LUUKA 1:3-11

³a’di ṯoshka/ ki a’di ’boro’d gom aha/ si’da/ mo mmobaṯẖa aris to gwansan ki ’dishe/ mo haali/ goma cim gunn isa gush mo mmo’kwar uni ka roṯẖam p̱o/ mo gom /e mo /e jin tana Ṯẖawup̱iilus jin ta jim ’borga/ mo

⁴ki /e mini mish gwoŋ gana/ mo gom gwo gi to gwansan kun ṯorkunu /e mo be.

⁵Dhali ka tee ma Hirodus jin ta’da maliḵ gi Pa Yahuudiyya mo tani agasiisa kamu/ diki’d mo jin yuḵu gway ka Sakariyya mo. A’di ta’da awaḵ ’peni ’kwani ma Abiyya mo. Dhali a’di ta’d gi ashim piti ’peni i’bwa/ ma Haruun mo dhali gway ma yim yuḵu ka Ilisabaaṯ mo be.

⁶Dhali uni su/ mmonṯal ’de/ mo tani ta kuŋ ḵar/e mo ibwambor ma Arumgimis mo mmomii gwoŋḵan jin ’kwarkunu ’baar mo dhali a’di jin ona gwoŋḵan gi Tap̱a mo ki dar gi miiwaḵ mo be.

⁷Hili uni dar ga ’ci mo haali/ Ilisabaaṯ a’di ta’da burum mo dhali uni su/ cakin ki yil mo be.

⁸Dhali ki a’di di’d mo mmomiiya ṯu’c ma gasiis ibwambor ma Arumgimis mo ka waḵ piti ’kon aṯu’c mo tani

⁹isi me’d mii ma gasiis mo tani to biṯki’da p̱o/ a’di mo, to jin biṯu mo jin mina a’di cic̱ e gu’b gi mondheleladhelel gi Tap̱a mo dhali duḵa ’bicajwahar mo be.

¹⁰Dhali awaambuhany ’kwani ’baar mo ’kokina pije/ mo mmo’tho mo ka tente/ jin duḵuwa ’bicajwahar mo be.

¹¹Dhali aman’doyu gwo gi Tap̱a piki a’di i is mo mmodosh ki ’bana bim poros ma gwaṯa/ jin duḵuwa ’bicajwahar mo.