San Lucas 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Espíritu Santo qui³sˀe³jin³ ni⁴ma⁴-le⁴ Jesús. Ji³nčhoa³ nqui²jnco³cˀa²-ni³ nta¹je⁴ Jordán, je² Espíritu qui³cao⁴ jnco³ ˀnte³tˀa³xin²tˀa³.

²Ña³chan³ ni⁴čhjin³ je² nai⁴² coan³me³-le⁴ nca³ chˀao³ si⁴²cao⁴ Jesús. Li²jme³ xi³ tsa³cjen² coi³ ni⁴čhjin³-ve⁴. Cˀia⁴ nca³ je³tˀa³ ni⁴čhjin³-ve⁴, coan³vao³-le⁴.

³Cˀia⁴ je² nai⁴²-ve⁴ qui³tso²-le⁴: Tsa² ˀnti¹-le⁴ Ni³na¹ ni¹³ ji³, cˀoa⁴tˀin²-lai⁴ je² la⁴jao⁴-vi⁴ nca³ nio⁴xti²la⁴ ca²ta³ma³.

⁴Jesús qui³tso²-le⁴: Tji¹tˀa³: A³li² to⁴cao⁴ nio⁴xti²la⁴-jin² cˀoe¹jna³con³-ni³ cho⁴ta⁴, to⁴nca³ cao⁴ nca³yi³je³ en¹-le⁴ Ni³na¹.

⁵Cˀia⁴ je² nai⁴² qui³cao⁴ Jesús ya⁴ jnco³ ni³nto³ncˀa³. To⁴jnco³ tjo² tsa³ca³co¹-le⁴ nca³yi³je³ ˀnte³ cjoa⁴te¹xo³ma³-le⁴ son³ˀnte³.

⁶Je² nai⁴²-ve⁴ qui³tso²-le⁴: Ji³ tsjoa³-le²³ nca³yi³je³ je² nca³nˀion¹-vi⁴, cˀoa⁴ cjoa⁴je³ya³-le⁴, nca⁴ an³ tsa³cˀai²-na³, cˀoa⁴ je² xi³ me³-na³ tsjoa³-le⁴.

⁷Cˀia⁴ tsa² ji³ coi⁴sen⁴xco¹nchˀin³tˀa³-nai¹³, jcha⁴xcon¹-nai¹³, tsi⁴ coan⁴ nca³yi³je³.

⁸Cˀoa⁴ Jesús qui³tso²-le⁴: Ti⁴sen⁴xin²-nai¹³ Satanás, nca⁴ cˀoa⁴-sˀin² tji¹tˀa³ xon⁴: Je² Ni³na¹-li⁴ coi⁴sen³xco¹nchˀin³tˀa³-lai⁴, jcha⁴xcoin¹³, cˀoa⁴ to⁴je² to⁴jnco³ xi³ si⁴xa¹-lai⁴.

⁹Cˀia⁴ nai⁴²-ve⁴ qui³cao⁴ Jesús ya⁴ Jerusalén, cˀoa⁴ qui³si³cˀe¹jna³son² ja⁴son²ncˀa³-le⁴ yo⁴nco⁴ qui³tso²-le⁴: Tsa² ˀnti¹-le⁴ Ni³na¹ ni¹³ ji³, chji¹³jen³nqui³ tˀa³na³nqui³.

¹⁰Nca⁴ cˀoa⁴-sˀin² tji¹tˀa³: Ni³na¹ cˀoe⁴²xa¹-le⁴ a²ncje⁴-le⁴ jme¹-ni³ nca³ si⁴²coi²nta⁴-si¹ni³li².

¹¹Cˀoa⁴ je² ntsja³ sco¹mi³tjen⁴-ni³li², jme¹-ni³ nca³ la⁴jao⁴-ve⁴ li²coi³ sa⁴te¹nqui³-si¹ni³ ntso⁴coi³.

¹²Cˀoa⁴ Jesús qui³tso²-le⁴: Cˀoa⁴tso²: A³li² chˀao³ cho¹tˀa³-jin²³ je² Nai³-li⁴ Ni³na¹-li⁴.

¹³Cˀia⁴ nca³ je³tˀa³ nca³yi³je³ cjoa⁴-ve⁴ xi³ chˀao³ cho²tˀa³-le⁴ Jesús, je² nai⁴² qui³xin²-le⁴ jnco³ tji¹cja¹ ni⁴čhjin³.

