Lucas 1:10-60

¹⁰Deus ety odaji egawândyly myakâwâm se satuby tyânrângueim modo iaduânse. Ilâ iaduântay mykâinane kuoho kurâ domodo Deus agâ aguely.

¹¹Aituo myakâwâm anju kaynâpa âetyby Zacariasdâ âepanâguely. XYDYK warâ myakâwâm, mesa se satuby tyânrângueim iaduânto sahoru eynynâ.

¹²Mâkâ tientuo myakâwâm Zacarias toenzepa âseanedyly. Âda tâidyly nutuba idyly.

¹³Aituo myakâwâm anju aguely eyam: — Tâseanezeba ikâ, Zacarias. Deus amyguely nidatai. Mâenkadyby ara aiese lelâ. Âwydy adamyze lelâ. João kelygue ise mâenzetâdyly-ro warâ.

¹⁴Toenzepa ise iazeduo mohomaendyly, kurâdo ohomaenze lâpylâ warâ.

¹⁵Deus xurâem, uguondo tywyneim ise mâkâ. Vinhu enynri keba, toku ikaji ini keba warâ ise mâkâ. Niazepa awyly umelâ ise Deus Ispiritury Koendonro eagâ awyly.

¹⁶Israelita domodo Kywymâry Deus nheinwântoem aienehonze warâ.

¹⁷Kurâ domodo koendâ iese Kywymâry sainto iray. Deus itaumbyry egaturin-em iesemo warâ. Deus Ispiritury myakâwâm Elias eon-honru tuduze, myara ise âmery agâ awyly, tâjimery modo tunwym agâ koendâ itoem aiese. Deus einwântânrybyry modoram, Deus einwânehonze. Warâ ise Israel donro modo koendâ nhedyly, Kywymâry saindyly iray — kely myakâwâm anju Zacariasram.

¹⁸Aituo myakâwâm Zacarias aguely anjuam: — Xina nimezewâbyra ise! Agaityoem urâ, aripiem ywydy warâ! — kely.

¹⁹Aituo myakâwâm anju aguely: — Gabriel urâ. Kopaelâgâembaba Deus agâ wawyly emaryem. Mâkâlâ âyam ugononi, xirâ unâ iwâkuru auguehoem.

²⁰Auguely mâinwâmpyra wâne âmâ, aito odaxi ituo olâ auguehobyry aise. Mâinwâmpyra matobyry wâgâ âmery iazeho odaxi ise tytaremba mawyly — kely.

²¹Xunâgumo ume toenzepa myakâwâm kurâdo âtâdyguybyem awyly kuoho, Zacarias egasely inwânwânse. Âjigue aguelymo: — Iweâpa idyly enra Zacarias se satuby iaduântodâ — kelymo.

²²Egaseybyem agueze kewâdyly wâne eagâmo; tytaremba itybyem lelâ. Tâmaryguelâ egatuze kewâdyly târâ adâitobyry. Aituo myakâwâm aguelymo: — Deus gâlâ awâkânra târâ se satuby tyânrângueim iaduântodâ nâepanâgueagui — kelymo.

²³Deus ety oday tâwanu ewanikeimbyryem myakâwâm Zacarias tâtyram idâly.

²⁴Iweâpa nipyralâ myakâwâm iwydy Isabel adamyly. Cinco nunâ ara lelâ myakâwâm âdyam negaseba awyly.

²⁵Alâ mykâinane tyangahu oday xunâgu: — Koendonro lelâlâ awâkâ Pymâ Deus urâem! Awylygue iwerâ kâpybazebyra wawyly, tymegue wawylygue; ânguy unâguebyra ise warâ — kely.

²⁶Seis nunâ Isabel adamybyem awyly ume myakâwâm, Deus tâmary anju ingonodyly unâ enese xidadâ imeimbyry Galiléia donro Nazaréram. Gabriel myakâwâm mâkâ Deus emary ezedy.

²⁷Mariaram myakâwâm Deus itaumbyry nhadyly. Âwynsaundo myakâwâm mâkâ, ânguy nhuniby keba, José agâ ohogüinrim kehobyry, pymâ Davi iwerypyry agâ.

²⁸Aituo myakâwâm anju Mariaram idâly, aguely: — Tuomare ikâ, Maria. Kywymâry Deus agâlâ, koendonro âmâem adientoem — kely.

²⁹Anju aguely tindatuo, Maria âpaunzedyly âda tâidyly nutuba idyly, âseguâdâdyly. Âdakeze mâkâ aguely tiuntudyze. — Âdaituoka arâ amyguely? — kely.

³⁰Aituo anju aguely: — Tâseanezeba ikâ, Maria — kely. — Deus induakeyby âmâ, koendâ kehoem nhetoem — kely.

³¹— Adamyze âmâ. Jesus kelygue ise âmery mâenzetâdyly.

³²Aunlo kulâ keba ise mâkâ, uguondoem ituo. “Deus ton-honreim imery” ise mâkâ. Pymâem ienehonze Deus. Tydamudo Davi pymâem atobyry ara ise âmery pymâ tâgarein-em awyly — kely.

