Luuqaasa 22:1-49

¹He wode ‘Faasikka’ yaagiya Uytha Baaley matis.

²Kahine halaqatinne higge asttamaareti asaas yayyida gisho waattidi Yesuusa bantta giddofe dhayssaneekko oge koyoosona.

³Xalahey tammanne nam77atappe issuwa gidida Asqoroota Yihuda geetetteyssa gido gelis.

⁴Yihudi kahine halaqatakkonne Xoossa Keetha naageyssata halaqatakko bidi Yesuusa waati aathi immaneekko enttara maqettis.

⁵Enttika hessan ufayttidi miishe immanaw iyara zorettidosona.

⁶Ikka zoretethan giigis. Aathi enttaw immanaw asi baynna injje wode naagishe de7ees.

⁷Hessafe guye, Faasikka dorssay shukettiya Uytha Baaley gakkis.

⁸Yesuusi, “Faasikka kahuwa maana mela bidi nuus giigisite” yaagidi Phexiroosanne Yohaannisa kiittis.

⁹Entti, “Nu awun giigisana mela ne koyay” yaagidi oychchidosona.

¹⁰I enttako, “Hekko hintte katama gelishin haatha oto tookkida addey hinttera gahettana. I bidi geliya keethaa iya kaallidi gelite.

¹¹Keethaawakko asttamaarey, ‘Ta ta tamaaretara wolla Faasikka kahuwa maanaw imatha keethi awunee? yaagis’ giite.

¹²I pooqiya bolla hiixettidi giigidi de7iya dalgga kifile hinttena bessana, yan giigisite” yaagis.

¹³Entti bidi Yesuusi gidayssada hanin demmidosona. Faasikka baale kahuwa yan giigisidosona.

¹⁴Saateykka gakkida wode Yesuusi hawaaretara wolla kahuwa bolla uttis.

¹⁵I enttako, “Ta waaye ekkanaappe sinthe ha kahuwa hinttera maanaw daro amottas.

¹⁶Hiza, si7ite! Xoossaa kawotethan hayssas birshshethay polettana gakkanaw ha kahuwa zaarada miikke” yaagis.

¹⁷Ushshaa ekkidi galati simmidi, “He7ite hayssa hintte giddon shaakettite.

¹⁸Si7ite! Xoossaa kawotethay yaana gakkanaw hachchife doomada ha woyne ushshaafe zaarada uyikke” yaagis.

¹⁹Uythaa ekkidi, galati simmidi, “Hayssi hinttew imettiya ta ashuwa. Hayssa oothishe tana qoppite” yaagidi meenthidi enttaw immis.

²⁰Hessadakka, kahuwappe guye ushshaa ekkidi, “Ha ushshay hinttew gukkida ta suuthan gidiya ooratha caaquwa.

²¹Gidoshin, tana aathi immana uraa kushey taara issife gaytaana.

²²Asa Na7ay iyaw geetettoyssa mela hayqqanaw de7ees, shin iya aathi immiya uraa ayye” yaagis.

²³Entti bantta giddon, “Hayssa ooni oothanee” gidi woli oychchidosona.

²⁴Qassi entta giddon gita gidanay oone giya palami medhettis.

²⁵Yesuusi enttako, “Deriya kawoti bantta asaa wolqqan haarosona; bantta deriya bolla godateyssataskka banttana, ‘Lo77o ootheyssata’ yaagidi xeegosona.

²⁶Shin hintte giddon hessa mela gidoppo. Hintte giddon bayratey kaaloda hano; kaaletheyssi kaalleyssada hano.

²⁷Hanoshin, mokkeyssafenne Moketteyssafe awussi aadhdhi? Moketteyssa gidenneyye? Shin taani hintte giddon mokkeyssa mela.

²⁸“Hintteka ta metuwan taappe shaakettonna taara minnidi eqqidayssata.

²⁹Hintte ta gaytappe maana mela, uyana melanne araatata bolla uttidi tammanne nam77u Isra7eele sheeshata bolla pirddana mela ta aaway tana shuumidayssada takka hinttena ta kawotethan shuumana” yaagis.

³¹Kaallidikka Yesuusi, “Simoona, Simoona, Xalahey hinttena gistteda harqqanaw woossis.

³²Shin taani ne ammanoy dhayonna mela new gaannatas. Nekka simmida wode ne ishata mintha” yaagis.

³³Simooni, “Godaw, taani neera qashettanawunne hayqqanaw giigettas” yaagis.

³⁴Yesuusi Phexiroosakko, “Ta new odays; hachchi kuttoy waassanaappe sinthe ne tana heedzu toho kaddana” yaagis.

³⁵Kaallidikka, Yesuusi enttako, “Taani hinttena korojjoy, karxiiteynne caammi baynna kiittida wode hinttew paccidabay de7ii?” yaagidi oychchis. Entti zaaridi, “Aykkoyka paccibeenna” yaagidosona.

³⁶I enttako, “Ha77i korojjoynne karxiitey de7ey oykko; mashshi baynnay ba afilaa bayzidi mashsha shammo.

³⁷Haa si7ite! ‘Geellatara taybettis’ geetettidi xaafettidayssi tanan polettanaw bessees. Ee, ta gisho xaafettidabay poletteyssi tumattis” yaagis.

³⁸Iya tamaareti, “Godaw hayssan nam77u mashshi de7ees” yaagidosona. I, “Gidana” yaagis.

³⁹Yesuusi kase meezetidayssada denddidi Shamaho Deriya bolla keyis. Iya tamaareti iya kaallidosona.

⁴⁰He bessaa gakkida wode “Paacen gelonna mela woossite” yaagis.

⁴¹Enttafe shuchchi holin gakkiya soo mela haakkidi gulbbatidi woossis.

⁴²“Ta aawaw, ne shene gidikko ha metuwa taappe aatha. Shin ta shene gidoppo ne sheney hano” yaagidi woossis.

⁴³Kiitanchchoy saloppe qonccidi minthis.

⁴⁴Daro un77ettidi minthidi woossees. Iya cawaykka suuthi xokkiyada sa7an xokkees.

⁴⁵Yesuusi woosaa wurssidi ba tamaaretakko yis. Entti, azzaniyappe denddoyssan daaburidi dhiskkidashin demmidi,

⁴⁶“Ays dhiskkeetii? Paacen gelonna mela denddidi woossite” yaagis.

⁴⁷I buroo oda bolla de7ishin daro asati yidosona. Tammanne nam77atappe issoy Yihuda geetetteyssi enttana kaalethees. I Yesuusa yeeranaw mati shiiqis.

⁴⁸Shin Yesuusi, “Yihuda, Asa Na7aa yeerada aatha immanee?” yaagis.

⁴⁹Yesuusa tamaareti he hanuwa be7idi, “Godaw mashshan shocino?” yaagidosona.