Lucas 22:1-49

¹Pan me dodadre levadura ole gute chuia chiu kodi, chui e kada Pascua.

²E suiale kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita, kwian e ulita kle tañachuge age mine gire ama ñage Jesu gai gwangeda. Agwa ama kennga kwian ngleadi kle chage Jesu bale malen ama me takalin age Jesu ole kwian ulita gwa giti.

³Kwian gerunga Chube ole daba alin chugagwalla ulita kaire kwian daba tkanga tangle Moisés chadalla giti ulita kle tañachuge ene Jesudi gire dolla Satanás chku Judas-Iscariote tale, Judas-Iscariote ama kwian geru jwannga Jesuge gdaite ule kwian gdataboko giti gdaite na ole.

⁴Dolla Satanás chku Judas-Iscariote e tale gire Judas-Iscariote jo kwian gerunga Chube ole daba alin chugagwalla ulita kle ngwadige, kaire guardia u gerungwa Chube ole mananga ngle kle ne ngwadi, Judas-Iscariote chku kwian e ulita kle ngwadi gire Judas-Iscariote gerudu ama ulita ole be age giti, ama gerudu: —Cha ta ba ulita chudaboakalin Jesu gai gwangeda, cha ñage ba ulita dbe Jesu kle ngwadi ene ba ulita ñage ama gai.

⁵Judas-Iscariote gerudu ene kwian chugagwalla e ulita ole gire ama ulitadi nga jo chke suga noare, ama gerudu Judas-Iscariote ole: —Ba be cha chudaboi giti cha be igi ngle kete bage ba Jesu kete chage ñanale.

⁶Judas-Iscariote gerudu ama ulita ole: —Nobi cha alin, cha be ba chudaboi. Judas-Iscariote gerudu ene gire chui ege gwangerugu ama kledu kote Jesu ole Jesu gdea tke baini Jesu be kle gballa sugekare kwian nglege gire ama joge kwian Jesu dollale ole Jesu gai.

⁷Pan me dodadre levadura ole gute chuia chku, chui ege kwian israelita ulita bda cordero gweda gutadale Pascua chuia ollade.

⁸Chui e chku gire Jesu gerudu Pedro ole Juan ole: —Joga bligda dodade che ulita alin gutadale Pascua chuia ollade ule.

⁹Pedro, Juan geru kadu Jesuge: —¿Baini ba takalin cha joge bligda dodade? ¿Che be blire baini?

¹⁰Jesu jaindunga: —Ba joge una Jerusalénge, una ege kwian onbre gdaite be skwen bage chi dbe lle chi tkangwage, ba joge kwian onbre e nate baini ama be joge chke gude ngwadi,

¹¹gire ba gerule kwian u mauña ole: “Cha tkanga tangle geruge cha kagu aini geru kade bage nga giti blingwa, ¿baini nga kle biale cha tkanga tangle alin blire ule geru jwannga amage ulita ole Pascua chuia ollade?”

¹²Ba gerule ene u mauña ole gire ama be nga kweri dodabale ngaña gwa u amanuge kaite bage, nga e be kle litaba trate ulita gbaba biale. Ne ngwadi ba bligda dodade che ulita alin gutadale.

¹³Jesu Pedro kaire Juan ta gbu ene gire Pedro, Juan jo una Jerusalénge. Ama boke jo chke una ege gire lle ulita skwendu boabale Jesu gerudu kare ama ole. Ne ngwadi Pedro, Juan bligda dodadu gutadale Pascua chuiage Jesu ama kagu kare.

¹⁴Bligda kle biale gire Jesu jo u bligda dodadre ngwadige, Jesu toidu dba blire ule kwian geru jwannga amage gdataboko giti gdaboke ole.

¹⁵Gire Jesu gerudu kwian geru jwannga ulita ole: —Cha tadu tanre Pascua chuia ai ollade ule ba ulita ole ngeru cha be jogedage.

¹⁶Cha gerule ba ole, nege cha kle blire bdagli ba ole Pascua chuia ollade, cha mi Pascua chuia ollade dare ule ba ole nga dba ai giti nege gwangerugu. Chui bdagli be chke gire Chube be cha gbe gerule kwian ulita giti kwian Chugagwallale, chui ege che be kle ule ulita nakwaite.

¹⁷Jesu gerudu ene kwian geru jwannga ulita ole gire Jesu chi jangwa gau kote uva chia ole, Jesu gerudu Chube ole uva chia giti: “Cha Ñenua, noare ba uva chia ai ketu cha ulitage jadale.” Jesu gerudu ene Chube ole uva chia giti gire ama chi jangwa uva chia ole ketu kwian geru jwanngage jadale, Jesu gerudu: —Ba uva chia ai girabate modi ulita.

¹⁸Cha geru kete bage, nege alin cha kle uva chia jai ba ole ule, agwa nege gwangerugu cha mi kle ba ole dare ba gatedi uva chia jai ule nga dba ai giti. Chui bdagli be chke gire Chube be cha gbe gerule kwian ulita giti kwian Chugagwallale, gire chui ege cha be uva chia jai nakwaite ule ba ole.

