Luuka 1:10-60

¹⁰Fewndo on saa'i ittugol sadaka urngallooji, tawi jamaa on fow no juula ka yaasi.

¹¹Ko fewndo on saa'i malaa'ikaajo Joomiraaɗo on feeɲani mo, no darii ka ɲaamo ittirde sadaka urngallooji.

¹²Ɓay Zakariyaa'u yi'ii on malaa'ikaajo, o ɗenƴii, o huli.

¹³Kono malaa'ikaajo on wi'i mo: «Wota a hulu, yo Zakariyaa'u, ko fii toraare maa nden jaɓaama. Sonna maa Elisabaatu jibinante boobo gorko, a innay on Yaayaa.

¹⁴O wonane welo-welo e weltaare, awa kadi yimɓe buy weltoray jibinegol makko,

¹⁵sabu o wonay aaden mawɗo yeeso Joomiraaɗo on. O yaroytaa njaram mandilinayɗan e kala ko caakinta. *Ruuhu Seniiɗo on wonoyay e makko gila ka teege yumma makko,

¹⁶awa kadi o artiroyay *Banii-Isra'iilayankeeɓe buy e laawol Joomiraaɗo on, on Alla maɓɓe.

¹⁷O yaaray yeeso Joomiraaɗo on e nder ruuhu e doole wa Iiliiya, fii no o artira ɓerɗe baabiraaɓe e telen-ma ɓiɓɓe mun, o artira murtuɓe ɓen e telen-ma faamu feewuɓe ɓen, e fii no o eɓɓirana Joomiraaɗo on jamaa hebulaniiɗo mo.»

¹⁸Zakariyaa'u wi'i malaa'ikaajo on: «Ko honno ɗun henirantammi? Ko fii mi nawyii, awa ɓeyngu an kadi wonii nayeejo.»

¹⁹Malaa'ikaajo on jaabii mo: «Ko min woni Jibriilu, darotooɗo takko Allaahu on. Ko mi imminaaɗo fii yewtugol ma, humpite oo kibaaru moƴƴo.

²⁰Jooni, a mbobiɗay, a waawataa wowlude ɗoo e ɗun laataade, sabu a hoolaaki ɗii konguɗi an laatoytooɗi e saa'i happaaɗo on.»

²¹Tawi non jamaa on no habbii Zakariyaa'u, hiɓe jiɓii ko honɗun neeɓini mo ka nder *juulirde mawnde ton.

²²Ɓay o yaltii, o waawaali ɓe yewtude hay fus. Ɓe ndaari, ɓe tawi o feɲɲinanaama ka nder juulirde mawnde ton. O woni e eɓɓirangol ɓe juuɗe, o lutti mbobiɗude.

²³Ɓay ɲalaaɗe makko yottingol sadakaaji ɗen timmii, o yiltitii ka suudu makko.

²⁴Ɓay feƴƴii e ɗun, sonna makko Elisabaatu ƴetti reedu. O suuɗitii e nder lebbi jowi, himo wi'a:

²⁵«E hino ko Joomiraaɗo on waɗanimmi kon, o yeƴƴitike lan jooni, o ittanii lan kaa hersa ka mi wondunoo e hakkunde ɓee yimɓe.»

²⁶Ka lewru jeegaɓuru, Allaahu on nuli oo malaa'ikaajo wi'eteeɗo Jibriilu e ndee saare Naasirata jeyaande e ngal diiwal Jaliilu

²⁷haa e oo jiwo wi'eteeɗo Mariyama, mo gorko wi'eteeɗo Yuusufu jeyaaɗo e bolondaa Daawuuda ƴami.

²⁸Malaa'ikaajo on naati ka on jiwo, wi'i: «Mi salminii ma, an oo yeɗaaɗo sulfu. Joomiraaɗo on no wondi e maa.»

²⁹Ngol kongol jiɓi mo, o miijii ko honɗun e salminaango nii.

³⁰Malaa'ikaajo on wi'i mo: «Wota a hulu yo Mariyama, sabu a heɓii sulfu immorde ka Allaahu on.

³¹Awa a ƴettay reedu, jibinaa boobo gorko, innoyaa mo Iisaa.

³²O wonay mawɗo, o noddiree Geɗal Jom Ɓural on. Allaahu Joomiraaɗo on jonnoyay mo jullere laamu maama makko Daawuuda nden.

