LUKU 6:15-30

¹⁵Matiu, Tomasi, Alafeu nɛ́ Yamisi, Simↄ kũ òdi pinɛ Kokaride,

¹⁶Yamisi nɛ́ Yudasi kũ Yudasi Isikariↄti kũ à gↄ̃̀ bonkpɛde ũo.

¹⁷Yesu kìpa kũńwo, à zɛ̀ gusaraa, gu kũ a ìba kparanↄ kũ gbɛ̃ pario kún. Ò bò Yurusalɛmu kũ Yudea bùsuuo pínki kũ ísiralɛ wɛ̃tɛ kũ ò kú Taya kũ Sidↄ̃o sarɛnↄ.

¹⁸Ò sù a yã ma, de à ń werekↄ̃a kũ ń gyãnↄ dↄ. Gbɛ̃ kũ tãna tɛn wari dↄḿmanↄ aafiaa lè dↄ.

¹⁹Gbɛ̃ sĩnda pínki tɛn wɛtɛ à ↄ naa, zaakũ gbãna tɛn bo a gũn, àtɛn gbɛ̃ sĩnda pínki werekↄ̃amɛ.

²⁰Akũ à wɛ́ sɛ̀ à a ìbanↄ gwà à pì: Arubarikadenↄmɛ ákↄ̃nↄ takasidenↄ ũ, zaakũ kpata kũ à bò Luda kĩnaa de á pↄ́ ũ.

²¹Arubarikadenↄmɛ ákↄ̃nↄ kũ nà tɛni á dɛ teranↄ ũ, zaakũ áni kã. Arubarikadenↄmɛ ákↄ̃nↄ kũ átɛn ↄ́ↄ dↄ teranↄ ũ, zaakũ áni yáa dↄ.

²²Arubarikadenↄmɛ á ũ, tó ò zã̀águ, tó ò gìái, tó ò á sↄ̃sↄ̃, tó ò á tↄ́ vãni sìsi Bisãsiri Nɛ́ yãi.

²³Gↄrↄ kũ yã birenↄ á lé, à pↄnna kɛ à vĩvĩ kũ pↄnnao, zaakũ á láada zↄ̃kↄ̃ ludambɛ. Lɛn ń dizinↄ kɛ̀ annabinↄnɛ lɛ.

²⁴Waiyoo ákↄ̃nↄ ↄgↄdenↄ, a gĩnakɛ a á mɛ̀nnamanaa è kↄ̀.

²⁵Waiyoo ákↄ̃nↄ kũ á kãna teranↄ, nà ni á dɛ. Waiyoo ákↄ̃nↄ kũ átɛn yáa dↄ teranↄ, áni wɛ̃nda kɛ à ↄ́ↄ dↄ.

²⁶Waiyoo ákↄ̃nↄ, tó gbɛ̃ sĩnda pínki tɛni á tↄ́ nna sí, zaakũ lɛn ń dizinↄ kɛ̀ annabi ɛ́kɛdenↄnɛ lɛ.

²⁷Matɛn o ákↄ̃nↄ kũ átɛni ma yã manↄnɛ, àgↄ̃ ye á ibɛrɛnↄi, à a mana kɛ gbɛ̃ kũ ò zã̀águnↄnɛ.

²⁸À sa mana o gbɛ̃ kũ òdi sa vãni oárɛnↄnɛ. À adua kɛ gbɛ̃ kũ òdi wari dↄáwanↄnɛ.

²⁹Tó gbɛ̃ n sãn kɛ̀ n gasu doa, ǹ a do dↄnɛ dↄ. Tó gbɛ̃ n uta zↄ̃kↄ̃ↄ sìmma, ǹsun gínɛ kũ n utanɛoro.

³⁰Tó gbɛ̃ pↄ́ wɛ́ kɛ̀mma, ǹ kpáa. Tó gbɛ̃ n pↄ́ sìmma, ǹsun gbɛkaaro.