Luuka 1:10-60

¹⁰N'oofiya wakathi wookhoza ovupa, atthu ooshi apale aari vaje aari ovira alompaka.

¹¹Aphano nlayikha la Mbwana khunteela Zakariiya nkhono-nlume vaalitaari onkhoziwaavo ovupa.

¹²Wakathi ye ooniyeevo nlayikha ntthile, khwiiya wooshanka na wa woova channu.

¹³Nlayikha khumuuza yoori: “Ohoove Zakariiya! Nnyizinku asiila lompa yawo; muukhaawo Elizabeeti onteela ompattha mwaana. Weeyo onteela ontthaja nzina la Yaahaya.

¹⁴Ye onttela wiiya furaha yootuveliwa wawo, atthu a waatta anteela ofurahela ovokoliwa wawe,

¹⁵maana ye onteela wiiya nttunkhulu mmakhono wa Mbwana Nnyizinku. Khanteela onywa viinyu wala onywa vitthu zoohapala. Onttela wiiya wa wiitaazaniwa Rooho Ttakatthiifu ari mwiirukulu wa mamaawe.

¹⁶Onteela owaatana atthu awaatta a Ezirayeele wa Mbwana Nnyizinku aya.

¹⁷Onteela operekhiwa ti Mbwana na onttela wiiya wookhomaala na woowahi nkhama napiyu Aliyaasi, yoori azukulise rooho za apaapa eeyane osiilana na aanaaya, na yoori awaazukuluse anamakhijili eettettise haakhi, toowo phi anttelaavo ozukulisa rooho zaya yoori ampokherele Mbwana ataaka.”

¹⁸Aphano Zakariiya khuuzela nlayikha ntthile yoori: “Kinteela ohakikhi toovi etthu yaya eto? Miiyo kooluvala na muukhaaka ooluvala.”

¹⁹Khujipu nlayikha liraka: “Miiyo ki Jipiriilu, kiniiya vamote na Nnyizinku, akiruma yoori kite kiwuuze hapari epi zooshapweya.

²⁰Wiiya khukhupaleeni mattakhuzi apa kiwuuziyeezo, onttela wiiya woohittakhuli mpakha siikhu zinttelaaye orettikhana vitthu epi. Zinteela orettikhana wakathi aya otthuupo.”

²¹Nalelo atthu aari onwejaaye Zakariiya khushanka mwaasa woorupaza Nnyupa wa Nnyizinku.

²²N'oosaruwa, khuhisala awahi ottakhulana atthu apale. Yo khujuwa yoori wanteeliye wahayi Nnyupa wa Nnyizinku. Khwiiya woohittakhuli khusala attakhula na makhono.

²³Wakathi eeshisiyeevo siikhu zookhola khaazi z'oottunkhulu wa Nnyupa wa Nnyizinku, khurutela owawe.

²⁴Paata ya toole, muukhaawe Elizabeeti khwiimittha, khuhisala asaruwa nnyupa mpakha nyeezi mithaanu.

²⁵Khuri: “Aphano Mbwana ajipu lompa yaka, eeshisa haaya etile kaariina na atthu.”

²⁶Mweezi wasiitha wa erukulu ya Elizabeeti, Nnyizinku khuruma nlayikha Jipiriilu olawa sitati ya Kalileya nti wa Nazareeti

²⁷yoori lilawe wa mwaari mmote woohijansiliwi aari wiitthiwaaye Mariyamu, aaposiweeyo ti shapu mmote aari wiitthiwaaye Yuusufu woojama wa mfwalume Daawuuda.

²⁸Nlayikha ntthile n'onsikana khumuuza yoori: “Heeri yiiye vamote na-weyo Mariyamu! O wooziti oshapweyiwa, Mbwana ori vamote na-weyo.”

²⁹Ye khwiiya woozinkireya mwaasa wa mattakhuzi apale, khuvira aphelelezaka maana a hapari zaya epile.

³⁰Nlayikha khurutela omuuza liraka: “Ohoove Mariyamu, wapattha rehema omaasho wa Nnyizinku.

³¹Onteela wiimittha ompatthe mwaana wanlume ontthaje nzina la Yinsa.

³²Ye onteela wiiya nttunkhulu, nka eetthiwaka Mwaana wa Nnyizinku Nwulu wa Pinkuuni. Mbwana Nnyizinku onteela omwinkha ofwalume wa papaawe Daawuuda.

