Lucas 1:10-60

¹⁰Nu gorna lee yaal kayek, rese xaa yezh nzhi naz jwer kawdizhno Dios.

¹¹Nu gorzee lee tub mandad cheen Xaa Nabeyy mlu lo Zacari, nzolisa lad li lo mdo pa kayek yaal.

¹²Nu gorna ngune Zacari lo mandad, mdedyall xaa nu mzheb xaa.

¹³Per lee mandad nzhé lo xaa: —Zacari, nazhebt lu, nel mbinla Dios kwaan ngunaab lu lo xaa; lee sa lu, Elizabet, kano tub mad, nu kole lu mad Juan.

¹⁴Nu nix doo gak lextoo lu, nu noka zyen doo myet nix doo gak lextoo lee xaa gal,

¹⁵nel xinn lu gak tub xaa non lo Xaa Nabeyy. Nagot xaa xis ub, nu axta gorna zeeraka gal xaa lee Mbi Naban cheen Dios nabeyyla lextoo xaa.

¹⁶Lee xaa le zee zyen doo xaa Israel bare lo Xdios xaa, Xaa Nabeyy lo xaa.

¹⁷Juan yaner delant lo Xaa Nabeyy, kwaan leeka Mbi Naban nu yalngezh kwaan mkano Li, xaa mzaa kwent kwaan nzhé Dios lo lee xaa yilo. Zee lee re myet kwi wen kwaan re xinn xaa, nu noka re xaa nazaat yek gon diizh, zaa yek gona. Snee zo list re myet zee kayaa xaa Xaa Nabeyy.

¹⁸Zacari mnabdizh lo mandad nu nzhé xaa: —¿Xomod ne na wlipa gak kwaane? Nel ngoxla rop sa na.

¹⁹Lee mandad mkeb lo xaa, nzhé: —Na nak Gabriel, na nzo gax lo Dios nu na nkee xchiin xaa. Lee xaa mxaal na wdizhno na lu, nu nii na re kwaan wen ne lo lu.

²⁰Per nel namlet lu krer kwaan nii na lo lu, nal lake lu muud, nu nagarlot wdizh lu axta mbizh gak re kwaane.

²¹Nu lee re myet nkambaz Zacari naz jwer roo yidoo, nu nabdizh re xaa lo wechxinn xaa chozhiin nyentaka xaa roo leen yidoo.

²²Nu gorna mroo xaa nyentra mod nii xaa lo re xaa; zee mzeen re xaa lee xaa ngune lo tub kwaan naz leen yidoo, nel kwaan nseyn nii xaa lo re xaa, nel muud myaan xaa.

²³Gorna ngulo mle Zacari xchiin xaa, nya xaa garli xaa.

²⁴Gwluzh gorna ngulo mded kwaane, lee sa xaa mbeyyxiin, nu tira mkaxlaan me garli me dubse tub gaay mbee nu namrootra me nel nle me xgab:

²⁵“Snee mle Xaa Nabeyy lo na, zee mbyiib yalnto cheen na lo re myet”.

²⁶Xop mbee gwluzh, Dios mxaal mandad Gabriel naz yezh Nazaret yizhyo pa nabeyy Galilea,

²⁷lee mandad ngwasewii lo tub ngwnaa me zer chaal nik tub xaabyi, me le Mari, me nakladiizh chelya kwaan tub xaabyi le Che, xaa nak dii cheen rey David, xaa mnabeyy yilo.

²⁸Lee mandad mzeeb pa nzho me, nu nzhé lo me: —¡Dix Mari, lu nak tub me wen lo Dios! Dios, Xaa Nabeyy, nzo kwaan lu.

²⁹Gorna mbin Mari re kwaan nzhé mandad lo me, mdedyall me nu mle me xgab chozhiin sbaa nzhé mandad lo me.

³⁰Nu lee mandad nzhé: —Mari, nazhebt lu nel nyakla Dios ne lu.

³¹Nal lee lu weyyxiin lu, nu kano lu tub xgann lu, nu kole lu mad Jesús.

³²Lee xaa ne gak tub xaa gro doo nu lee xaa role Xgann Dios, xaa nzob naz yiba. Nu lee Dios, Xaa Nabeyy, le zee nabeyy xaa mod xey xaa David, xaa ngu yilo,

³³zee tira nabeyy xaa re xaa Israel. Nu lee yalnabeyy cheen xaa tira naluxt.

