Maga 7:5-35

⁵Felesi dolö amoliage mala dawadigi amoliage ema nabahalea, Dïe bëgëla aulo golia mäu ilile aiyalo mala dibe amo damula naabo nigime hëla made buludola molö nase goda edoïela nabi.

⁶Amala nabasebegi, ea ilima säla obëgësalea, Siiba Aisaeaea asigi fea negelo dilile hedabola bea säla negeimelë. Ea bea säla dëdëi amoda gowe, Udia dolö amolia nema asigi wagadi made ga negesilahilä, adoeamu nïe ëi gauia adalo nea.

⁷Ilia olelesaleada, dolöfäea mala säla negei amomu olelelo nea. Amaimo, ilia memalä nïe ëi gauia adalo nebegola säla negei.

⁸Dilia Godeïe mala säla negei dibe amo fisilahilä dolöïe aiyalo mala dibe amomu gelola hamosa neebela säla ï.

⁹Yesuea sähamu nea sähalea, Dilile aiyala hamolo mala hamosalea. Godeïe mala säla negei fisi amoda dilia hedabola hamoila helësësebe.

¹⁰Amoïe Mosesea mala säla negesaleada, dïe diado diemelele ado nabalahilä hamomalola sälahilä sähalea, Afädëa ïe eedo emele gadiaboseda, baagomäia nufulö dialeala säla negei dialea.

¹¹Amai gaso, diliada gomalä säha aligilomelë. Afädëa nelebo hïle negei amogi eedo galë eme galë ugila negelabiola sähalea, Nelebo amogi Gobanala säseda, eada eedo eme ugila negemabiola sälo. (Gobana nilïle ado adolada, Godegali odala ï.)

¹³Amai amea mäu ilia aiyala hamolo mala olelei amomu hamosa neada Godea ado säsebe amo fisisebemelë. Dilia mala amo gadoi yafie hamosamu aligilomelëla säi.

¹⁴Yesuea udia dolö nefolalo amoli bu misiëlahilä ilima sähalea, Dili sulubadelaea na säsebewe nabalahilä helësëmalo.

¹⁵Nelebo segea dibe amo dolö isogi digase ameada dolö neala nafadelo mademelë. Nelebo isogi dilo segea doadigila awäse amea dolö neala nafadelomelëla säi.

¹⁷Amala sälahilä udia dolö amoli amilahilä e mumuso isogi digai nebegi, ïe bëgëla aulo amolia ema nabahalea, Ado besula säi amoïe mi edodula nabi.

¹⁸Amala nabasebegi, ea ilima sähalea, Dilige asigi made gäwi neale. Nelebo sulubadela segea dilo isogi digase ameada udia dolö Godeïe siigi nigime baalo made. Amo dilia dawa made neale.

¹⁹Molö nase amoda asigigi aulo mademelë. Gaisagi digalahilä segea doadigila aulomelëla säi. (Ea amala sälahilä molö sulubadela molö dialeala säi.)

²⁰Ea sähamu nea sähalea, Asigigi beselagalasebe amea udia dolö Godeïe siigi nigime baalomelë.

²¹Asigigila beselagalasebe amoda gowe. Asigi nafadege, nelegei fa nimolöge, udia dolö baagomäia nufulöge, udia dolö fa nimolöge, hilimu nafade odoa hamomolöge,

²²gesami moholöge, mala nafade elö elöla hamomolöge, wäfalï sämolöge, nafade memelela made sulubadela hamomolöge, mudiamolöge, wäfalï säsäla hololömolöge, gugusämäia hamomolöge, asigi maade gadoi nea hamolo wäla hamomolöge.

²³Amoli asigigila beselagalasebe amea udia dolö Godeïe siigi nigime baalomelëla säi.

²⁴Yesu e sege amo dïgïla gaamu Daiamadi asi. Awälahilä e mosö afädë neebea amoïe mumusogi digai. Udia dolö nefolalebe amolia e neala made helësëmäia helësësa nelo gaso, musügä fimolöi made nelo.

²⁵Amala nebegi, udia afädëïe idiwi holöbö mugabe fedai sebegi, e neala säi amo nabalahilä udia amo fodolofalï maalahilä Yesuïe emo mia gumusula adi.

²⁶Udia amoda Giligi ado adolo. Eda Siliafonisia fii udia. Ea Yesuma sähalea, Nïe nidiwi holöböma mugabe fedai sebe amo dia nesiladigimäia helësësamelëla säla ï.

²⁷Amala säsebegi, ea udia amoma sähalea, Molö nahalea dafidi malögalidale ïmolö galea. Malöïe molö dibe amogida ügülogali muäia sadia gagala ïmolöi made galeala säi.

²⁸Amala sälebe udia amea ema sähalea, Dafidiloo, dofä gaso, malësäea molö nahalea iso dusula fisia digaida ügüloea neala nulö madelela säi.

²⁹Amala sälebe Yesuea udia amoma sähalea, Dia ado säi ameada dïe didiwima mugabe fedai amo hä asimelë. Mosalola säi.

³⁰Udia amo hï mosöa obëgëlahilä beahamelebe ïe malöma mugabe fedai amo doadigila asi. Udia malö amo dofea diasia dibe melï.

³¹Yesu e Daiamadila obëgëla gaamu Saidono awälahilä Gaamu Nabülasimadi nawesa nelolahilä awäla Galili oeabo edefademalä dibea ami beselagalai.

³²Udia dolö nefolalo amolia dolö afädë gëhe gai ado dadabi nelo amo e neebea ami sigi misi. Sigi maalahilä Yesuea e naaboea diigimäiamelëla säla ï.

³³Amala säsebegi, ea udia dolö nefolalo amoli amilahilä dolö amole heledo aliga galahilä nea ïe naabo sögöea dolö amoïe gëhe helegelagi diigilahilä ea gofedela dolö amoïe elïgi diigisalea

³⁴selesaia mosöa sida adogola hame hëia fedalahilä sähalea, Efadala säi. Nilïle ado adolada, Gëhe gai dugimo.

³⁵Amala hamosebegi, dolö amoïe gëhe doga negelahilä ïe elï fodolofalï hedabolasilahilä ado hedabola säi.