Luk 18:8-29

⁸Jo katiye tado kamwenen, iy kameh anuhun sahou toro ma sebenei oro suwi labai! Arile, i buku none jo Nadu Ndramak Awas keme hamon keme kon munyak dah ja, jo kameh winiyan silahei iri mwan ma badih nane atehei budon tiri handru in tek, deh bwe?”

⁹Eme Jises tiye sahou sokek dah, i toro lau anya oro le mwasin, oro an hamon ta kandriyen malen mari, ya oro badeh, anyolom ndra-in i tiri lau buku liliy.

¹⁰Eme iy anya, “Uru lau la-uh badeh, ala bolo asiu tinan ta Kindrei, amekes salom. Iy ari badeh, Parasi, ya iy ari ja badeh, ndramak ta akohok luk ta takis.

¹¹Eme iy Parasi dah, ales ere loken asolom i badan le, i buku doh, ‘Jo edeu wurah ewek tam Kindrei, ta jo badeh, bala buku none iri lau mari ta ndrakok, hawe bala buku none iri lau ta nyaladan, hawe lau ta amekes madasarah kede-eh, bwe. Ma hawe bala buku none ndramak ta akohok luk ta takis kede-eh, bwe.

¹²Ya jo badeh, abeles jo san la-uh la-uh, udu bolo wik ari ari, ma hawe udu bolo iri lakou tek ronoh, ronoh mari, jo edeu ari ari badu bolo iri lakou doh, ewek tam.’

¹³“Arile, ndramak ta akohok luk ta takis dah, udu len badeh, ales ere loken ma kandrun i andri, ma hawe minen udu aden, anya, ‘Kindrei, ou tikisi jo, jo ndramak ndra-in ta karei ma lomondra ndra-in.’

¹⁴“Jo katiye tado kamwenen, iy Parasi, bwai, arile ndramak ta akohok luk ta takis dah kameh iu i hamon i asiu tan, ma iy kameh udu mwasin ta mada Kindrei. Eme ya i buku none, are lau atudun iy le, idah kameh, iy ari nyaran bwe, ya i buku none are lau batudun iy bwe, idah kameh nyaran i tinan.”

¹⁵Eme ale iri lau atiye nadu iri bwisik ame hawe Jises ya iy kedeu minen le ki bada iri, ta edeu nyosowan ki tiri. Eme oro lau ta Jises anyolom badeh, oro abolosen i tiri.

¹⁶Arile, Jises luhi oro nah bwisik ame hawen ma iy tiye i toro lau tan, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.

¹⁷Jo tiye sahou handru ewek tado. I buku ado basahan buku none iri nah bwisik dah bwe, ado kameh winiyan bala bolo tondrok ta Kindrei bwe.”

¹⁸Ano ndramak ari ta atondrok eme ndremenya Jises anya, “Ndramak ta leheya, ou mwasin handru en. Jo kamekes saba kandriyen handru ya jo kakohok kohan mwasin ta ereu le buku doh len mari?”

¹⁹Eme Jises tiye i tan i buku doh, “Tasah handru ou aloh jo mwasin? Ari ndramak badeh, bala mwasin i buku none Kindrei bwe, Kindrei le ari, kabwe.

²⁰Ou tanam batanau ta Kindrei, ‘Ou samekes karei ta badih tasou, ou sadai ndramak samak, ou sabahana, ou sawasai. Arile, ou a-en bahandra tamam uru tinem, ma ou anuhun sahou turu.’”

²¹Eme ndramak dah anya, “Jo ma loweu eme taku dah, jo in hamon ta sahou batanau mari le ai.”

²²Eme Jises anuhun ano, iy tiye i tan, “Lakou ari le kahis. Ou atehei iri lakou tam mari kili ba-en, ya luk ou akohok ta iri lakou tam nane, ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”

²³Eme ndramak dah anuhun badeh, ma sa-ar asahan bwilin, ma iy tikisi labai, tasah tan lakou solo-an labai.

²⁴Eme Jises anyolom ndramak dah, ano iy anya, “Idah kameh, boto-on labai ta ndramak tan lakou solo-an, i buku none iy anya kili bolo tondrok ta Kindrei!

²⁵Handru labai, masakan boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja, ta kamel, i buku iy i bolo manamunu nunu.”

²⁶Eme oro lau anuhun sahou ta Jises badeh, oro anya, “Buku none i buku baden eh, are lau handru kameh winiyan akohok kohan mwasin ta ereu le buku doh?”

²⁷Eme Jises tiye i hamon i toro, “Saba lakou lau winiyan bamesekei bwe badeh, Kindrei winiyan mesekei.”

²⁸Ano Pita tiye i ta Jises anya, “Ou atou, aso ndraruwani lakou mari, ya aso ndra-en hamon tam.”

²⁹Eme Jises tiye i toro anya, “Jo tiye tado handru. Are lau abudon tondrok ta Kindrei, ma iy ruwani asiu tan, ya are lau ruwani udun oro hawe nadun oro, ma nadu tinen oro, ma taman oro hawe tinen oro ado kon ado gwek,