³³— Jacó iweompyry modo iwymâryem, enimoem warâ lâpylâ ise. Aunlolâ ise pymâem awyly, typygueim keba — kely.

³⁴Aituo Maria anjuram aguely: — Âdaraka ise awârâ aidyly? Âdykâ mawânkâ uguondo ynanâbyra — kely.

³⁵Aituo anju aguely: — Deus Ispiriturygue ise madamyly. Deus tâgareim Ispiritury onwa âese âmezehoem. Awylygue ise iamudo iazeim “Kywymâry Deus Imery” kelygue ezeku. Deus imery tawylygue ise, Deus ize ato lelâ anhekyly — kely.

³⁶— Âpemugu Isabel agâ aityby enanâguegâ. “Nimezewâbyra ise awâkâ” kehobyry mâkâ. Iwerâ olâ aripienlâ tymegue, seis nunâguetogue.

³⁷Âdy adiendyse tato adyese lelâ Deus — kely.

³⁸Aituo Maria aguely: — Âdy Deus aidyse ato tâwâlâ ise yagâ anhedyly ize tato aralâ — kely Maria. Maria aguepygueduo anju odopâdyly Deus eydâ atoram.

³⁹Iweâpa nipyralâ Maria ohondyly, xidadâ imeimbyry iwy donroram Judéia yan-yam tâtâhoem, Zacarias, Isabel warâ etyram.

⁴⁰Saintybyem, egawândyly. Typemugu Isabel nhedaenkuly.

⁴¹Maria, Isabel nhedaenkudaylâ myakâwâm Isabel ioday iamudo âjitâgüily. Deus Ispiritury Isabel enomery nhuduly, waunroem aitaynrim modo wâgâ aguehoem.

⁴²Aituo Isabel aguely Mariaram: — Deus induakeyby âmâ pekodo modo enday, koendâ kehoem nhentoem, iamudo iazenri lâpylâ koendâ kehoem tientoem warâ.

⁴³Odaypa iazeim iamudo ise ton-honreim kuru, ymery takaze kehoem. Tuomare olâ urâ, âmâ Kâmakerim ise ietyram mâetobyry wâgâ.

⁴⁴Iedaenkuly tindatuo, iamudo niomazeagui woday, nâjitâgüiagui warâ.

⁴⁵Tuomareim lelâlâ âmâ, Deus koendonro âmâem anhetobyry wâgâ; warâ kehobyry tâinwânse mawylygue — kely Isabel Mariaram.

⁴⁶Aituo Maria aguely: — Ywymâry Deus koendonro awyly wâgâ tunâgue urâ yangahu oday.

⁴⁷Iemakerim mâkâ. Toenzepa womaru.

⁴⁸Âdy mâkeba urâ, ienanânehomba olâ keankâ. Iwerâma ise idânârâ aguelymo: “Koendonroem Maria awyly Deus xurâem, Deus aguehobyry ara aitobyry wâgâ” kelymo ise.

⁴⁹Ton-honreim lelâlâ awâkâ Deus; koendâ kehoem iedyly. Koendonro lelâ aieni awâkâ.

⁵⁰Koendonro tawyly tânehonze idânârâ âwankuem tyetânry modoram, adaguhobyrylâ, xypyryam kehoem warâ.

⁵¹Toenzepa ton-honreim awâkâ. Tâwâlâ kulâ tywâgâ koendonroem tawyly aguewâni modo tainze Deus.

⁵²Ton-honruneim modo ton-honremba tyese, ton-honrenry eon-honru tuduze warâ.

⁵³Âdy pebaom modoram âdy koendonro modo tuduze Deus. Âdypeom modo olâ âdy peba tyese.

⁵⁴Xina nâzemakeo. Israelita domodo agâ koendonroem tawyly adâkehobyry nenanânehomba Deus.

⁵⁵Iweâpa myakâwândy aguely tako Abraão agâ: “Koendâ ise urâ agâ, âweom agâ warâ” kewândymy. Adâkehobyry anhedyly — kely Maria.

⁵⁶Azagâ tokalâ warâ nunâ lelâ Maria, Isabel agâ awyly. Ilâpyryem tâtyram odopâdyly.

⁵⁷Alâ Isabel âjihuadâdo odaji idyly. Uguondo imeimbyry iazely.

⁵⁸Ety iwaguepaom modo, ipemugudo warâ imery iazehobyry egary indadylymo. Awylygue, Deus, Isabel agâ koendonroem kuru awyly nhutulymo. Idânârâ nhomaendylymo eagâ.

⁵⁹Iamudo iazehobyry tokalâ semana ipygueduo, âtybe myakâwâm ezedy xuduho, ilery ety iopiry satâho warâ. Mâkâ uguondo imeimbyry ilery ety nhatâlymo, judeuem awyly xutuhoem. Tonlo modo wâne Zacariasgue tienzetâdyze awylymo, nhunwym ezedyguelâ.

⁶⁰Aituo iamudo ise aguely: — “João” ise ezedy — kely.