¹⁹Jesu gerudu ene geru jwannga ulita ole gire Jesu pan gau kote gerudu Chube ole pan giti: “Cha Ñenua, noare ba pan ai ketu cha ulitage gutadale.” Jesu gerudu ene Chube ole pan giti gire Jesu pan skutunga ketu kwian geru jwannga kaire kairege gutale, Jesu gerudu: —Pan ai cha uda kare, cha ketabe gwaleda ba ulita giti, ba blire ai kare cha talla ole diali, ene ba tachke chage, ene ba mi ta jogengwa cha agedu giti ba alin.

²⁰Jesu blidu ulita kwian geru jwannga ulita ole, gire Jesu gerudu kaire uva chia giti: —Uva chia ai cha be kare, ba uva chia jai cha talla ole diali, ene ba ulita be tachke cha bege cha jogeda giti ba ulita alin, cha jogeda giti be suge trate ba ulitage Chube kle geru jagere gbe ba ulita alin.

²¹Jesu gerudu ene gire gerudu dare: —Cha gerule ba ulita ole, onbre gdaite be cha kete gwaleda, ama kle aini ule toiba dba blire cha ole.

²²Cha chiu nga dba ai giti kwian kare, ulia cha ketabe boadale daga ngwale gwaleda Chube nu geruba kare unsuialin. Agwa onbre bai be cha kete boadalenga daga ngwale gwaleda, onbre e be boi dageare daga ngwale tanre, ama be cha jia chuge kweri.

²³Jesu gerudu ene gire kwian geru jwannga geru kadu modi ulita: —Che ulita gdataboko giti gdaboke kle aini Jesu ole, ¿che ulitage bai be age ene Jesu dollale? ¿Bai be Jesu kete gwaleda?

²⁴Kwian geru jwannga geru kadu modi ene, gire ama ulita mo ka dodaduda ongoru ongoru, ama gerudu modi: —Che ulita kle chage diali Jesu ole, ¿bai chege ma no ma kweri kwian na ulita gwa giti?

²⁵Jesu kwian geru jwannga ulita keruchugu gerule ene modi gire Jesu gerudu: —Bage uñale nga ulita nga dba ai giti kwian chugagwalla ulita kle kwian kage age chugagwalla takalin kare, kwian agedale ulita chugagwalla kle gerule kare, kwian chugagwalla kle kwian kage age chugagwalla takalin kare, ene chugagwalla suge moge kweri, ama mo ka gbe: “Cha kwian ulita chudaboanga noare.”

²⁶Agwa ba ulita me ñage tañachuge kwian chugagwalla nga dba ai giti ulita kle tañachuge kare, ba tañachugadale nganake. Kwian bai ma kweri ba ulitaske, kwian e mo gbadale ma soli, kaire kwian bai daba kaganga ama mo ta gbadale daba chudaboi no.

²⁷Kwian ulita tañachuge kwian toiba dba blingwage kwian e ma kweri kwian bligda ketangage. Ba me ñage tañachuge ene, ba ulita tañachugadale cha kle tañachuge kare, cha kle chage nga dba ai giti age no kwian ulita alin kwian ulita chudaboi, cha me kle kwian kage age no cha alin cha chudaboi, agwa cha ta agekalin mo tale no kwian ulita chudaboi.

²⁸Kwian tanre agedu me no cha ole, agwa ba ulita chagedu ule cha ole ba me cha chugu ngwadi gballa,

²⁹malen chui bdaglige cha be ba ulita gbe kweri daba chugagwallale. Chui ege cha Ñenua Chube be cha gbe gerule nga ulita giti kwian ulita Chugagwallale, chui ege Chube gwa giti cha be gerule kwian nga ulitamu giti bai jiske Chube gwage bai me jiske Chube gwage. Ene kaire chui ege ba ulita be kle ule cha ole cha be ba ulita gbe daba chugagwallale ule cha ole gerule kwian ulita giti, cha be ba ulita gbe ba bitalla ulita israelita mne gdataboko giti gdaboke chugagwallale gerunga kwian e ulita giti bai jiske bai me jiske Chube gwage.

³¹Jesu gerudu ene kwian geru jwannga amage gdataboko giti gdaboke ole gire gerudu Simón alin ole allabi sugekare: —Simón, ba cha keruchuge, cha gerule ba ole. Satanás ta ba ta gbakalin joge siere cha geruage salengwli kwian trigo kwara batenga batekwa giti kare ene trigo kwara joge siere trigo taglage. Satanás gerudu Chube ole: “Cha ta mo chugakalin Simón ole kaire kwian geru jwannga na ulita ole, ene ama ulita be mo ta blite joge siere ba geruage.” Chube be Satanás chuge ngwadi mo chuge ba ole.

