Luca 6:15-30

¹⁵Mateo, Tomá, Alpeo warra, Santiago, Simoʌ̃ Zelote abada,

¹⁶Santiago djaba Juda, idjab̶a Juda Iscariote. Jĩrũare maʌ̃gʌba Jesura jidabisia.

¹⁷Maʌ̃be Jesura idjia edad̶arã ume eyad̶eba ed̶aa zesid̶aa. Jewed̶ad̶e idji ẽpẽ b̶ea zocãrã panʌ ume idjab̶a ẽberãrã cãbana zebʌda ume b̶esia. Maʌ̃ ẽberãrãra Judea druad̶eba, Jerusaleʌ̃neba, pusa icawabema puru Tirod̶eba idjab̶a Sidoʌ̃neba zesesid̶aa Jesuba jaradia b̶ʌ ũrĩni carea idjab̶a cacua biẽ́ b̶eara biabicuamãrẽã.

¹⁸Maʌ̃ awara Jesuba jai b̶eara ẽberãrã cacuad̶ebemada ãyã jʌrecuasia.

¹⁹Jũma dji cacua biẽ́ b̶eaba idjira tã quĩrĩã panasid̶aa Ãcõrẽ ʌb̶ʌad̶eba biabi b̶ʌ bẽrã.

²⁰Jesuba idji ẽpẽ b̶ea acʌped̶a nãwã jarasia: Bio bia b̶ead̶ia bãrã dji ne neẽ́ panʌra Ãcõrẽba bãrãra pe erob̶ʌ bẽrã.

²¹Bio bia b̶ead̶ia jarra b̶eara Ãcõrẽba jãwũãbi bẽrã. Bio bia b̶ead̶ia sopuaba jĩã b̶eara Ãcõrẽba b̶ʌsrid̶abi bẽrã.

²²Bio bia b̶ead̶ia ẽberãba mʌ̃, Naʌ̃ Djara Edad̶a carea bãrã quĩrãmabʌdad̶e, igarabʌdad̶e idjab̶a biẽ́ jarabʌdad̶e.

²³Bãrã biẽ́ obʌdad̶e bio capipiad̶adua, bãrãba nebia waib̶ʌada bajãne eropanani bẽrã. Ãdji drõã naẽnabemarãba Ãcõrẽneba bed̶eabadarãra ara maʌ̃ quĩrãca biẽ́ obadjid̶aa.

²⁴Baribʌrʌ mĩã djuburi b̶ead̶ia bãrã dji ne bara b̶eara. Bãrãba eropanʌneba necai panʌ bẽrã nocoarebema ewarid̶e necai pananaẽ́a.

²⁵Mĩã djuburi b̶ead̶ia bio ne co panʌneba jãwũã b̶eara, nocoarebema ewarid̶e jarra panani bẽrã. Mĩã djuburi b̶ead̶ia ara nawena ipid̶a b̶eara nocoarebema ewarid̶e jĩãni bẽrã idjab̶a sopuad̶i bẽrã.

²⁶Mĩã djuburi b̶ead̶ia ẽberãrãba bãrãda bia jarad̶ibʌrʌ. Bãrã drõã naẽnabemarãba ẽberãrã Ãcõrẽ trʌ̃neba sewa jaradia b̶eara bia jarabadjid̶aa.

²⁷Baribʌrʌ mʌ̃a jara b̶ʌ ũrĩ panʌ́a jaraya: bãrã dji quĩrũra quĩrĩãnadua. Bãrã quĩrãma panʌra bia od̶adua.

²⁸Bãrã biẽ́ jarabadara bia jarad̶adua. Bãrã biẽ́ obada carea Ãcõrẽa iwid̶id̶adua ãdjirãra carebamãrẽã.

²⁹Ab̶aʌba bʌda uridarrad̶e uibʌrʌ, dewarabema uridarrad̶e idu ubidua. Ab̶aʌba bʌa cacuad̶e jʌ̃ b̶ʌd̶ebemada ab̶a jãrĩbʌrʌ, dewarabema bʌa jʌ̃ b̶ʌ sid̶a idu edebidua.

³⁰Ab̶aʌba bʌ́a ne iwid̶ibʌrʌ, wãgarãdua. Maʌ̃ awara bʌa erob̶ʌd̶ebemada ab̶aʌba jãrĩsira iwid̶irãdua jẽda diamãrẽã.