LUKU 18:8-29

⁸Matɛn oárɛ, ani zɛ kũńwomɛ gↄ̃̀nↄ. Bee kũ abireo tó Bisãsiri Nɛ́ sù, ani a náanikɛri e andunia gũn yá?

⁹Akũ à ɛ̀ra à yã díkĩna lɛ̀kↄ̃a gbɛ̃ kũ òdi ń zĩda ditɛ mana ò ń gya bonↄnɛ.

¹⁰Gbɛ̃nↄn pla kenↄ mɛ́ ò gɛ̀ɛ adua kɛ Luda ↄnn, gbɛ̃ do bi Farisimɛ, gbɛ̃ do sↄ̃ bɛ'ↄgↄsirii.

¹¹Farisi pì zɛna, àtɛn adua kɛ. À pì a swɛ̃̀ɛ gũn: Luda, ma n sáabu kɛ̀ kũ má de lán gbɛ̃ kparanↄ bàro, dibidibikɛrinↄ, náanisaridenↄ, zinakɛrinↄ ke lán bɛ'ↄgↄsiri dí bà.

¹²Madìgↄ̃ lɛ́ yĩ gↄrↄ plapla azuma kũ azumaao. Pↄ́ kũ ma lè pínki madì a kuride bonnɛ.

¹³Bɛ'ↄgↄsirii pì sↄ̃ zɛ dire, adi fↄ̃ à wɛ́ sɛ̀ à musu gwà sero. À a zĩda kɛ̃̀kɛ̃ à pì: Luda, ǹ sùru kɛ kũmao, durunnakɛriimɛ ma ũ.

¹⁴Matɛn oárɛ, gↄ̃gbɛ̃ pìi tà a bɛa Luda yãsinakãaoo gũmmɛ, adi kɛ Farisi pìinlo. Zaakũ gbɛ̃ kũ àdi a zĩda kara, Luda ni a busa. Gbɛ̃ kũ àdi a zĩda busa sↄ̃, Luda ni a kara.

¹⁵Òtɛn su Yesunɛ kũ ń nɛ́ fítinↄ de à ↄ naḿma. Kũ a ìbanↄ è lɛ, akũ ò gìńnɛ.

¹⁶Akũ Yesu nɛ́nↄ sìsi à pì: À tó nɛ́nↄ su ma kĩnaa, àsun gíńnɛro, zaakũ ń takanↄ pↄ́n kpata kũ à bò Luda kĩnaa ũ.

¹⁷Yãpuran matɛn oárɛ, gbɛ̃ kũ ani kpata kũ à bò Luda kĩnaa sí lán nɛ́ fíti bàro ni gɛ̃nlo.

¹⁸Gbãnade ke sù à Yesu là à pì: Dannɛri mana, deran mani kɛ mà wɛ̃̀ndi kũ àdi lákaro lee?

¹⁹Yesu pìnɛ: À kɛ̀ dera n pì, má manaa? Gbɛ̃ke manaro, sé Luda ado.

²⁰Ń dokanↄ dↄ̃: Ǹsun zina kɛro, ǹsun gbɛ̃ dɛro, ǹsun kpãni oro, ǹsun yã dí n gbɛ̃dakearo, ǹgↄ̃ bɛ̀ɛrɛ lí n de kũ n daonɛ.

²¹Akũ à pìnɛ: Zaa ma nɛ́ fíti gↄrↄa má yã birenↄ kũna pínki.

²²Kũ Yesu yã pìi mà, à pìnɛ: Yã mɛ̀n do mɛ́ à gↄ̃̀nnɛ. Ǹ pↄ́ kũ ń vĩnↄ yía pínki, ǹ a ↄgↄ kpá takasidenↄa, ĩnigↄ̃ aruzɛkɛ vĩ ludambɛ. Abire gbɛra ǹ mↄ́ ǹ tɛ́mai.

²³Kũ à yã pìi mà, a nɛ̀sɛɛ yàka, zaakũ aruzɛkɛzↄ̃kↄ̃demɛ.

²⁴Kũ Yesu a gwà, akũ à pì: À zĩ'ũ manamana aruzɛkɛdenɛ à gɛ̃ kpata kũ à bò Luda kĩnaa gũn.

²⁵Lakumi gɛ̃na pↄrↄwɛɛn araga de aruzɛkɛde gɛ̃na kpata kũ à bò Luda kĩnaa gũnla.

²⁶Akũ gbɛ̃ kũ ò yã pìi mànↄ pì: Tó lɛmɛ, dí mɛ́ ani fↄ̃ à surabana lee?

²⁷Yesu wèḿma à pì: Yã kũ bisãsiri fùa à kɛ, Luda kĩnaa àdi sí kɛ.

²⁸Akũ Pita pì: O beebↄ pínki tò o tɛnyĩ.

²⁹Akũ Yesu pìńnɛ: Yãpuran matɛn oárɛ, gbɛ̃ kũ à a bɛ tò ke a nanↄ ke a vĩ̀ninↄ ke a dakũnanↄ ke a de ke a da ke a nɛ́nↄ kpata kũ à bò Luda kĩnaa yãi,