Luku 4:14-30

¹⁴Dokopa Oli Sipitisa dokome Jisasa pupu lasoo kateamopa, Galili yuu dokonya pilyoo pea-pyaa. Dokome baanya lao pii lapae mende Galili yuu doko pitakanya taya-pyaa.

¹⁵Baame nyakamanya losuu anda dupanya mana lamaiyamopa endakali pitakame baa lao tama piami-pyaa.

¹⁶Dokopa endangi takangepame baa wane kolesa wambao isiambino yuu Nasatete dokonya dee pilyia-pyaa. Pilyetala koto Sambasa dii lao Jutamanya losuu andaka pengeli pyoo baame losuu anda dokonya pao kolandatala Gotenya pii dupa itaki pyao lamaiyanya toya katea-pyaa.

¹⁷Dokopa dokaitame potopesa Aisayanya pepa pyapae doko baa maiyaminopa baame pepa doko tata lapala pii dokonya mende kutao kandatala dapa lao itaki pia-pyaa:

¹⁸“Kamongo dokonya Oli Sipitisa dokome namba isilyamo. Nambame endakali tipya dupa Wai Pii Epe doko lamaipi lao baame yapao nyia. Baame namba puu lao pituu: ‘Endakali anjetae palenge dupa Goteme mokao nyepelyamona, endakali lenge koo dupa Goteme lenge tasetekelyamona lao pii lamaiya puu lea. Dee endakali kenda pipaenya anjetae joo katenge dupa nambame mokao nyala puu lea.

¹⁹Kamongo dokome baanya endakali dupa pyoo nyotona lao gii seteamo doko lao panala puu leana,’” lao Jisasame itaki pia-pyaa.

²⁰Itaki pyatala pepa doko lakao yaki petala isingi akali doko maiya-pyaa. Maitala peteamopa endakali losuu andaka peteamino dupa pitakame baa iki kandokondape piami-pyaa.

²¹Dokopa baame pii waipa soo dupa lamaiyoo, “Nambame pii itaki pyao lapupa salamino gii dakepa pii doko kiningi jetelyamona,” lea-pyaa.

²²Dopa leamopa baanya pii tende pipae dupa soo mona andapala baanya iki lakamaiyoo, “Akali dake Josepenyaka ikiningi daa kandamuape?” leami-pyaa.

²³Dokopa baame dokaita lamaiyoo, “Nyakamame namba kandao pii mana dapa lao kapa pao laapimino: ‘Dokosaa, embame emba tangenya yaina doko mee injisepe,’ laapimino. Dee nyakamame Kapaneame yuu dokonya kalai tata wamba sakateamo dupanya atome pii dupa sepala namba kandao, ‘Dopaka pyoo embanya yuu tenge dakenya pipi!’ latamina,” lea-pyaa.

²⁴Dopa latala baame lao pituu, “Nambame nyakama kiningi langilyona, potopesa mendeme baanya yuu tenge dokonya katao pii lao panelyamopa dokaitame baa lanyala naengema.

²⁵Nambame kiningi etete nyakama langilyona, wamba akali Ilainja kateamo gii dokopa Isataele yuu dupa pitakanya ee kana tepoma-kisa dee kana tokange dupanya aiyuu naipao painaka piamopa lopo andake mende sia-pyaa. Yuu dokonya enda walyakae longo peteami-pyaa.

²⁶Peteaminoaka doko, Goteme akali Ilainja doko enda dupanya mendaipi mende-kisa pena laa naya-pyaa. Goteme baa Saitone yuu yakane Satepata yuu dokonya enda walyakae mende peteamo dokonya pena lea-pyaa.

²⁷Dee potopesa Ilaisa kateamo gii dokopaka Isataele yuu dokonya endakali kopetali longo kateamino dupanya mendaipi mendenya kopetali doko mee nanjiamopa, Sitia tange akali Nemane lenge dokonya yonge doko iki Goteme mee injisia-pyaana,” Jisasame dopa lea-pyaa.

²⁸Dopa leamopa losuu anda dokonya endakali peteamino dupa pitakame pii dutupa sepala moname imbumi kumiami-pyaa.

²⁹Imbu kayao, sakatatala yuu taono dokonya Jisasa watao netesa nepalanya soo tuu lao peami-pyaa. Yuu taono doko yuu manda mendenya siamopa dokonya nete papatale menda-kaita laminao pao soo pyale lamana lao masiami-pyaa.

³⁰Dopa lao masiaminoaka doko, Jisasame dupanya kainanya langate petala pea-pyaa.