¹⁴Cˀoa⁴ Jesús ja³ˀai³ cao⁴ nca³nˀion¹-le⁴ Espíritu Santo ya⁴ Galilea, qui³son² en¹ xi³ tˀa³tsˀe⁴ nca³qui³jnta² son³ˀnte³ xi³ tjio¹ntai³-le⁴.

¹⁵Tsa³ca³co¹ya³ ya⁴³ ntˀia³ sinagoga xi³ tsˀe⁴. Nca³tsˀi³ tsˀa³sje³je³ya³ Jesús.

¹⁶Ja³ˀai³ Nazaret ya⁴ ˀnte³ jña³ nca³ coan³jcha¹. Jo³-sˀin² nca³ tjin¹ costumbre-le⁴ je² ni⁴čhjin³ ni²cja¹ya³, ja³ˀa³sˀen³ ya⁴³ ntˀia³ sinagoga. Tsa³ca³sen²nto³ nca³ tsa³cˀe¹xquia⁴.

¹⁷Tsa³cˀai²-le⁴ xon⁴-le⁴ Isaías xi³ qui³nchja⁴ya³. Cˀia⁴ nca³ qui³sco³ˀai² xon⁴, coan³sjai³-le⁴ jña³ nca³ tji¹tˀa³ en¹ xo⁴ tso²:

¹⁸Je² Espíritu-le⁴ Nai³-na¹ ti¹jna³cao⁴-na³, nca⁴ qui³tsjon²jon³-na³ tˀa³tsˀe⁴ xa¹ nca³ an³ nchja²ya³jin³-le⁴ xi³ yo⁴ma⁴ je² en¹nta³. Qui³si³ca³sen¹-na³ nca³ si³nta³ya³ cho⁴ta⁴ xi³ cjoa⁴ˀaon³ tjio¹jin³ ni⁴ma⁴-le⁴, nca³ coi³nchja²ya³jin³-le⁴ preso nca³ coa⁴tio⁴ntai¹, cˀoa⁴ cao⁴ je² xi³ xca⁴ cjoan³ nca³ coan⁴tsen³-le⁴ xcon⁴, nca³ si³cˀe¹yo³ntai¹ xi³ qui³ni²quin²ˀaon³.

¹⁹Nca³ coi³nchja²ya³ je² no¹ cˀia⁴ nca³ coan⁴tsen³ cjoa⁴nta³-le⁴ Nai³-na¹.

²⁰Tsa³ca³xco¹ya³cjao³-ni³ xon⁴, qui³tsjoa³-le⁴ je² xi³ si¹coi²nta⁴ xon⁴, cˀoa⁴ tsa³cˀe²jna³. Je² xcon⁴ nca³tsˀi³ tjio¹co³ˀa³ nca³ je² ya⁴³ ntˀia³ sinagoga.

²¹Jesús tsa³cˀe¹tsˀia⁴cao⁴ nca³ qui³tso²-le⁴: Ntˀai⁴-vi⁴ je³coan³jnco³ jo³ tso² je² xon⁴-vi⁴ nca⁴ je³ca²no²ˀyao²³.

²²Cˀoa⁴ ña³qui³ nta³ qui³nchja⁴ nca³tsˀi³ xi³ tˀa³tsˀe⁴. To⁴coan³xcon¹-le⁴ je² en¹ xi³ nˀion¹ tjin¹-le⁴ cjoa⁴nta³ jo³-sˀin² nca³ qui³nchja⁴-ni³ tsˀoa³, cˀoa⁴qui³tso²: A³ tsi² tsa² je²-vi⁴ ˀnti¹-le⁴ José.

²³Cˀia⁴ Jesús qui³tso²-le⁴: Xi³ cjoa⁴qui²xi⁴ cˀoa⁴cˀoin¹-nao¹³ je² en¹ xo⁴ tso²-vi⁴: Chji⁴ne⁴xqui³, ti⁴xqui³-lai⁴ yao³-li⁴ nca³ ti⁴ji³-ni³. Xi³ cˀoa⁴to⁴xcon¹ tjin¹ cjoa⁴ xi³ qui³no²ˀyai²⁴-jin⁴ xi³ tsa³cˀe²ntai³ ya⁴ Capernaum, cˀoa⁴-ti⁴ tˀiain⁴ i⁴ ˀnte³-vi⁴ xi³ tsi⁴.

