28मिनु येसु नु आ शेंसीबपुकी खिं लमा बाक्त। मिनु शेंसीबपुकीमी “मारदे मेको वोल कली ग्रुंइने मचाप्का?” दे हिल्लो पामे बाक्त।
29मिनु येसुमी “ओदेंशो वोल कली प्रार्थना पशा ला ग्रुंइने चाम्सीब” दे माइक्मी बाक्त।
30मिनु मेकोपुकीमी “इं गाक्शो सुइम मतुइक्तमेक्ल” दे गालील लां पा गाक्मा बाक्त।
31मारदे हना आ शेंसीब आन कली “रागीम जरमेशो दा मुर आन गुइमी गेशा, साइक्चा पुंइसीशा, आ नित्थ नाक्ती बेक्शो रे सेंसीब” दे शेंचा दाक्ता बाक्त। मर्कूस ८:३१; मर्कूस १०:३२-३४
32शेंसीबपुकीमी चहिं आ शेंशो मरुप्मे बाक्त। मिनु हिल्लो पचा यो हिंमा बाक्त। लूका १८:३-४
33मिनु कापेरनाउम जाक्दीम्मा बाक्त। मिनु खिं का ओव़शा, येसुमी आ शेंसीब आन कली “लांमी गाक्यानु, मार लोव़सी पनी?” दे हिल्लो पवा बाक्त।
34तन्न मेकोपुकी सिक्सी पामे बाक्त, मारदे हना लांमी गाक्मानु “नेल्ल क्येङा ठेयब सु बाक्या माइ?” दे लोव़ पशो बाक्मा बाक्त।
35मिनु निश्शा, शेंसीब आन कली आ नेक्था ब्रेश्शा “नेल्ल क्येङा ङोंइती दुम्चा कली नेल्ल क्येङा नोले दुम्शा, नेल्ल आन गेय पाइब दुम्चा माल्ब” देंमाक्त। मर्कूस १०:४३-४४; मत्ती २९:११; लूका २२:२६-२७
36मिनु आल का आन दातेमी चाक्शा, आल कली मुप्शा
37“सुमी आं नेंमी ओदेंशो आल कली ब्राइबा, मेकोमी आं कली ब्राइब। आं कली ब्राइबमी आं कली ममाइ, तन्न आं कली सोइक्ब कली यो ब्राइब” दे माइक्मी बाक्त। मत्ती १०:४०
38यूहन्नामी येसु कली “ए शेंब, गोपुकी नु मगाक्ब मुर कामी इन नें थिशा, वोल आन कली खेरशो ताइतक। मिनु मो पचा मदुम्ब, दे माइक्तक” देंमाक्त। गन्ती १०:२७-२८
39मिनु येसुमी “मदुम्ब, दे मदेंचा, मारदे हना आं नें थिशा, ठेयब गेय पाइबमी आं पर्बम लोव़ मक्याल्ब।
40इं कली मरिम्शो मपाइब मेको इं मुरुन बाक्ब। मत्ती १२:३०; लूका ११:२३
41नोफा दाइश्शा नेनीने, सुमी आं नें थिशा, ख्रीस्त आ मुर नम देंशा, इन कली लोटा का ब्वाक्कु तूचा गेबा, मेकोमी दोपा यो आ इनाम ताइब। मत्ती १०:४२
42सुमी आं कली थमा सुइक्ब आइक्च आल आ थमा सुइक्तीक क्याल्बा, मेको कली आ शुरम यात क्युक्शा, समुन्द्रमी ताइश्शा साइक्चा रिम्शो बाक्ब।
43इ गुइमी तेक्तु हना, मेको गुइ ख्रोतो। मारदे हना निम्फा गुइ पाइश्शो दुम्शा, गेनायो मकाप्ब नरक ङा मीम ओव़चा क्येङा, डुंडे दुम्शा, परमप्रभु यावे आ राज्यमी ओव़चा तचा रिम्शो बाक्ब। मत्ती ५:३०
44नरकमी बाक्ब आन लुस्पु मबेक्नीम, मी यो मकाप्ब।
45इ खोइलीमी तेक्तु हना, मेको ख्रोतो। मारदे हना खोइली निम्फा पाइश्शो दुम्शा नरकम ओव़चा क्येङा, खोरन्डे दुम्शा, परमप्रभु यावे आ राज्यमी ओव़चा तचा रिम्शो बाक्ब।
46नरकमी बाक्ब आन लुस्पु मबेक्नीम, मी यो मकाप्ब।
47इ मिक्चीमी तेक्तु हना, मेको मिक्च फेश्शा ताइक्तो। मारदे हना मिक्च निम्फा पाइश्शो दुम्शा, नरकम ओव़चा क्येङा, काना दुम्शा, परमप्रभु यावे आ राज्यमी ओव़चा तचा रिम्शो बाक्ब। मत्ती ५:२९
मर्कूस 9
मर्कूस 9:28-47