Luku 24:14-20

¹⁴Akali dolapome kaitinisa pao pituu piamo dupanya lao laloo pyoo peambi-pyaa.

¹⁵Dokopa Jisasame akali dolapo watanyetala awapa peami-pyaa.

¹⁶Peaminopa mendita mendeme akali dolaponya lenge nyiamosa doko Jisasa lamona lao nakandeambi-pyaa.

¹⁷Dokopa baame dolapo pisoo, “Nyilyambome aki pii mende laloo pyoo pelyambipi?” lea-pyaa. Dopa leamopa akali dolapome katapala mona kenda kayao enomba kumiambi-pyaa.

¹⁸Dopa petala akali dolaponya mende kenge Kiliopasa lenge dokome baanya pii yanu pyao, “Endakali Jetusaleme katenge dupa pitakame kuaka alembopi gii dupanya pipumu dupa kandao soo katapumana emba iki nasipipi?” lea-pyaa.

¹⁹Dopa lateamopa baame akali dolapo pisoo, “Dupa aki mendapuape?” lea-pyaa. Dokopa akali dolapome pii yanu pyakamaiyoo, “Akali Nasatete tange Jisasa lenge doko-kisa pipumu dupa lao lelyambano. Baame kalai pupu lapaepi pii pupu lapaepi dupa endakali pitakanya lengelyaapipi Gotenya lengelyaapipi dupanya panao pyoo katea. Baa akali potopesa mende lamo.

²⁰Kini, wambao naima Isataele dupa baame pyoo nyala epeana lao masoo kateama. Dopaka doko, naimanya isingi akalipi pitisa mupapi dupame kapomaneme baa kosimi latala pyao kumasina lao maiyami. Maitiaminopa dupame baa ita pokonya pyao yukuoteaminopa, indupa koto tepo jilyamo.