LUKE 6:15-30

¹⁵Matthew, Thomas, James, te tama Alpius, Simon, te tama e hai te kaavena teelaa see fiffai maa Rome e roorosi i Israel,

¹⁶Judas, te tama James, aa ko Judas Iscariot, te tama ma ki oti ku hakaarina ake ia Jesus ki naa hakamau.

¹⁷Jesus ni ahemai i te mouna ma ana aposol no tuu iloo i te kina e taahora ma te lopo disaipol aana. E tammaki naa tama i naa matakaaina i Judea, Jerusalem, aa ma naa matakaaina e ttuu i tai pee ko Tyre ma Saidon ni kkutu ake i te kina naa.

¹⁸Naa tama naa ni oo ake no hakannoo kiaa Ia aa ki uiia naa maki laatou. Naa tama e tauria naa tippua hakallika raa hoki ni oo ake, naa tama naa ni haia Jesus no taukalleka.

¹⁹Naa tama hakkaatoa i te kina naa ni mee ma ki ppaa naa rima laatou i te haitino Jesus, i teelaa ni mahi raa e ssura mai iaa Ia, teelaa e mee ai laatou no taukalleka.

²⁰Jesus ni ttoka ki ana disaipol no mee ake, “Kootou naa tama e nnoho hakaaroha, kootou ki hakafiaffia; te Nohorana TeAtua raa se kina kootou!

²¹Kootou naa tama e hiikkai i te ssao nei, kootou ki hakafiaffia; kootou ma ki oti ku pposu! Kootou naa tama e ttani i te ssao nei, kootou ki hakafiaffia; kootou ma ki oti ku kkata!

²²“Kootou ki fiaffia i te saaita te henua e lotoffaaeo i kootou, e hakakkee kootou, e sasakkiri i kootou, aa e taratara maa kootou ni tama e hakallika, teenaa maa i kootou e ttaka ma te Tama te Henua!

²³Naa tippuna naa tama naa ni hakasura hoki te tiputipu naa ki naa pure TeAtua imua. Kootou iaa ki fiaffia i te saaita naa vana naa e ssura. Kootou anu ka fiaffia, i naa tuuhana kootou e llasi raa e takkoto mai i te lani.

²⁴“Tevana iaa kootou naa tama e hai hekau i te saaita nei raa ma ki haia hakallikaina iloo; i te ssao kootou ni nnoho hakaraaoi raa ku laka!

²⁵Kootou naa tama e kkai ka pposu i te saaita nei raa ma ki haia hakallikaina iloo; i kootou ma ki oti ku hiikkai! Se hakallika peehea iloo ma ki sura i kootou naa tama e kkata i te saaita nei; kootou ma ki ttani hakaaroha!

²⁶“Kootou naa tama teelaa e tarataraina te henua ma ni tama e taukalleka raa, kootou ma ki haia hakallikaina iloo; i te aa i naa tippuna naa tama naa ni taratara hoki peenaa i naa pure kailellesi imua.

²⁷“Nau e vanaatu ki kootou naa tama e hakannoo mai kiaa nau: manava laaoi i naa tama e tautau haaeo kootou, sosorina taukareka ki naa tama e lotoffaaeo i kootou,

²⁸taratara hakaraaoi ki naa tama e taratara hakallika i kootou; kootou taku ki TeAtua ki tokonaki ki naa tama e sosorina hakallika ki kootou.

²⁹Ki mee too vasi kauae e paakia se tama, huri atu telaa kauae ki paakia hoki; ki mee too kkahu e mattoru raa e toa se tama, tiiake te tama naa ki too hoki too kkahu vare.

³⁰Hookii ni aa e noho ma koe ki naa tama e kainnoo atu, aa ki mee maa se tama ni too tana mee iaa koe, koe see mee ma ki hakaahea atu too mee naa.