Luk 18:8-29

⁸Ic-lok’un: Ɔfɔdesɔŋɛ ŋa kəwon kəkar, endebocɛ ŋa kiti katəna-katəna. Mba kɔ Wan ka fum endeder-ɛ, endebəp kəlaŋ doru ba?»

⁹Kɔ Yesu oloku sɔ capafɔ ncɛ afum alɔma aŋɛ ŋanacɛm-cɛmnɛ kəlomp, a ŋac-fəfərəs akɔ mɔ:

¹⁰«Kɔ afum mɛrəŋ ŋampɛ kəkɔ-tola Kanu nde kəlɔ kəpɔŋ ka Kanu; wəkin nwɛ pəyɔnɛ wəFarisi, wəkɔ pəyɔnɛ wəwerəs dut.

¹¹WəFarisi nwɛ pəcəmɛ pəc-lok-lokər Kanu dɛbəkəc ntɛ: ‹Kanu, iyek-yekəs’əm ntɛ intɔyi pəmɔ afum aləpəs akɔ ŋayɔnɛ abaŋəs ca ya afum mɔ, ta ŋalomp, ŋac-sumpər dalakɔ, kɔ intɔyi pəmɔ wəwerəs dut nwɛ mɔ.

¹²Kəmɛrəŋ k’iŋsuŋ dɔsɔk doluksər disrɛ, ic-sɔŋ sɔ farilɛ fəp fa yɔsɔtɔ yem.›

¹³Wəwerəs dut nwɛ nkɔn pəcəmɛ pəbɔlɛ, pəc-nesɛ kəyekti fɔr dareŋc yati, mba pəc-sut-sutnɛ abəkəc kəc-loku: ‹Kanu məŋaŋnɛn’em, ina wəciya!›

¹⁴Ic-lok’un: Fum wəkakɔ ɛnalomp nnɔ Kanu kəyi mɔ, a k’endelukus nde ndɔrɔn; mba wəFarisi ɛnalomp fɛ nnɔ Kanu kəyi mɔ. Nwɛ o nwɛ ɛlɛknɛ, andetorɛ kɔ; nwɛ o nwɛ otontnɛ, andepɛnɛ kɔ.»

¹⁵Afum ŋac-kɛrɛ Yesu ali cənaka ntɛ tɔŋsɔŋɛ pəc-deŋər ŋa waca pətolanɛ ŋa mɔ. Ntɛ acɛpsɛ ɔn darəŋ ŋanəŋk ti mɔ, kɔ ŋaŋgbəŋ-gbəŋər ŋa.

¹⁶Mba kɔ Yesu ɔlɔtərnɛnɛ awut pəc-loku: «Nəce awut ŋader nnɔ iyi mɔ! Ta nəmɔnɛ ŋa, bawo dɛbɛ da Kanu, aŋɛ ŋayi pəmɔ awut mɔ, ŋayɔ ŋi.

¹⁷Awa! Ic-lok’un nwɛ o nwɛ ɔntɔbaŋ dɛbɛ da Kanu pəmɔ wan wəfɛt mɔ, ɔfɔbɛrɛ ŋi disrɛ few!»

¹⁸Kɔ wəbɛ wəlɔma eyif kɔ: «Wəbɛ wətɔt, cəke cɔ pəmar’im kəyɔ, isɔtɔ kəyi wəyeŋ katina-ɛ?»

¹⁹Kɔ Yesu eyif kɔ: «Ta ake tɔ məŋwen’em «Wətɔt»-ɛ? Ali fum ɔyɔnɛ fɛ wətɔt, mɛnɛ Kanu gbəcərəm.

²⁰Məŋcərɛ mosom ma Kanu: Ta məsumpər dalakɔ; ta mədif fum; ta məkiyɛ; ta məbaŋɛ fum yem disrɛ; məleləs akombəra am- papa kam kɔ iya kam.»

²¹«Iŋcəmɛ mamɔkɔ fəp darəŋ kəyɛfɛ ntɛ inafɛtɛ mɔ,» fum wəkakɔ pəc-loku.

²²Ntɛ Yesu ene kɔ dim mɔ, k’oloku kɔ: «Awa tes tin tobut’əm: Məcaməs daka dam, məyer pəsam papɔkɔ atɔyɔ daka, məndekɔ-sɔtɔ daka dɔpɔŋ nde dareŋc. Kɔ tɛyɛfɛ dənda-ɛ, məder məcɛps’em darəŋ.»

²³Ntɛ fum nwɛ ene moloku ma Yesu mɔ, kɔ abɔc ŋɛmbɛrɛ kɔ, bawo ɛnayɔ daka dɛlarəm.

²⁴Ntɛ Yesu ɛnəŋk kɔ abɔc ŋɛmbɛrɛ kɔ mɔ, k’oloku: «Pəŋcuca aka daka kəbɛrɛ ka dɛbɛ da Kanu dəntɔf.

²⁵Pəfəfərɛnɛ yɔkɔmɛ kəbɛrɛ ka abi ŋa tɛsɛmbɛ pətas wəka daka kəbɛrɛ ka dɛbɛ da Kanu dəntɔf.»

²⁶Aŋɛ ŋaŋc-cəŋkəl Yesu mɔ ŋayif kɔ: «Anɔ antam oŋ kəyac-ɛ?»

²⁷Kɔ Yesu oloku ŋa: «Ntɛ tɛntambər afum mɔ, Kanu kəntam ti.»

²⁸Kɔ Piyɛr oloku: «Səna səsak daka dosu kɔ səŋcəm’am darəŋ.»

²⁹K’oloku ŋa: «Awa! Ic-loku nu kaŋce: Fum eyi fɛ, nwɛ ɛŋsak kəlɔ kɔn, wəran kɔn, wɛŋc, akomɛnɛ ɔn, kɔ awut ɔn teta dɛbɛ da Kanu,