Lukas 1:10-60

¹⁰Te uras ne intutung e ka insinsu, mig-ampu ka masulug ne etew diye te lihawangan te timplu.

¹¹Ne dutu, due panalihan te Magbebaye ne migpakita kandin ne diye migsasindeg te dapit te igkakawanan te altar ne egtutungan te insinsu.

¹²Natingkemed si Sakariyas te pegkakita rin te panalihan, wey naaldek sikandin.

¹³Piru ingkahiyan sikandin te panalihan, “Kene ka egkaaldek Sakariyas. Indineg te Manama ka peg-ampu nu, ne kuntee eg-anak te lukes ka asawa nu ne si Ilisabit. Ne ngarani nu sikandin ki Huwan.

¹⁴Egkahale-gale kew langun ke eglesut e sikandin,

¹⁵su egkeyimu sikandin ne mabantug diye te tangkaan te Magbebaye ne Manama. Ne keilangan ne kene sikandin eg-inum te binu wey ke egpekewubug ne eg-inumen, wey egkapenu sikandin te Panisingan te Manama minsan ke diye pad sikandin te getek te iney rin.

¹⁶Ne igpalibed din ka masulug ne kabuhalan ni Israil diye te Magbebaye ne Manama ran.

¹⁷Eggun-a sikandin te Magbebaye, wey egpakaangken sikandin te Panisingan te Manama wey geem ne egpekeiling te ki prupita Ilyas dengan. Egpeg-ulien din ka nenekeg-ehet ne me amey wey me anak, wey egpaliberen din diye te maheteng ne dalan ka masinupaken ne me etew. Puun due, egkaandam din ka me etew para te pegginguma te Magbebaye.”

¹⁸Ne migkahiyan ni Sakariyas ka panalihan, “Egmenuwen ku te pegkanengneng ne malehet ka inlalag nu? Su buyag ad ma seini wey buyag e degma ka asawa ku.”

¹⁹Ne migtabak ka panalihan, “Sikeddi si Gabriil ka sinalihan te Manama. Impeendini a nikandin eyew te peglalag wey pegpanugtul keykew te seini ne meupiya ne panugtulen.

²⁰Ne puun su ware ka migpalintutuu te ingkahi ku, egkeummew ka taman te aldew ne egkatuman e ka ingkahi ku keykew. Su egkatuman iya seeye te eleg ne timpu.

²¹Ne dutu, migtetaharan te me etew si Sakariyas wey neinu-inu sikandan te naluhey sikandin diye te seled te timplu.

²²Te peglihawang din e, kenad sikandin egpakalalag wey migtingyasan din naan de sikandan. Puun due, nasabut dan ne due impakita kandin diye te seled te timplu. Ne neummew en iya sikandin.

²³Te napenge e ka pegpamakey ni Sakariyas diye te timplu, mig-uli e sikandin.

²⁴Te ware naluhey, naberes e ka asawa rin ne si Ilisabit wey mig-uugpe de iya sikandin seled te lalimma ne bulan.

²⁵Ne migkahi si Ilisabit diye te geyinawa rin, “Kuntee neyid-u e ka Manama keddiey. In-awe din e ka hilew ku diye te tangkaan te me etew.”

²⁶Te hen-em e ne bulan ka getek ni Ilisabit, insuhu te Manama ka panalihan ne si Gabriil diye te lungsud te Nasarit ne sakup te Galiliya.

²⁷Egpeendiyaan din ka sabeka ne mengebay ne egngaranan ki Mariya ne egpangasaween te sabeka ne kanakan ne egngaranan ki Husi ne kabuhalan ni Hari Dabid.

²⁸Ne miggendiyad ka panalihan te kandin wey migkahi, “Kahale ka, Mariya! Migpanalanginan ka te Magbebaye wey egdumaan ka nikandin!”

²⁹Nalibeg amana si Mariya meyitenged te narineg din wey impalemlem din ke nekey ka kaluwasan dutu.

³⁰Ne migkahiyan sikandin te panalihan, “Kene ka egkaaldek, Mariya, su ingkeupii ka te Manama.

³¹Egkaberes ka wey eg-anak te lukes, wey ngarani nu sikandin ki Hisus.

³²Egkeyimu sikandin ne mabantug wey eg-umawen sikandin ne Anak te Amana ne Mabantug ne Manama. Ne egpaharien sikandin te Magbebaye ne Manama iling te kaapuan din ne si Hari Dabid.

