Luka 6:15-30

¹⁵Mataio eo Toma, Iamesi Alepaio natuna, eo Simona esana hinage Selote.

¹⁶eo Iudasi, Iamesi ena tau, eo Iudasi Isakariota, ia taumoruina ede.

¹⁷Maedi i leta i dobi, gonu eai i totoro, eo ena heaheatayao peledi hinage, eo moutuadi lailai Iudea eo Ierusalema eai se laoma, eo Turo eo Sidona geregeredi eai se laoma hinage, ena riba bena se ataiei, eo adi asiebo hinage bena i hemauridi;

¹⁸isi hinage earua biibiidi se hebaaeadi; abo se hemauridi.

¹⁹Moutuadi gamagaridi ia bena se abiitalaei; gigibori ia boeana eai i laoma, arinai gamagaridi i hemauridi.

²⁰Matana i lau‐laei ena heaheatayao aridi eai, i ene, “Omi gogogesagesa tataomiu e, au nuawoiwoina: Eaubada ena basileia omi enamiu.

²¹“Omi huia ta au guriam au nuawoiwoina: paana bogamiu abo se sese. Omi huia ta au doudou au nuawoiwoina: abo au marumaruhi.

²²“Tatao ena se ouyalayalaemiu, eo se lau‐suaraemiu, eo se alaliuliuaemiu, eo esamiu se awagabaei doha ginauri baabaaea, Tau Natuna debana eai, omi abo au nuawoiwoina.

²³Nei asubenana ne abo au kode, au kode lamposi: emi ainauia galewa eai abo ie lai: tamadiyao edi laulau doha ede peroveta aridi eai.

²⁴“Ahani omi monamonaune tataomiu e! paana emi henuhenu au abiyao.

²⁵“Ahani omi bogamiu se seseo! omi abo au guriam. Ahani omi huia ta au marumaruhi! abo au nuadubu eo au dou.

²⁶“Ahani omi, tatao gamagaridi se riba helolomiu! paana doha ede hinage tamadiyao edi laulau peroveta borabora aridi eai.

²⁷“Omi arinagu tauataiena arimiu eai ea ene, Ami waiunu au gadosisiedi, isi se ouyalayalaemiu adi gigi au hebigadi.

²⁸Isi se arina baaeaimiu au taubigaidi, isi hinage se hebaaeaimiu au lau uura enadi.

²⁹Ena tau esau paream ie wai, paream esau u mosei hinage; ia em lulu i girihai em pereue tabu u nuahi.

³⁰Tatao gamagaridi em ginauri se aibodaidi u mosedi: ia hinage em gogo i girihaidi tabu u abiuioidi.