag tangka yao. El kamag tao ane sembe, nimiri uanep komne Allahri mikipne el pere agha ulamla,” aro lelamek. Nimiri Yesusti ulamogne sembe maiknoro lelamekpa, mog so'o Galilea nimi sembe yubu sia leropne Herodesti babe ka'ebaog.

¹⁶Herodesti ka'ebaogti, el lobaro seneragto lelamogti, “Ane sik Yohanes. Samen nari arukahinoba, nimiri Yohanes ngang karebaongpa, tebao. Aghana, wene el nen samoro kamag tao,” seog.

¹⁷Yubu sia leropne Herodesti Yohanes obogne undo uro yabiog. Samen Herodes ilipsae Pilipus wamog. Pilipus elkel Herodias wamogpa, yubu sia leropne Herodes ponekori ilipsaeri kel eneko pelepto aog. Pelebaogne sembe Yohanesti Herodesag yubu lelamogti, “An anipsaeri kel pelebaomne nene, Allahri yubu lebogne irikna phiro uaom,” aro wembaog. Wembaog ane sembe, Herodesti pelepto aog keleneko Herodiasti ela'angeag lelamogti, “Yohanes nene saelbamendi, haing sae kaupto kop aeag tobongkalulam,” seog. Seogpa, Herodesti nimi arukahiogpa, Yohanes salero haing sae kaupto tobongkibek.

¹⁹Wembaogne sembe Herodes elkel Herodiasti, “Yohanes ya'ag omnun,” aro yo senelamog. Yo senelamog aghana, ela'ange Herodesti, “Yohanes poneko nimi sikne Allah Eldamneri poghogne wamlari, walia ulamla,” aro el wamog. Ane sembe Herodesti Yohanes yae urop nimiag, “Yohanes poneko wali uro piamlulom,” aro arukamsiogpa, elkel Herodias nenekori “Yohanes omnun,” sembaog aghana, omnep kom wamog. Wamogpa, yubu sia leropne Herodesti babe Yohanesti ambarelamog yubu ka'elamog abeneko pere, yeng uro ka'elamog aghana, elkel Herodias pelebaogne sembe “Huahane?” aro enhaun seog.

²¹Olog wamekpa, ik nhon sum yubu sia leropne Herodesti, “Na mangkaneek sum kwelekto yabilbana sani yobatsinun,” aro nimi nubunang yopsiog. Eldi yubu eptopnangap, eldi yin saleropnang sikindoyaboap, mog so'o Galilea nimi nubunangap, “Na mangkaneek sum talbana, sani nikag tukap,” aro yopsiog. Yopsiog sumeneko elkel Herodiasti, “Sumene 'Yohanes omnun,' senelamnange pa'asea sumene agha,” sembaog.

²²Sembaogpa, sani nikag telamekne pere agha Herodias elmangkel wa'iogti, saren kelenekori nimi nubunang taneko whing toman kolapto seplamog. Kolapto seplamogpa, Herodesap elap nikag telamek nimiapti, “Saren kelene wali uro kolapto seplamla,” aro awi sembaek. Awi sembaekpa, yubu sia leropne Herodes ponekori saren kel enekoag, “Nanag molbane. Andi 'Sa'a-sa'a tatneho,' senelamlama tatkenun.

²³Nari saelbamna mog so'o molbanemena babe, naringe nhon andinge nhon pokto tatkenun. Sik lemna. Andi molbanemena tatkene kom tanena, Allah imnelne ponekori hae omnelul,” aro salag lebog.

²⁴Wene seogpa, saren kel enekori ilin Herodiasag hail palamogti, “Kain, na sa'a moloro anun?” aro haibaog. Haibaogpa, ilindi samoro ambarelamogti, “'Yohanes maghag pelengehiropne ngang karepto olopmenba, usog imnun,' aro Herodesag molbalulam” seog.

²⁵Wene seogpa, ta'ap sen koma saren kel eneko Herodes yaghag samoro piog. Piogti, mololamogti, “Nai, nari anag mololangkennena, Yohanes maghag pelengehiropne tebalul. Eldi usog ngangag agha karepto olobikti, usog yangkarobag paia tarelaikpa, imnun,' aro mololangken,” seog.