³²Gire cha gerudu tanre ba giti Chube ole: “Cha Ñenua, cha takalin ba Simón ta gbe chage no cha alin ole diali me mo ta blite Satanás ole. Ba kira kete amage, ene ama mi joge siere cha geruage.” Cha gerudu ene Chube ole ba giti. Uñale chage ba be mo ta blite sugeti Satanás ole, gire bigwa ba be tachkeni chage, ba be mo ta bliteni cha ole naskuni gire ba geru jwannga na ulita chudaboadale chage no kiraske diali cha geruage.

³³Simón gerudu Jesu ole: —Cha Chugagwalla, cha mi ba chuge ngwadi dale, cha kle biale joge ule ba ole skage, me joge skage alin allabi ba ole llagli agwa kaire cha mo ta gbe jogeda ule ba ole.

³⁴Jesu gerudu: —Pedro, cha gerule ba ole, nege ngajrege ngakamalin bdugu antalan bebi ngwane gire ba agali be gerule bitamai kwian na ole ba me cha uñe.

³⁵Jesu gerudu ene Simón ole gire Jesu gerudu kwian geru jwannga gdataboko giti gdaboke ulita ole: —Bitaite cha ba kagu Chube gerua trage kwian ulita ole kaire kwian oga dodade. E suiale ba me jo gde dbe ba me jo igi dbe ba me jo zapato giti, ¿ba chagedu no o ba me chagedu no? Kwian geru jwannga ulita gerudu: —Cha chagedu no.

³⁶Jesu gerudu: —Nege ba age nganake, ba bai gde molen ba gde dbe, ba bai igi molen ba igi dbe, ba bai me sbadi molen ba camisa chbade camisa ñanalla giti ba sbadi gige dogda.

³⁷Chube gerua degaba unsuialin gerule cha giti, chada e gerule: “Kwian be gerule ama kwian me no, kwian be ama gbe jiske kwian me no kare, ama gwabeda kwian me no ole ule.” Cha boabe ene ulia, cha be boi ene chuia kle kodi chada degaba unsuialin gerule kare.

³⁸Kwian geru jwannga ulita gerudu: —Cha Chugagwalla, sbadi dogda gaboke kle ai biale. Jesu gerudu: —E nobi, che mi gerule dare e giti.

³⁹Jesu gerudu ene kwian geru jwannga amage ulita ole gire Jesu jo siere ama kledu ngwadige jo Ngwiskinro Jwichugallage ule kwian geru jwannga ulita ole, jwichuga ege Jesu kle joge diali gerule Chube ole.

⁴⁰Jesu jo chke jwichuga ege nga e Jesu kle joge kare ngwadi, gire Jesu gerudu kwian geru jwannga ulita ole: —Ba ulita gerudale Chube ole mo chudaboi kade amage, ene ba me ta jwlite joge siere chage age me no.

⁴¹Jesu gerudu ene gire Jesu jo sugekare kwian geru jwanngage bateno ke mlie ke jange mangire batre ngwadi, eni Jesu jo chke dba jongnagwa giti gerule Chube ole.

⁴²Jesu gerudu: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ba takalin ba ñage cha jwen siere cha be boi tirarege. Agwa ba age cha alin mo tale ba takalin kare, me cha takalinge kare.”

⁴³Jesu kledu gerule ene Chube ole gire lle boanga Chube alin nga ngaña giti chku Jesudi Jesu kira gbe.

⁴⁴Jesu kle tañachuge tanre ama be boi giti, ta olire tanre ole Jesu gerudu ma no mno dare Chube ole mo kira gbe ama be boi giti gire Jesu gwingwa jritedu salengwli be kle chie be kle joge dba dbiske kare.

⁴⁵Jesu gerudubi Chube ole, Jesu chku gdate, Jesu joni kwian geru jwannga kle manade ngwadi. Jesuge kwian geru jwannga skwendu gbe, kwian geru jwannga ta olire ole ama skwatigu ama gbedu.

⁴⁶Jesu gerudu: —¿Mineade ba ulita kle gbe? Chke bduge gerule Chube ole, ene ba me ta jwlite joge siere chage age me no.

⁴⁷Jesu kle gerule ene kwian geru jwannga amage ole gire kwian geru jwannga Jesuge na gdaite kada Judas-Iscariote chku kwian ngle dbe ule Jesu kle ngwadi. Judas-Iscariote jo chke Jesudige Jesu sobadadale, ene chke uñale kwian Jesu dollage Judas-Iscariote giti e Jesu, ene Jesu dolla ñage Jesu gai.

⁴⁸Jesu gerudu Judas-Iscariotege: —Judas-Iscariote, cha gerule ba ole, Chube cha kagu nga dba ai giti kwian kare, ¿nege ba kle mo ta gbe cha sobade ketadale gwaleda kwian agenga me noge?

⁴⁹Kwian geru jwannga ulita kle chage Jesu ole gwagedu Judas-Iscariotedi age ene Jesu ole gire sugedu ama ulitage Jesu be boi daga ngwale, ama ulita tadu Jesu chudaboakalin malen ama ulita geru kadu Jesuge: —Cha Chugagwalla, ¿ba takalin cha kira bate ba dolla ai ulita ole sbadi giti?