³⁴Mari mnabdizh lo mandad, nzhé: —¿Xomod nzho mod gak kwaane? Nel lee na nik tub xaabyi zer chaal na.

³⁵Lee mandad mkeb nzhé: —Lee Mbi Naban la tich lu, nu lee yalngezh cheen Dios, xaa nzob naz yiba la cho lu kwenta tub xkaw. Kwaanzee nzhul gak xinn lu mad gal nu role xaa Xgann Dios.

³⁶Noka sawlizh lu Elizabet gal tub xgann, nixa ngoxla me; nixa “me nit” nii re xaa me. Nu nal nzhala xop mbee nakxiin me,

³⁷nel lee Dios nzho mod le rese kwaan.

³⁸Zee lee Mari nzhé: —Na nak mos cheen Xaa Nabeyy, laa le Dios na modxa né lu lo na. Gorzee lee mandad nya.

³⁹Tub mbizh nzha Mari tub yezh nzhi leen yi cheen yizhyo Judea, prad doo nzha me;

⁴⁰nu gorna mzhin me garli Zacari ngunii me “dix” lo Elizabet.

⁴¹Nu gorzee lee Elizabet mbin ngunii Mari “dix”, lee xinn me nyakdoola nu mgun mad leen lextoo me nu gorzee lee Mbi Naban cheen Dios mnabeyy leen lextoo me.

⁴²Zee lee Elizabet dub gan nzhé: —¡Dios mzaa kwaan gro doo lo lu nu lo xinn lu ke lo stub naz re ngwnaa!

⁴³Nanakt na tub me non per mzeselach lu lo na, nel lu nak xnaa Xaa Nabeyy lo na.

⁴⁴Nu gorna mbin na ngunii lu “dix” lo na, lee xiin na nyakdoola nu mgun mad leen lextoo na.

⁴⁵¡Chul doo ded lu nel mle lu krer lee Xaa Nabeyy le rese kwaan né xaa lo lu!

⁴⁶Zee lee Mari nzhé: Lee yalnaban cheen na nzholl lo Xaa Nabeyy, nel gro doo nak Xaa Nabeyy,

⁴⁷nu lee mbi naban cheen na nyakdoola ne Dios, xaa koo na lo yalgut lo re jwalt cheen na.

⁴⁸Nel nixa nanont na per Dios mleey na, nel nal lee re myet zelo nii lo na me non;

⁴⁹nel lee xaa nkano yalngezh nu zyen doo kwaan nzhale xaa lo na. ¡Nzhul nak xaa!

⁵⁰Tubka nles lextoo Dios ne re xaa nzheb ne Dios.

⁵¹Dios nle kwaan gro doo kwaan yalngezh cheen xaa. Mlux xaa xgab cheen re xaa xwa doo nle,

⁵²nu mkiib xaa yalnon lo re xaa nabeyy, nu mle non xaa re xaa nanont.

⁵³Mzaa xaa zyen doo kwaan lo re xaa nlaan, nu lo re xaa rik nik tub kwaan namzaat xaa.

⁵⁴Mle xaa yudar re sawlazh be, xaa kwaan nkee zhiin lo Dios; nu nanyanlazht xaa lesla xaa ne xaa re be,

⁵⁵modxa nzhé Dios lo re xey be xaa yilo, nu lo Abraham, nu lo re dii cheen Abraham.

⁵⁶Mari mlaz garli Elizabet chon mbee, zeera nya me garli me.

⁵⁷Gorna mzhin mbizh gal xinn Elizabet, zee ngol tub madbyi.

⁵⁸Re xaa nzho gax garli me nu re sawlizh me, ngwa re xaa lo me, gorna mbin re xaa lee Xaa Nabeyy ngok wen doo lo me.

⁵⁹Nu gorna nguxoob mad xon mbizh, zee mbid re xaa garli Zacari zee choog xaa tik yed cho mad kwaan nak beyy cheen re xaa Israel. Nu nzhekla re xaa kole mad Zacari kwentaxa le xuz mad.

⁶⁰Per lee xnaa mad nzhé: —Narolet mad sbaa, lee mad role Juan.