Luke 6:15-30

¹⁵Matthew an Thomas, James wa been Alphaeus boy, an Simon wa been call de Patrot,

¹⁶an Judas wa been James boy, an Judas Iscariot, wa ton Jedus een fa money.

¹⁷An Jedus come down de hill wid e postle dem. E gone an stan weh de groun been lebel, an plenty oda e ciple dem been wid um. An a whole heapa people geda dey. Dey come fom all oba Judea an fom Jerusalem, an some come fom dem town close ta de sho een Tyre an Sidon. Dey come fa yeh Jedus an fa hab um heal um.

¹⁸Fodamo, dem wa hab ebil sperit come an git heal.

¹⁹Ebrybody beena try fa tetch Jedus, cause powa beena come out fom um. An dat powa heal all ob um.

²⁰Jedus look at e ciple dem an tell um say, “Oona bless fa true, oona po people, cause God da rule oba oona.

²¹Oona bless fa true, oona wa hongry now, cause God gwine gii oona all oona wahn fa nyam. Oona bless fa true, oona wa da cry now, cause oona gwine laugh later on.

²²Oona bless fa true, wen people hate oona, wen dey ain wahn hab nottin fa do wid oona an hole oona cheap, wen dey say oona ebil. Oona bless fa true, wen dey do all dat cause oona da folla de Man wa Come fom God.

²³“Mus be heppy wen de time come wen de people do oona dat way. Jomp op wid joy den, cause oona gwine git a whole heapa good ting dat God da keep fa oona een heaben. Mus memba dat de people wa gwine mek oona suffa dem ting yah, dey ole people done done de same ting ta dem wa God been sen fa gii e wod.

²⁴“Bot e gwine be a haad time fa oona wa got plenty now, cause oona done hab ebryting easy een dis life yah.

²⁵E gwine be a haad time fa oona wa da nyam all wa oona wahn now, cause de time gwine come wen oona gwine be hongry. E gwine be a haad time fa oona wa da laugh now, cause oona gwine be too saary an cry.

²⁶E gwine be a haad time fa oona wen ebrybody da praise oona. Dat de same ting oona ole people done done ta dem wa say dey God prophet bot dey ain been fa true.

²⁷“Bot A da tell oona wa yeh wa A say, mus lob ya enemy dem. Mus do good ta dem wa hate ya.

²⁸Mus aks God fa bless dem wa cuss ya, an mus pray fa dem wa do ya bad.

²⁹Ef anybody knock one side ob ya face, mus ton de oda side an leh um knock dat side too. Ef somebody tek ya coat, mus gim ya shat too.

³⁰Ef somebody aks ya fa sompin, mus gim. An ef somebody tief sompin wa blongst ta ya, mus dohn aks um fa gim back.