Mak 9:28-47

²⁸Numur det ruk un ara rumu, ra anun a kum nat na ususer det ting eno i lena, “Ilai ra ka met lakro lar pas a laulau na nion gusuni?”

²⁹O Iesu i balu det lena, “A ngas na laulau na nion lenri, in pirso kut una niaring.”

³⁰Det wan tagitiro iai, ma det wan sakit potor una papor Galili. O Iesu ke nemi sur taio in tasman a nubual ra det in kis iai,

³¹uni i nemi sur in ususer anun a kum nat na ususer. Ra i watungi tandet lena, “Din pitar a Nutun a Musano ulaman a taro, ma det in um doko i. Numur tan a tulu bung, in laun melet.”

³²Ka det talapor una kukurai ina wasiso ri, ma det ngara sur det in tingi.

³³Det wanpat tong o Kapernaum. Ra det ruk una rumu, o Iesu i ting det lena, “Asau ra mot engaras uni ra mot wan nanan una kisapi?”

³⁴Ikut ka det balu i, uni det engaras sur osi ra i labo taun det.

³⁵O Iesu i kis ra i kabo pas anun a noino ma aru nat na ususer, ra i watungi tandet lena, “Ra taio i nemi sur in mugumugu, i wakak sur in unatino pasi ut, ma in tultul kut anun a taro rop.”

³⁶Ra i los pas ara natlik, ma i utur tari epotor tandet. Numur i romo pasi, ma i watungi tandet lena,

³⁷“Osi ra in gas pas tu natlik lenri una risang, i gas pas iau ut. Ma osi ra in gas pas iau, awu sur i gas pas iau kut, i gas pasi utkai o naro ra i tulu ru iau urin.”

³⁸O Jon i watungi tan o Iesu lena, “Tene Ususer, met tama ara musano i lakro ru a kum laulau na nion nama risam, ra met turbati, uni i awu sur tagun dat.”

³⁹O Iesu i balu i lena, “Gong mot turbati. Ra taio in pam tu utna na ukisin nama risang, ken watung lakit tu sakino wasiso un iau.

⁴⁰Uni osi ra ke turbat dat, i warut dat.

⁴¹A inanos mot nama lingmulus, osi ra in tabor mot nam lakalik danim uni mot anun o Karisito, in losi ut anun a ikul.

⁴²“Osi ra in ben raro ara tagun a kum nat liklik ri, ra det nurnur un iau, a warkurai toromi in laulau doko tan taio ra din kubus tar tu labino wat unin kabarano, ma din woro murungi usa utasi.

⁴³Ra a lamam in ben raro ui, un kutus ru i. In wakak ra un ruk una nilaun tukum a tumul kut ui, sur gong di woro ui tomo nama ru lamam rop una labino sungun ra ke ser mat.

⁴⁵Ra a kikim in ben raro ui, un kutus ru i. In wakak ra un ruk una nilaun tukum a tumul kut ui, sur gong di woro ui tomo nama ru kikim rop una labino sungun.

⁴⁷Ra in matam in ben raro ui, un liok ru i. In wakak ra un ruk una matanitu anun o God namin teken matam kut, sur gong di woro ui tomo nam arin matam rop una labino sungun.