²⁴Cˀoa⁴ Jesús qui³tso²-sa³: Xi³ cjoa⁴qui²xi⁴ xi³ xin³-no³, nca³ ni⁴jnco³-jin² cho⁴ta⁴ xi³ nchja⁴ya³ tˀa³tsˀe⁴ Ni³na¹, xi³ nta³ ˀya³xcon¹ ya⁴ na³nqui³-le⁴.

²⁵To⁴nca³ cjoa⁴qui²xi⁴ xi³ xin³-no³, cjai¹nca³ to⁴tjin¹ ya¹nchjin¹ xi³ cˀen³ xˀin⁴-le⁴ ya⁴ Israel cˀia⁴ nca³ ni⁴čhjin³-le⁴ Elías, cˀia⁴ nca³ qui³sˀe³chjoa² ncˀa³jmi³ jan² no¹ va³sen³, nca³ ni⁴jme³-jin² jtsi¹ qui³tsjoa³. Cjai¹nca³ tse³ coan³cji³nčha¹-le⁴ nca³qui³jnta² na³nqui³.

²⁶To⁴nca³ ni⁴jnco³-jin² xi³ coi³ xi³ Elías qui³cha³ni²tˀa³-le⁴. To⁴jnco³ chjon⁴² xi³ cˀen³ xˀin⁴-le⁴ xi³ qui³cha³ni²tˀa³-le⁴ ya⁴ Sarepta tsˀe⁴ Sidón.

²⁷Cjai¹nca³ to⁴tjin¹ xi³ ti¹fi³ˀnto³jon³ yao³-le⁴ ya⁴ Israel coi³ ni⁴čhjin³-le⁴ Eliseo xi³ qui³nchja⁴ya³ tˀa³tsˀe⁴ Ni³na¹, to⁴nca³ ni⁴jnco³-jin² xi³ je² coan³tsje³, to⁴je² Naamán xi³ tsˀe⁴ Siro.

²⁸Cˀia⁴ nca³tsˀi³ ya⁴³ ntˀia³ sinagoga nˀion¹ coan³jti³-le⁴ nca³ qui³nčhˀoe¹ je² cjoa⁴-vi⁴.

²⁹Ji³so¹tjen⁴ nca³tsˀi³, qui³tsˀaon³sje³jin³ Jesús ya⁴ na⁴xi⁴na³nta¹-ve⁴, cˀoa⁴ qui³cao⁴ sa³ˀnta³ jco⁴ ni³nto³ jña³ nca³ qui³sˀe³jna³ na⁴xi⁴na³nta¹-le⁴. Cho⁴ta⁴-ve⁴ me³-le⁴ si⁴²cˀa³tjen⁴jin³ na⁴xi⁴ jña³ nˀion¹ tˀa³jen³tˀa³.

³⁰To⁴nca³ Jesús ja³ˀa³to³jin³va³sen³-le⁴. Qui³.

³¹Qui³jen³ ya⁴ Capernaum, na⁴xi⁴na³nta¹ xi³ nchja⁴-ni³ ˀnte³ Galilea. Tsa³ca³co¹ya³-le⁴ nca³ ni⁴čhjin³ ni²cja¹ya³.

³²Cho⁴ta⁴ to⁴coan³xcon¹-le⁴ cjoa⁴fa³ˀai³tsjen³-le⁴ nca⁴ en¹-le⁴ nˀion¹ tjin¹-le⁴ nca³nˀion¹.

³³Ya⁴³ ntˀia³ sinagoga-ve⁴ ti¹jna³ jnco³ cho⁴ta⁴ xi³ tjin¹-le⁴ ntjao⁴ xi³ tsˀe⁴ nai⁴² xi³ nta³jin³. Nˀion¹ qui³nchja⁴ cho⁴ta⁴ xo⁴cji³-ve⁴.

³⁴Qui³tso²: A³li² cˀoa⁴-jin² ni²cao⁴-na³jin⁴. Jme¹ xi³ tjin¹-na¹ xi³ cao⁴ ji³, Jesús nazareno. A³ ca²fa²ˀai⁴ ni²cji³tson¹-na³jin⁴. An³ ˀve³-le²³ ˀya³-ni³ve⁴ ji³. Ji³ ni¹³ xi³ tsjai³ xi³ tsˀe⁴ Ni³na¹.

