Luku 18:8-29

⁸Daa, baame dupanya pii yapa tolasakamaitana langilyo. Goteme dokaita nisoo pii yapa tolasakamaitamoaka doko, Endakalinya Ikiningi doko ipatamo gii dokopa masoo miningi endakali mende yuu dakenya katatamino baame kandata laape?” lea-pyaa.

⁹Yuu mendepa endakali yangimi nyakama tange tolataena lao masetala waka dupa kilya kandao kateaminosa Jisasame dokaita kandao kongali pii mende dapa lea-pyaa:

¹⁰“Akali Patasi mendepa muni takisa nyingi akali mendepa losuu anda andake dokonya loma sala peambi-pyaa.

¹¹Pupala Patasi dokome toya katao dapa lao moname loma sia-pyaa: ‘Endakali waka dupa pitakame oapi putiti kayao, mana setapae dupa nepao kepo kolao paengemali pyoo nambame napaengena, Gote emba lao yaka pilino lelyo. Dee namba muni takisa nyingi akali dapale joo nakalyo dokonya emba lao etete yaka pilino lelyoaka.

¹²Satete dii lao kote lapoma nambame emba lao masoo nee nanenya katenge. Munipi oapi nambame nyilyo dupa pitakanya kingi ita mende lao konjepala konjepae dokonya mende losuu andaka setengena,’ dopa lao loma soo katea-pyaa.

¹³Dopaka doko, takisa nyingi akali dokome lembasa waka yuu kandanatae katao kingi tukyoo dapa lao loma sia-pyaa: ‘Nambame mana koo miningina, Gote embame namba kondo kayape!’ lao loma sia-pyaa.

¹⁴Dopa piambi-pyaana nambame nyakama dapa langilyo: akali dolapome losuu anda andake doko yakinateambinopa, takisa nyingi akali doko Gotenya enombasa tolatae joo andaka pea-pyaa. Akali mende doko daa. Endakali mende tangeme alyasale joo katenge dupa Goteme minanya isa palyeta. Dee endakali mende tangeme anasala joo katenge dupa baame kenge minalyetana,” Jisasame lea-pyaa.

¹⁵Yuu mendepa endakali mendapuame wane wanakupi ŋaŋa dupa Jisasame watandena lao mandyuu epeami-pyaa. Dopaka doko, disaipele dupame dokaita kandatala pyalanya leami-pyaa.

¹⁶Pyalanya leaminopa Jisasame wane wanakupi koo dupa epena latala lao pituu, “Wane wanakupi koo dupa epekena kaita lyokala nayakalapa! Goteme wane wanakupi dapale joo kalyamino endakali dupa isoo kalyamo.

¹⁷Nambame nyakama kiningi langilyona, wane wanakupi koo dupame nyakama Goteme isina lao katengemali pyoo endakali mende nakatatamo kandao doko, baa kapa pao Goteme isina lao nakatatana,” lea-pyaa.

¹⁸Yuu mendepa Jutamanya isingi akali mendeme Jisasa kandao, “Emba mana lenge akali epe. Tenda namba lete etete katatopa lao aipa pyuape?” lao pisia-pyaa.

¹⁹Dokopa Jisasame baa lamaiyoo, “Aipuma embame namba kandao epena leepe? Endakali mendaipi mende epe daa. Gote baa iki epe.

²⁰Embame mana setapae datupa masilino: ‘Embame kepo kolala nayape. Embame endakali pyao kumasala nayape. Embame pake nala nayape. Embame endakali mende minakasalanya sambo laa nayape. Embanya endangi takangepa dolapo andanda semaiyoo katapena,’ lapae silyamo dutupa masilino,” lea-pyaa.

²¹Dokopa isingi akali dokome lao pituu, “Wamba namba wane kolesa katao mana setapae dutupa watao minio doko mee minawaka kalyona,” lea-pyaa.

²²Jisasame pii doko sepala baa lamaiyoo, “Embame mendai iki mende napilinona, embame embanya oapi dupa pitakame muni nyepala endakali tipya dupa mokosoo maipi. Dopa pitinopa embanya epe etete dupa kaitinya setakatana, embame namba watao ipu,” lea-pyaa.

²³Dopa leamopa isingi akali dokome sepala baanya oapi etete longo setenge dupa lao masetala mona etete kenda kaya-pyaa.

²⁴Kenda kayamo doko Jisasame kandatala dapa lea-pyaa: “Kamongo dupa nyakama Goteme isina lao kalyanya etete lekeleke tenge.

²⁵Mena kamele mendeme lekeleke tapala kepo tii mendenya kolandapyaliaka doko, endakali oapi longo setenge kamongo mendeme baa Goteme isina lao kalyanya etete lekeleke tapenge jetana,” Jisasame lea-pyaa.

²⁶Dopa leamopa endakali dupame sepala baa pisoo, “Dopa tamo kandao doko, api kapa pao pyoo nyepae katatape?” leami-pyaa.

²⁷Dopa leaminopa Jisasame yanu pyao, “Endakalimi kapa pao napipenge dupa Goteme pingina,” lea-pyaa.

²⁸Dokopa Pitame lao pituu, “Kandeleno! Naimame oapi dupa yakinatala emba watao paelyamanona,” lea-pyaa.

²⁹Dopa lateamopa Jisasame dokaita lamaiyoo, “Nambame nyakama kiningi langilyona, akali mendeme baa Goteme isinaka lao auu kayapala baanya anda tamopi, enda tamopi, kaiminingi tamopi, endangi tamopi, takange tamopi, wane tamopi dupa yakineamo dokome indupa gii dakepa baanya yanu etete longo waa palyoo nyepala, dee tenda auu pyoo lete etete katatana,” Jisasame lea-pyaa.