Lukas 8:30-54

³⁰Jesus a aisini, “Ifa itom?” Ewe mwän a pölüeni, “Itei mwichemong,” pun chomong anün rochopwak ra nom won.

³¹Iwe, ekewe anün rochopwak ra tüngor ngeni Jesus, pwe esap asürela lon ewe leni mi fokun alolol.

³²Iwe, a wor epwi pwiin pik ra mongöfeil won ekewe chukutekison mi arap ngeni ewe leni. Iei mine ekewe anün rochopwak ra tüngor ngeni Jesus pwe epwe mwüt ngeniir pwe repwe tolong lon ekewe pik. Iwe, Jesus a mwüt ngeniir.

³³Mürin ekewe anün rochopwak ra towu seni ewe mwän o tolong lon ekewe pik. Iwe, ekewe pwiin pik ra sätiu lepokun ewe achau o turulong lon ewe noom, pwe ra mop meinisin.

³⁴Iwe, lupwen ekewe chon foleni ekewe pik ra küna met a fis, ra säfeil o apworausa ewe pworaus lon ekewe telinimw me ekewe sopw.

³⁵Mürin ekewe aramas ra feila, pwe repwe küna mine a fis. Nge lupwen ar feito ren Jesus, ra küna ewe mwän ekewe anün rochopwak ra towu seni, a mot arun pechen Jesus, a üföüf o miritila. Iwe, ir meinisin ra niuokus.

³⁶Iwe, chokewe mi küna ei manaman ra apworausa ngeni ekewe aramas usun än Jesus angasa ewe mwän.

³⁷Mürin aramasen ewe fanü meinisin ra tüngor ngeni Jesus pwe epwe feila seniir, pun ra fokun niuokus. Iei mine Jesus a tötä won ewe wa o feila.

³⁸Iwe, ewe mwän ekewe anün rochopwak ra towu seni a tüngor ngeni Jesus, “Kose mochen üpwe etuk.” Nge Jesus a tinala o üreni,

³⁹“Kopwe liwinla lon imwom o apworausa met Kot a föri ngonuk.” Iwe, ewe mwän a feila lon ewe telinimw o apworausa met Jesus a föri ngeni.

⁴⁰Iwe, lupwen Jesus a liwinsefäliti epek ewe noom, ekewe aramas ra etiwa i, pun ra fen witiwiti an epwe feito.

⁴¹Mürin eman mwän itan Jairus a feito, ätei i eman nöüwis lon imwen felikis lon ewe leni. A chapetiu arun pechen Jesus o tüngormau ngeni an epwe eti le feila lon imwan,

⁴²pun nöün we eman chök nengin engol me ruu ierin a arap ngeni mäla. Lupwen Jesus a etala Jairus, chomong aramas ra chök etiepach ngeni.

⁴³Iwe, a wor eman fefin a nom leir, a fokun riaföü ren an samaun fefin lon ükükün engol me ruu ier. Neminei a fangala meinisin mine a wor ren ngeni ekewe sousafei, nge esap wor eman a tongeni apöchöküla.

⁴⁴Ei fefin a tap mürin Jesus lein ewe mwichen aramas, a atapa lepwülün üfan, iwe, an we samau a müttir köüla.

⁴⁵Jesus a ais, “Iö a atapaei?” Ir meinisin ra apasa pwe sap ir. Iwe, Petrus a üra, “Sounemenem, ekewe aramas meinisin ra nom ünükum o etiepach ngonuk.”

⁴⁶Nge Jesus a üra, “Eman a atapaei, pun üa mefi pwe och manaman a towu seniei.”

⁴⁷Iwe, lupwen ewe fefin a mefi pwe esap tongeni opola, a feito fän chechech o chapetiu arun pechen Jesus. Lon ewe leni me mwen ekewe aramas meinisin neminei a apworausa ngeni Jesus pwota a atapa i, pwal usun an pöchökületä lon ewe chök otun.

⁴⁸Iwe, Jesus a üreni neminei, “Nei, om lükülük a apöchökülokotä. Kopwe feila fan kinamwe.”

⁴⁹Lupwen Jesus a chüen kakapas, eman chon künö a feito seni imwen Jairus o üreni Jairus, “Noumw nengin a fen mäla. Kosap chüen aweiresi ewe sense.”

⁵⁰Nge lupwen Jesus a rong ekei kapas, a üreni Jairus, “Kosap niuokus. Kopwe chök lükülük, noumw we nengin epwe manau.”

⁵¹Lupwen Jesus a tori ewe imw, esap mwüt ngeni eman epwe eti le tolong, pwe Petrus chök me Johannes me James, pwal semen me inen ewe nengin.

⁵²Aramas meinisin mi nom lon ewe imw ra kechü o ngüngüres won ewe nengin, nge Jesus a üra, “Ousap kechü. Ewe nengin esap mäla, pwe a chök möür.”

⁵³Iwe, ir meinisin ra takiri, pun ra silei pwe ewe nengin a mäla.

⁵⁴Nge Jesus a amwöchü pöün ewe nengin o apasa fan leüömong, “Nengin, kopwe pwätä!”