³⁵Jesús qui³nchja⁴ti³cao⁴, cˀoa⁴ qui³tso²: Jyo¹ ti⁴jnai³, cˀoa⁴ ti²tjo⁴xin²-lai⁴. Cˀia⁴ je² nai⁴²-ve⁴ qui³tson³tsja¹tˀa³ na³nqui³ ya⁴ jin³va³sen³-le⁴. Ji³tjo³xin²-le⁴ to⁴nca³ li²coi³ qui³si³qui²ˀaon³ cho⁴ta⁴-ve⁴.

³⁶Qui³tsa³cjon¹-le⁴ nca³tsˀi³ nca³ˀi⁴ nca³jan¹ qui³nchja⁴cao⁴ xi¹ncjin¹: Jme¹ en¹-ni³ je²-vi⁴ nca⁴ cao⁴ cjoa⁴te¹xo³ma³, cˀoa⁴ cao⁴ nca³nˀion¹ va³te¹xo³ma³-le⁴ ntjao⁴ xi³ nta³jin³, cˀoa⁴ vi³tjo³.

³⁷Qui³son² en¹ xi³ tˀa³tsˀe⁴ Jesús nca³qui³jnta² ˀnte³ xi³ ti¹jna³ntai³.

³⁸Cˀia⁴ ji³so¹tjen⁴ Jesús nca³ coi⁴tjo³ ntˀia³ sinagoga, ja³ˀa³sˀen³ ntˀia³-le⁴ Simón. Na⁴cha¹-le⁴ Simón ti¹mˀen³, chˀin³ tjin¹-le⁴. Cho⁴ta⁴ tsa³cˀe¹tsˀoa³-le⁴ Jesús xi³ tˀa³tsˀe⁴ nca³ je².

³⁹Jesús tsa³cja³te³ne²-le⁴. Qui³scan³cao⁴ ntˀai⁴, cˀoa⁴ ji³tjo³xin²-le⁴ ntˀai⁴-ve⁴. Cˀoa⁴ je² chjon⁴²-ve⁴ ji³so¹tjen⁴ nti⁴ton⁴, qui³si³sin³-ni³le⁴ xi³cˀa³.

⁴⁰Cˀia⁴ nca³ qui³sca³ntjai² tsˀoi¹, nca³tsˀi³ xi³ tjin¹-le⁴ xi³ tjio¹mˀen³ xi³ cja⁴ˀai¹cja⁴ˀai¹ chˀin³-le⁴, ja³ˀai³cao⁴-le⁴ Jesús. Jesús tsa³ca¹yo³son²-le⁴ ntsja³ nca³ jnco¹jnco¹. Cˀoa⁴-sˀin² qui³si³nta³-ni³.

⁴¹Cˀoa⁴-ti⁴ je² nai⁴² xi³ nta³jin³ ji³tjo³-le⁴ xi³ ncjin² cho⁴ta⁴. Qui³squi³ˀntia¹, qui³tso² ntjao⁴-ve⁴: Ji³ ni¹³ ˀnti¹-le⁴ Ni³na¹. To⁴nca³ Jesús qui³scan³cao⁴, li²coi³ qui³tsjoa³ˀnte²-le⁴ nca³ coi⁴nchja⁴, nca⁴ ve³ nca³ je² xi³ Cristo.

⁴²Xi³ je³qui³sˀe³sen¹, ji³tjo³ Jesús. Cˀoa⁴ qui³ jña³ ˀnte³tˀa³xin²tˀa³. Cˀoa⁴ cho⁴ta⁴ncjin² tsa³ca¹sjai³. Ja³ˀai³con³-le⁴. Coan³me³-le⁴ nca³ si⁴²cˀe¹jna³nˀion¹ nca³ tsi² tsa² coi³ coai⁴tˀa³xin²-le⁴.

⁴³To⁴nca³ Jesús qui³tso²-le⁴: Cˀoa⁴²-ti⁴ xi³ xin²-sa³ na⁴xi⁴na³nta¹ ma³chjen¹ nca³ coi³nchja²ya³ je² en¹nta³ xi³ tˀa³tsˀe⁴ cjoa⁴te¹xo³ma³-le⁴ Ni³na¹ nca⁴ coi³ xa¹ ji³nčhoa³-nia³.

⁴⁴Cˀoa⁴ ti¹nchja⁴ya³ ya⁴³ ntˀia³ sinagoga ya⁴ ˀnte³ Galilea.