Lukas 6:15-30

¹⁵pe Mateus pe Tomas pe Ieims (nenge Alpeus tuna) pe Simon (nenge te hetue i ke Emo Kina)

¹⁶pe Iutas (nenge Ieims tuna) pe Iutas Iskariot (nenge Iesus nena non ia pe poi poreke mule lange Iesus).

¹⁷Iesus hile kileng chouchou ngana neu pe iri ul nena hana nemur tei sio. Tei sio pe la temes nga kileng mosngana luluch nge na hana mur hel pule nge halang toto. Pe hulua halang teat nge Iutea pe nge Ierusalem pe nga ruach ilina pule nge Tir pe Siton.

¹⁸Iri lochloch te teke teat ke te longo Iesus nge hetottoro pe te teke hemas mule iri nga aria haleles mur. Iri nenge uneinei tuteu nge iri teat pule pe Iesus hemas mule iri.

¹⁹Pe hulua lochloch ngana te teke tera nge i iange kerkerenga nem lohot manmana nge i pe hemasia iri lochloch.

²⁰Ol pe Iesus naula nge na hana mur pe hele, “Imo nenge lemo ure halang ero, a iech toto iange atu teu nga NeHalang nena naualanga lo!

²¹Imo nenge a meteamo nga ich heueu nei, a iech pule iange lape samo una nga hoena. Imo nenge a tangtang pe letemo meena toto heueu nei, a iech iange nga hoena lape a melmel mule.

²²“Imo nenge a nanas tote Non Tuna pe hana muteria taua imo ero toto pe te tanga selel amo, a iech!

²³Nenge teke ure nei lohot nge imo, a iech toto pe ahes haka iange urumo palaungana kou kulele imo nga lut nga tapa.

²⁴“Pe imo nenge lemo ure halang heueu nei, a iech ero ol iange atu ngamo nenge urana toto a mene ke ulolo!

²⁵Pe imo nenge samo huna heueu nei, a iech ero ol iange nga hoena lape a meteamo toto! Imo nenge a melmelmel heueu nei, a iech ero ol iange nga hoena lape a tang manmana ol!

²⁶Pe imo nenge hulua te heto hekeke imo, a iech ero ol iange nge nike hulua nemur reria tete mur te heto hekeke hana nemur nenge te pallaklaka ke iri hetatalonga.”

²⁷Pe Iesus hele mule, “E hele lange imo nenge a longo atat nge iau. Letemo la mule pe lememo tau mule lemo ngarang mur pe apoi ke urana mule lange iri nenge lemeria ero ia imo pe te tanga selel amo.

²⁸A pete iri nenge te hele tautaua imo pe a hetalaulau iri nenge tepoi porekreke imo aria.

²⁹Nenge teke mele te pele iong o hulia hengem ele lange i ke te pele pule. Pe nenge teke mele achatote lem hengeron nenge hot ana, o ngata mana ke mene lem hengeron nenge teu ana pule.

³⁰Nenge teke mele hel te onteia iong nga ute hel, o tung mene lange iri pe nenge teke mele mene lem ute o ontei haka mule i ero ol.