²⁶Molbaog yubu aneko ka'ebaogti, Herodes wana ikin taog. Wana ikin taog aghana, eldi wanaag seneraglamogti, “Tane wamang nimi whingag, 'Tatkene kom tanena hae Allahri omnelul,' aro salag pimna,” aro seneraglamogti aliri, “Kom senep komdi, hae tatnun,” sembaog.

²⁷Wene sembaogti, ta'ap sen koma yin salero nimi ohirop nimi nhonag, “Kelenekori, 'Yohanes maghag pelengehiropneri usog imnun,' selba karebel pimendi, payalulam,” aro arukaog.

²⁸Ane sembe nimi nenekori Yohanes piamekag aneko piogti, Yohanes usog ngangag agha karebel pina yangkarobag pibogti, Herodias elmangkel tarel aog. Tarel aogpa, saren kel enekori tipto ilinag 'Iplul' aro tarel piog.

²⁹Wene aro obekpa, Yohanesti yubu ka'ero neleptopnangdi ka'ebaekti, Yohanes nong teptoba tol aek. Tol aekti, Yohanes nong teptoba aneko pabiekti, kirik selenga lomag pail piek.

³⁰Yesusti wepto pogsiognang taneko nen samoro Yesus yaghag yaek. Yaekti sikindi nimi yepto ulamekneap, nimi Allah yubu ambarelamsiekneap sembe Yesusag ambarek.

³¹Ambarekpa, nimi maikno “Yesus kemel pukap,” aro pang yang ulamekneri Yesusap el neleptopnangap kwaneng tenep kom wamog. Ane sembe el neleptopnang ambarelamsiogti, “Yahut! Nu nimi oroghag piberi, olog nu wali tektek papto wamukap,” seog.

³²Wene seogpa, sin kabong lomag wa'iekti, nimi oroghag sip mag alip toman piek.

³³Piek aghana, nimi maikno sikin palameka ipsiekti, “Tanetna Yesusap el neleptopnangap agha palamang,” aro el tahiog. El tahiogpa, mog so'o anekoag wamek nimi maiknori, “'Yesusap eldi yubu ka'ero neleptopnangap mag abolag anoko saingil pukap,' aro ulamangpana, so'o toman merero sin sam whing karepto pukap,” aro ulamek.

³⁴Yesus kabong lomag agha lambom agha tilamsiogpa, nimi teng-tengne longkamek. Longkamekpa kembahiogti, “Nimi taneko wana ophag aro wamangnena, pham domba paia uhirop nimi orogti, pham domba 'Tala pukap,' aro ophag alo saog uro wamang,” aro o'ona sembahiog. O'ona sembahiogti, yubu maikno ambarelamsiog.

³⁵Ambarelamsiogpa, ae sin taogpa, eldi yubu ka'ero neleptopnangdi Yesusag yubu lelamekti, “Ae imbalba, mog so'o ane ae sorop komag paiag wamap.

³⁶Kwaneng orogti, andi nimi taneag 'A'un koloptahut,' aro ambatsimenba, as kanero wamangneag kwaneng kamna kapto tol pukang,” seek.

³⁷Wene seekpa, Yesusti samoro ambarelamsiogti, “A'undi agha kwaneng tatsimunba, tukang,” seog. Wene seogpa, sindi, “Nunag kal ma'al ologha wamlangena, tane wamang nimi teng-tengne wamangneap sunurop kom. Nuri kal ma'al agha ni tane wamang nimi sembe sunuro kwaneng tenep uro kamna kapto topsebe tanena, nimi nhondi wal linbare awe topsoba, kamna tatnep saog urop kal ma'al maikno agha kwaneng kamna kapto topsebe. Andi nunag, 'Hae tol pululom,' selam, te?” aro Yesusag haibaek.

³⁸Wene seekpa, Yesusti hailamsiogti, “A'unag kwaneng roti etpare poamlom? Kemel pululom,” seog. Kemel piekti, “Kwaneng roti taroba lambareap, ikan phendeap wamla,” aro ambarek.

³⁹Wene aro ambarekpa, Yesusti el neleptopnangag ambarelamsiogti, “Nimi palu a'ero-a'ero nembia, 'O'olaba saiag puksut,' aro ambattoa yabihilulom,” seog.