Luk 1:10-60

¹⁰Ning i tun a utna ning i toboh wakak, a tarai a lotu ning la tur tumolapiu la nunung.

¹¹A angelo anuna Leklek i hanot tetek e Sekaria, pa i tur ana ris a sot ana logo na tun artabar, ning di tun a utna ning i toboh wakak onoi.

¹²Ning e Sekaria i oroi i, a palaona i suren, pa i matmataut kol onoi.

¹³Ika a angelo i atai i mange, “Sekaria, gong u matmataut, e God ka longor anuma nunung, pa anuma hane e Elisabet ir agon pas a natumlik a barsan, pa ur pasar a risana e Jon.

¹⁴Ur gas kol onoi, pa galis otleng lar gas ana nuna agon,

¹⁵anasa ir itna na matan a Leklek. Bel ir gang a wain, pa a gang laulaula, pa ning belot dir agoni, ka bukus ana Talngan Tabu.

¹⁶Pa ir ben ulak a galis a tarai Israel tetek a Leklek a God anunla.

¹⁷Ir rakrakai arlar ana propet Elias, pa a magirana otleng ir arlar onoi. Ir nigo tana Leklek, sur ir ben taum na tamtamana kakakla tetek na natnatunla sur lar aremoro ulak, pa ir ben a tarai a tabun longor sur a wakak a nuknuk anuna tostos a tarai, sur ir sang a tarai anuna Leklek sur anuna tinan ot.”

¹⁸E Sekaria i deken a angelo mange, “Ar tasman mangmangasa i mang a utna ne ir hanot? Anasa mia ka lapun.”

¹⁹Pa a angelo i kelesi mange, “Iau e Gebriel, a sira tur namatana e God. I ot i sune iau sur ar atai u, pa ar los a wakak a warwara ne tetek u.

²⁰Oroi, onone bel ur warwara lar pas tuk ana pukakiar ning a utna ne ir hanot. Bel ur warwara, anasa bel u tortorot ana nuka warwara, ning ir hanot tostos ana pukakiarna.”

²¹A tarai la nanan e Sekaria, pa la nuknuk kol mang sur asa ning ka bongnani ting na rumai a artabar.

²²Ning i purum, bel i warwara lar pasi tetek la. Pa la tasmani mang e Sekaria ka oroi tar ta tatatai ana rumai a artabar, anasa i akinalang kama tetek la ana naur a kuna.

²³Ning ka rop anuna pukakiarla na titol, i ulak sur anuna hanua.

²⁴Pa lamur, e Elisabet anuna hane i tianan, pa dilima na kalang bel i han masik pas kusun a rumai.

²⁵Pa i atongi mang, “Onone bot a Leklek i nangan iau pa i kepsen a utna ning a meme onoi tan a tarai.”

²⁶Ning ka diono na kalang ane Elisabet, e God i sune a angelo Gebriel utumo e Galili ana ning a hanua a risana e Nasaret.

²⁷I han tetek a basbas a risana e Maria, ning di ka suah alar tari sur ane Josep, i ning tagun a mangis a tarai ane king Dewit.

²⁸A angelo i han tetek e Maria pa i atai i mange, “Ur gas, u angis kol! A Leklek i kes taum hom.”

²⁹Pa e Maria i nuknuk loklokron kol ana warwara ne, mang asa a kamkamna.

³⁰Pa a angelo i atai i mange, “Maria, gong u matmataut, e God i gas kol hom.

³¹Longori! Ur tianan, ur agon pas a kaklik barsan, pa ur pasar a risana e Iesu.

³²Pa a risana ir rarang, pa dir atongi mang a Nat e God i Leklek Kol. Pa a Leklek e God, ir akesi ana keskes a king ane tubuna e Dewit,

³³pa ir king tikin ana mangis a tarai ane Jekop, pa anuna matanitu bel ir rarop.”

³⁴E Maria i deken a angelo mang, “Ir mangmangasa? Anasa bel a lasan taum ana ta barsan.”

³⁵A angelo i kelesi mang, “A Talngan Tabu ir kes hom, pa a rakrakai e God ir poroi alar u. Larning a Tena Totoh ning ur agon pasi, dir atongi mang a Nat e God.

³⁶Oroi, a maim e Elisabet ka lapun, pa di atongi mang a pombo, ika anone ka tianan, pa ka diono na kalang anunai.

³⁷Anasa bel ta utna i ngangaten tetek e God.”

³⁸Pa e Maria i atongi mang, “Iau a tena titol oros anuna Leklek, i wakak ka ning dir toli hok arlar ana numa warwara.” Lamur a angelo i han kusuni.

³⁹Lamur e Maria i sang pas, pa i han kas kapit sur a hanua ning i kes saot na mangir ana papar Judia.

⁴⁰I kas ana rumai ane Sekaria, pa i kabah na gasgas pas e Elisabet.

⁴¹Ning e Elisabet i longor a arkabah na gasgas ane Maria teteki, a kaklik i pele ting na balana, pa e Elisabet i bukus ana Talngan Tabu.

⁴²Pa i warwara ana tnan elngena mang, “U angis tan a gurarala rop, pa a kaklik otleng ning ur agoni i angis.

⁴³Iau esi na ngas a hane ne ning e tana Leklek anuki ir han tetek iau?

⁴⁴Ning a longor anuma arkabah na gasgas tetek iau, a kaklik i gas, pa i pele te na balak.

⁴⁵U angis anasa u tortorot mang a warwara anuna Leklek tetek u ir hanot momol.”

⁴⁶E Maria i atongi mang, “A inguk i aleklek pas a Leklek,

⁴⁷pa a balak i gas o e God, anuka Tena Alaun,

⁴⁸anasa i maris iau anuna tena titol oros, ning iau a hane oros ka. Turpasi anone a mangis a taraila rop lar atongi hok mang a angis,

⁴⁹anasa Esi ning i Leklek Kol, ka tol tar a tatatnan utnala hok, a risana i totoh.

⁵⁰Anuna marmaris i kes tetek la ning la hanrawai i, i kes tetek a tarai tagun onone, pa tagun lamur.

⁵¹I tol a rakrakai a titol ana kuna, pa ana rakrakaina i minggen sarara la ning la rakan aleklek la ana nuknukinla.

⁵²I minggen purum a kingla kusun anunla keskes a leklek, pa i aleklek pas la ning di nuki mang a tarai oros ka.

⁵³I tabar a kapan a tarai ana wakak a ututnala pa i sune sen a leklekla ana wah a kunla.

⁵⁴I nangan anuna tena titolla, a tarai Israel, pa i nuk pas anuna marmaris

⁵⁵tetek e Abaram pa anuna mangis a tarai tikin, larning ka atong tari tetek anundala mangis a tarai tagun nating.”

⁵⁶Pa e Maria i kes napirna e Elisabet arlar ana natol a kalang, pa lamur i ulak sur anuna hanua.

⁵⁷Ning a pukakiar ane Elisabet i sot sur ir agon onoi, i agon pas a kaklik barsan.

⁵⁸A halalna pa na mainala la longori mang a Leklek i maris kol e Elisabet, pa la gas taum onoi.

⁵⁹Ning ka siwal a pukakiar anuna kaklik, la sang sur dir kot talilisi, pa la mang sur lar pasar a risana e tamana e Sekaria onoi.

⁶⁰Ika e tana i atongi mange, “Gong! A risana ot e Jon.”