³³Na onteela wiiya mfwalume wa Ezirayeele khwa mileele, ofwalume awe khunteela wiisha.”

³⁴Aphano Mariyamu khuuzela nlayikha yoori: “Zinttela orettikhana toovi na miiyo akininjuwa nlume?”

³⁵Nlayikha khujipu liraka: “Rooho Ttakatthiifu ontta owiishukhela, owahi wa Nnyizinku Nwulu wa Pinkuuni onttela wuufinikha na mwiivuuli awe. Ti eto Mwaana onttelaaye ompattha, onteela wiitthiwa Ttakatthiifu, Mwaana wa Nnyizinku.

³⁶Omoone jamaayo Elizabeeti, otule yaari oriwakaaye khanvokola, ila apha na wuuluvala wawe nasaapi eti eemittha opu mweezi wasiitha.

³⁷Maana, mmakhono wa Nnyizinku khayiivo etthu moote ehinwaheyaaye.”

³⁸Mariyamu khuri: “Kiri raati miiyo karumeya wa Mbwana; mattakhuzi apa onlupaaye phi arettikhane khwa miiyo.” Nlayikha ntthile khulaavo khulawa.

³⁹Ziviriyeevo siikhu, Mariyamu khujilokotthela khusala alawa na waakuva sitati moote yaari nti wa nnyaako za Yudeya.

⁴⁰N'oofiya khuvira nnyupa owawe Zakariiya khunchelisa Elizabeeti.

⁴¹Ye n'oosiila mwacheliwa etile ya Mariyamu, mwaana aari mwiirukulu mwawe khujisakhinya. Elizabeeti khwiiya wa wiitaazaniwa Rooho Ttakatthiifu.

⁴²Khukhuwa na kuvu araka: “Wooparikhiyiwa ti weyo Mariyamu vakatthi wa aakha, na wooparikhiyiwa mwaana oto ariiye mwiirukulu mwawo!

⁴³Miiyo ki paani wooteela wooniwa ti maama wa Mbwanaaka?

⁴⁴N'oosiila mwacheliwa yawo, mwaana ariiye mwiirukulu mwaka eetta ojisakhinya wafurahavo.

⁴⁵Wooparikhiyiwa ti weyo okhupaliyeeyo yoori anteela orettikhana mattakhuzi apa wuuziweeyo a phantte ya Mbwana.”

⁴⁶Aphano Mariyamu khuri: “Nafusi yaka enlaleya owula wa Mbwana,

⁴⁷Rooho yaka ti yomfurahela Nnyizinku namuusuru aka,

⁴⁸mwaasa yoori Ye akuupuwela miiyo karumeyaawe woohiitaali mmaasho. Waaza attaapha, peewu za atthu ooshi zinttela okiittha yoori muukha wooparikhiyiwa,

⁴⁹mwaasa yoori Nnyizinku Woowahi aretta vitthu khuluzeene muuhaayi mwaka; nzina lawe ttakatthiifu.

⁵⁰Ye oniwaahurumiya atthu a peewu zooshi apale animoovaaye.

⁵¹Aretta vitthu khuluzeene na makhono awe, khuwaamwaza apale oojikhupali khwa shawuri za nroho mwaya.

⁵²Awaalaza afwalume ohaakhimu aya khuwaalansa atthu apale oojipushuwisa.

⁵³Aweetaaza vitthu apale ariina jala, na khuweekara mathaajiri makhonoru.

⁵⁴Amwaawuni karumeyaawe Ezirayeele, oopuwelaka huruma aarinaaye

⁵⁵na Eburahiima na peewu yawe khwa mileele, nkhama etthiipo aawooziyeezo amarehemu apapazetthu.”

⁵⁶Mariyamu eekhaliye nyeezi mittatthu wa Elizabeeti nawiisha khurutela owawe

⁵⁷Khufiya wakathi wa Elizabeeti opattha ekumi, khunvokola mwaana wanlume.

⁵⁸Anamwaattamanani awe na ajamaaze khusiila elupiwaka huruma khuluyeene Mbwana amooneliyeeyo Elizabeeti, khulawa khufurahi vamote na-ye.

⁵⁹Efiiyeevo siikhu yanaane, mwaana otule khulawa khukhiriyisiwa khusala atakha otthajiwa nzina la papaawe Zakariiya.

⁶⁰Ila mamaawe khujipu araka: “Ii wala! Nzina lawe linttela wiiya Yaahaya.”