SAN LUCAS 1:10-60

¹⁰Ne laga caguu be gu'xhu ndaani yu'du que, rí jma binni fuera, caní' né Dios.

¹¹Ndaani yu'du que nuu be, mala bizuhuaa ti ángel sti Dios ladu derechu sti altar ra riuu gu'xhu que.

¹²Nabé bidxibi be ora bi'ya be ángel que dede qué idxela be xi guni be.

¹³Peru na ángel que, rabi laabe: ―Zacarías, cadi idxibi lu', purti ma bigaanda stiidxa lu lu Dios. Yanna chi gapa Elisabet xheela lu ti xiiñi', ne cuee lá lu badu huiini que Juan.

¹⁴Zadxá tipa ladxidó' lo de enda nayeche', ne stale tu zieche ora gale be.

¹⁵Nabé nandxó' zaca be nezalú Dios, ne qué zagaa ruaa be vinu ne nin ti clase nisa dxu'ni'. Dede ante gale be maca dxá ladxidó' be de Espíritu Santu.

¹⁶Zudxigueta be stale judíu ra nuu Señor Dios sti ca'.

¹⁷Zazá niru be lú Señor, ne laabe zeda aca be casi Elías purti zapa be Espíritu sti Dios casi gupa Elías ne laca zaca be nandxó' casi uca Elías. Zaguu né be binni xiiñi tobi si, ne zucuudxi be ladxidó' cani naguidxi ladxidó' para uzuuba ca diidxa'. Zacá nga quixhe chaahui be binni para dxi gueeda Señor.

¹⁸Oraque na Zacarías rabi ángel que: ―Ximodo ganna dxandí zaca ni caya'bu naa ri ya', purti ma nayooxhua' ne xheela laca ma nayooxho'.

¹⁹Para na ángel que: ―Naa nga Gabriel, rune xhiiña Dios. Laa biseenda naa gueda tidxe lii ca diidxa sicarú ri'.

²⁰Yanna zieegu ruaa lu', ne qué zanda iní' lu dede ora ma gule badu huiini que, purti qué ñuni cre lu ni gudxe lii ca. Peru zaca ni, ganda si xhi ni.

²¹Cadxagayaa ca binni rí fuera que xiñee nabé candaa Zacarías ndaani yu'du'.

²²Ora biree be bidxiña be ra nuu ca binni que, qué ñanda niní' né be laaca', sínuque puru seña bi'ni be lú ca' purti ma biaana be mudu. Oraque bidii ca cuenta biluí' Dios laabe xiixa ndaani yu'du que.

²³Bizaa si dxi nexhe guni be dxiiña ndaani yu'du', biree be zibí' be.

²⁴Qué nindaa de ngue uca xiiñi Elisabet ne biaana ndaani yoo gaayu beeu, ne na:

²⁵―Bi'ni Dios ndi naa ti ma cadi iní' binni naa.

²⁶Lu xhoopa beeu de naca xiiñi Elisabet biseenda Dios ángel Gabriel ndaani ti guidxi lá Nazaret de Galilea,

²⁷ra nuu ti badu dxaapa lá María ni ma yenaba ti hombre lá José laa para ichaganá'. Za José de lade xfamilia David.

²⁸Ora biuu ángel que ra nuu be bigapa diuxi laabe ne na: ―Ma ulí Dios lii, María. Dichosa lii lade irá xixé gunaa.

²⁹Nabé bidxagayaa be ni gudxi ángel que laabe, ne candaa ique né be xiñee bigapa diuxi laabe zaqué.

³⁰Para na ángel que: ―Cadi idxibi lu, María. Ma uluu Dios ndaaya lii.

³¹Chi aca xiiñi lu' ne zapu ti badu huiini'. Cuee lá lu laabe Jesús.

³²Zaca be nandxó' ne zabí cabe laabe Xiiñi Dios ni nuu ibá'. Ne zucuí Dios laabe de rey ra gurí bixhoze gola be David.