³³Ne egharian din ka me kabuhalan ni Hakub te ware egtamanan, ne ware katammanan te kandin ne peghari.”

³⁴Ne mig-insaan ni Mariya ka panalihan, “Egmenuwen ku naa te eg-anak te mengebay e mem pad?”

³⁵Ne migtabak ka panalihan, “Eggendini te keykew ka Panisingan te Manama wey egdalungan ka te geem din. Puun due, ka matulus ne bate ne ig-anak nu egngaranan te Anak te Manama.

³⁶Sumsumana nu ka suled nu ne si Ilisabit. Kahiyen ne kene din eg-anak. Piru kuntee egkasalayan e sikandin su hen-em e ne bulan ka getek din, minsan buyag e sikandin.

³⁷Su ka Manama egpekeyimu te langun.”

³⁸Ne migkahi si Mariya, “Suluhuanen a te Manama. Egkeyitabu perem kayi te keddi ka inlalag nu.” Ne mig-awe e ka panalihan te Manama.

³⁹Te peglihad te pila ne me aldew, migpanines si Mariya wey miglukut-lukut miggendiye te sabeka ne lungsud ne diye te me bubungan te Hudiya.

⁴⁰Te pegginguma rin diye, migseled sikandin te baley enni Sakariyas wey migpangemusta ki Ilisabit.

⁴¹Te pegkarineg ni Ilisabit te laheng ni Mariya, migweil ka bate diye te getek din. Ne dutu, napenu si Ilisabit te Panisingan te Manama,

⁴²ne miglalag te meemen, “Te langun ne me malitan sikeykew re ka migpanalanginan te Manama, wey migpanalanginan degma ka bate ne ingkaberes nu!

⁴³Hentew e naan de iya se impanumbalayan te iney te Magbebaye ku?

⁴⁴Su te pegkarineg ku te laheng nu, migweil te kahale ka bate kayi te getek ku.

⁴⁵Keupianan te seeye se migpalintutuu ne due katumanan te impanengneng te Manama diye kandin.”

⁴⁶Ne migkahi si Mariya, “Egdayan a te Manama

⁴⁷wey egkahale ka gimukud ku su ka Manama ka keddiey ne kaluwasan

⁴⁸tenged te nakasuman-suman sikandin keddiey te suluhuanen din ne kene ne impurtanti! Ne puun kuntee ka langun ne etew egkahi te impanalanginan a,

⁴⁹tenged te kein-inuwan ne innimu te maresen ne Manama kayi te keddiey. Matulus sikandin.

⁵⁰Egkeyid-u sikandin te langun ne due pegkaaldek diye te kandin, puun pad dengan wey minsan te keureme.

⁵¹Migpakita sikandin te geem din wey impegsuwey-suwey rin ka me etew ne migpaambug te pegkeetew ran.

⁵²In-awe din ka me Hari diye te katungdanan dan wey imparibabew rin ka me etew ne kene ne impurtanti.

⁵³Impeyibhibulung din te me meupiya ka impanggutasan wey impaawe din ne ware me inuyanan ka me meyaman.

⁵⁴Ne migbulihan din ka me kabuhalan ni Israil ne suluhuanen din, wey nakasuman-suman sikandin te hid-u rin

⁵⁵diye te ki Abraham wey te langun ne me kabuhalan din te ware egtamanan sumale te insaad din diye te me kaapuan ta.”

⁵⁶Ne mig-ugpe si Mariya diye te ki Ilisabit seled te tatelu ne bulan. Nataman, mig-uli din e diye te kandan.

⁵⁷Ne miggingume e ka timpu ne mig-anak e si Ilisabit wey lukes ka anak din.

⁵⁸Nakarineg ka me sumbaley rin wey ka me karumaan din ne meupiya amana ka Manama diye te kandin ne nahale sikandan langun duma ki Ilisabit.

⁵⁹Te walu e ne aldew ka bate, migpanumbaley sikandan diye te ki Ilisabit eyew te pegtambung te pegtuli te bate. Ne egngaranan dan e perem ki Sakariyas ka bate su igsangey ran e te ngaran te amey rin.

⁶⁰Piru migkahi ka iney rin, “Kene! Huwan ka igngaran kandin.”