³³O laamoyto suudu Yaaquuba ndun haa poomaa, awa kadi laamu makko ngun lannataa.»

³⁴Mariyama wi'i malaa'ikaajo on: «E ko honno ɗun laatorta, ɓay mi andaali gorko?»

³⁵Malaa'ikaajo on jaabii mo, wi'i: «Ruuhu Seniiɗo on aray e maa, bawgal Jom Ɓural on ɗuwirte ɗowdi mun ndin. Ko ɗun si boobo *seniiɗo heɓoyteeɗo on noddiroyte *Ɓiɗɗo Alla.

³⁶Jooni non, Elisabaatu oo musiɗɗo maa ko sowiiɗo, o sowike kanko kadi e nder nayeewu makko boobo gorko. On wi'anooɗo jiidotaako no e nder lewru jeegaɓuru mun

³⁷sabu alaa ko Allaahu on ronki.»

³⁸Onsay Mariyama wi'i: «Min ko mi korɗo Joomiraaɗo on. Yo woniranan wano wiiruɗon non.» Onsay malaa'ikaajo on yahi.

³⁹E nder ɗen balɗe ɗon, Mariyama immii no heɲii yahugol e saare goo ka hoore pelle e nder ndii leydi bolondaa Yahuuda.

⁴⁰O naati ka suudu Zakariyaa'u, o salmini Elisabaatu.

⁴¹No Elisabaatu nanirnoo salminaango Mariyama ngon, ɓiɗɗo makko on memminii ka nder reedu makko, kanko Elisabaatu o heewi Ruuhu Seniiɗo on,

⁴²o ewnii ko tiiɗi, o wi'i: «An ko a barkinaaɗo e hakkunde rewɓe ɓen, awa kadi ɓiɗɗo mo saawuɗaa on ko barkinaaɗo!

⁴³E ko honno mi newniranaa yo yumma Koohoojo an on seeno ka an.

⁴⁴No hito salminaango maa ngon naatirnoo ka noppi an, boobo mo mi saawi on memminii weltaare ka reedu an.

⁴⁵On hooliiɗo ko Joomiraaɗo on fodi ɗun kon ko laatotooɗun, haray ko malaaɗo!»

⁴⁶Onsay Mariyama wi'i: «Wonkii an kin no manta Joomiraaɗo on.

⁴⁷Ruuhu an on no weltanii Allaahu on, on Dandoowo lan,

⁴⁸ɓay o liiƴii giiɗe makko ɗen e ndee lo'ere an min oo korɗo makko. Ko ɗun waɗi, gila hande kala jamaanu aroyayngu wi'oyay ko mi barkinaaɗo,

⁴⁹ɓay Jom Bawgal on waɗanii lan piiji mawnuɗi, innde makko nden ko hormorteende.

⁵⁰Awa kadi yurmeende makko nden no layude e hoore ɓen hulooɓe mo, gila e jamaanu heɓi e jamaanu.

⁵¹O golliri doole jungo makko ngon golle mawɗe. O saakiti ɓen waɗuɓe e ɓerɗe mun miijooji townitaare.

⁵²O jippini ɓen marɓe doole ka julle mun laamu. O towni lo'uɓe ɓen.

⁵³O harniri weelaaɓe ɓen piiji moƴƴi. O raɗii alɗuɓe ɓen juuɗe mehe.

⁵⁴O faabii *Isra'iila'en, ɓen jiyaaɓe makko. O anditi fii yurmeende makko nden,

⁵⁵wano o fodirnoo maamaaɓe men ɓen e Ibraahiima e jurriya mun on non haa poomaa.»

⁵⁶Mariyama wondi ɗon e Elisabaatu e nder lebbi tati. Onsay o yiltitii ka makko.

⁵⁷Ɓay hewtii ka Elisabaatu jibinta, o jibini boobo gorko.

⁵⁸No kawtalɓe makko ɓen e siɓɓe makko ɓen humpitornoo nden yurmeende nde Joomiraaɗo on yeɗi mo, ɓe weltodi e makko.

⁵⁹Ka ɲallal jeetataɓal, ɓe ari *sunningol boobo on, ɓe faalaa mo innitirde ben makko Zakariyaa'u.

⁶⁰Kono yumma makko ƴetti haala kan, wi'i: «Oo'o, ko Yaayaa o innetee!»