³³Zaca be rey sti irá cani za de Israel, ne qué ziuu dxi guiasa be. Qué ziuu dxi guiaana dxí be de guni mandar be.

³⁴Para na María rabi ángel que: ―Ximodo zanda gaca ndi ya', purti binni dxaapa naa.

³⁵Oraque na ángel que rabi laabe: ―Zeeda Espíritu Santu luguiá lu' ne zutaagu enda nandxó' sti Dios lii. Nga runi zaree chu badu huiini ca para Dios, ne zabi cabe laa Xiiñi Dios.

³⁶Laca ma naca xiiñi Elisabet lisaa lu', neca ma nagola. Na nda cabe qué zanda gapa be ba'du', peru ma ze be xhoopa beeu de naca xiiñi be.

³⁷Purti para Dios gasti ni nagana.

³⁸Oraque na María: ―Rarí nuaa para gune ni na Dios. Zaa gaca casi nou' ca. Nga si bina diaga ángel que, biree ze'.

³⁹Ca dxi queca nagueenda biree María uyé ti guidxi huiini de Judea, nuu lade dani.

⁴⁰Ora yendá be ralidxi Zacarías biuu be, bigapa diuxi be Elisabet.

⁴¹Casi bina diaga Elisabet stiuxi be biniibi dxacha badu huiini que ndaani', ne bidxá ladxidó' Elisabet de Espíritu Santu.

⁴²Ne bicaa ridxi: ―Dichosa lii lade irá xixé gunaa ne dichoso badu huiini naca xiiñi lu ca.

⁴³Paraa biree razón gueda ganna jñaa Señor stinne naa.

⁴⁴Purti casi bina dia'ga stiuxi lu' biniibi badu huiini ri ndaane de enda nayeche'.

⁴⁵Dichosa lii ti bini cre lu', purti zaca ni gudxi Dios lii.

⁴⁶Oraque na María: De idubi xhialma rusisaca Dios.

⁴⁷Ne rieche né ladxiduá' Dios ni beda ulá naa.

⁴⁸Nuaa para gune xhiiña be, ne qué risaca dia', peru bilabi be naa. Dede yanadxí irá xixé binni ibani ndaani guidxilayú zabi naa dichosa.

⁴⁹Purti cadi ni guiete chupa chonna gubidxa si ndi ni bi'ni be luguia'ya'. Nandxó' Dios, ne iruti ru casi laa.

⁵⁰Qué ziuu dxi guiaana dxí be de ilasela'dxi be cani ridxibi laabe.

⁵¹Biiya pabiá' nandxó' ni bi'ni be: Bicheche ndase be cani rudxiiba laca laa.

⁵²Undisa be cani ma naca tuuxa de ra zuba, ne bidxiiba be cani qué rudxiiba laca laa.

⁵³Bichá tipa be ná cani candaana. Bidxigueta be cani napa bidxichi nisi ná'.

⁵⁴Ucané be cani za de Israel, ca xpinni be, ne bilasela'dxi be laaca',

⁵⁵casi bidii stiidxa be ca bixhoze gola canu, Abraham ne ca xiiñi', ne irá xixé ni za de laa.

⁵⁶Zacá nga bisisaca María Dios, ne biaana né Elisabet bia' chonna beeu. Oraque ru bigueta ralidxi.

⁵⁷Bizaa si xpeeu Elisabet beda gapa ti ba'du'.

⁵⁸Ora gunna ca xpecinu be ne ca lisaa be modo bilasela'dxi Dios laabe la? yeizaca ca laabe, ne bieche né ca laabe.

⁵⁹Lu xhono gubidxa guluu cabe seña sti Dios badu huiini que, ne ucala'dxi cabe nibee lá cabe laa Zacarías, lá bixhoze.

⁶⁰Peru na jñaa be co', iree lá be Juan.