SAN MARCOS 9:28-47

²⁸Chihno min ne, cona̱hn Dihvo vo, ne cuahn che a ndonda̱ ye vah ne, tumerune ihyan apóstol chahn ihyan devavih, ne ra̱hn ye: ―¿Deh cuande che hua chi ndetenda̱h nuhn vaco chihnga̱ me ne?

²⁹Ra̱hn Dihvo vo ri ye ihyan chahn: ―Ca̱va che ndetenda̱h vo vaco chihnga̱ chemin chan ne, nahn che cova̱h vo ma̱n, cuahte vo ya̱hte ma̱n.

³⁰Chihno min ne, chica ihyan chahn min cuahn ye. Chuh ye esta̱do yahn Galilea, ate hua nahn Dihvo vo che cadino nde a̱ma ihyan,

³¹te ricuahn ye ihyan apóstol yahn ye. Ra̱hn ye ri ye ihyan chahn: ―U che rinducó nducoya̱ca ihyan ne, din se preso u, ne ca̱hno se u. Ate cuihno ino ro ne, ntuché va̱n tena̱hn.

³²Hua chenahn ihyan chahn ndudo che tihca̱ ra̱hn Dihvo vo, ne va̱hino ye tumerune ye ihyan deh conahn.

³³Cuahn che nda̱ ihyan chahn ya̱n Capernaum ne, ndonda̱ ye vah. Tuhme tumerune Dihvo vo ihyan apóstol chahn, ne ra̱hn ye: ―¿Deh che a̱ma rente nchuhn yune ura che cochi vo ne?

³⁴Ate hua ndahconan ihyan chahn yahn ye, te rente ye nduco vih cha ye che tahque cona̱n ye.

³⁵Tuhme chihnde Dihvo vo, ne cah ye nduh che ndichio ihyan chahn na̱n ye, ne ra̱hn ye: ―Adecoduhno nchuhn che nahn cona̱n ne ne, va che nda̱hco ndiya ma̱n ne nchuhn, co ne anduhneca̱ deca̱hya yahn combiero yahn ne.

³⁶Tuhme cah ye a̱ma lihn, chihno ye menda̱hn. Cheta̱h ye lihn me quenuhn ye, ne ra̱hn ye ri ye ihyan chahn:

³⁷―Adecoduhno ihyan che renevahnecun ye ihyan yáhn che necun ye nduhca̱ checa̱hya che tuhchan ne, a u renevahnecun ye. Me ihyan che renevahnecun ye u ne, Ihyan che dechuh ye u renevahnecun ye.

³⁸Chihno min ne, ra̱hn Jua̱n ri ye Dihvo vo: ―Ihyan Ricuahn yáhn, ndihchero nuhn a̱ma ihyan che rentiyon ya̱n ye ndih, ne nduco tihca̱ rendetenda̱h ye vaco chihnga̱. Ate hua ca̱h yune nuhn che quendi ye, te hua nduco ye uvo.

³⁹Ra̱hn Dihvo vo ri ye ihyan chahn: ―Hua ca̱hca ta̱n nchuhn che tihca̱ redin ye, te nde a̱ma ihyan che redin ye vederihno nduco vederihquentiyon yáhn, hua chihnga̱ ra̱hn ye yáhn.

⁴⁰Tihca̱, te ihyan che hua ta̱n ye nduco vo ne, rinan ye uvo.

⁴¹Adecoduhno ihyan che te ye andahre a̱ma va̱so nune, cuh ne yahn che rinduco ne u ne, cua̱co rá̱hn rí nchuhn te nda̱hco menun Dendiohs yahn ye.

⁴²’Adecoduhno ihyan che tihyon yune ye a̱ma ihyan yáhn che necun ye nduhca̱ checa̱hya che tuhchan che condihco ye nunde ne, tahque nda̱hca̱ ca̱va ihyan min che dechiche ihyan a̱ma tu yudo chahte da̱ndo ye, cua̱conda̱hnun ye ihyan va̱n nuniya̱hn.

⁴³’Ndete che renda̱ yahn ne che cuahtendihco ne nunde, ne nduco ta̱h ne va che dinahn ne ne, tahque ndah che din ne cuande anduhneca̱ ndete che a chihca ya̱n ne ta̱h ne, te tahque nda̱hca̱ yahn ne che cuahtenan ne vahchetero andahre yuhche ta̱h ne, yudomin ca che numa ne cuahtenun ne va̱n ruchiya̱hn che riche cuahn da̱ma.

⁴⁴Min ne, hua rintoh cuahno ya̱hn, nde hua rih nda̱h che reh te ihyan.

⁴⁵Ndete che renda̱ yahn ne che cuahtendihco ne nunde, ne nduco ca̱h ne va che dinahn ne ne, tahque ndah che din ne cuande anduhneca̱ ndete che a chihca ya̱n ne ca̱h ne, te tahque nda̱hca̱ yahn ne che cuahtenan ne vahchetero andahre yuhche ca̱h ne, yudomin ca che numa ne cuahtenun ne va̱n ruchiya̱hn che riche cuahn da̱ma.

⁴⁶Min ne, hua rintoh cuahno ya̱hn, nde hua rih nda̱h che reh te ihyan.

⁴⁷Ndete che ndutina̱n ne ndi che va che cuahtendihco ne nunde ne, codin ne cuande anduhneca̱ ndete che a tico ne, te tahque nda̱hca̱ yahn ne che cuahtenan ne vahchetero andahre metah ndutina̱n ne, yudomin ca che numa ne cuahtenun ne va̱n ruchiya̱hn