Luka 8:30-54

³⁰Yesu amuza, “Zina dyako niweye yuhi?” Amhitula, “Zina dyangu nuyo ‘Nimiye Fyo’,” nakahitula ivyo kwaviya nendile na mpepo zilozize.

³¹Mpepo zamlombeza Yesu asekuzigala kwe dibome hedina uhelo.

³²Nahana fyo dya nguluwe hajihi, dikadya hankanda he kagulu. Ivyo izimpepo zamlombeza Yesu azigale zikengile mwe izinguluwe, naye azumila.

³³Ivyo mpepo zamlawa yudya mntu, niyo zengila mwe izinguluwe. Idifyo dyose dye zinguluwe digulukila ntendele ya kagulu kwe diziwa na kudidimila mwa mazi.

³⁴Wantu nawakadima izinguluwe weze wawone chilaile, niyo waguluka na kulonga izimbuli izo mo mzi na mwe zinkonde.

³⁵Wantu niyo waita wakakaule ni chibwani chilaile. Weze wabule kwa Yesu, wambwila yudya mntu alavigwe mpepo kekala he viga vya Yesu, kavika suche, na ana fanyanyi zakwe zedi. Niyo woseni wengila ni woga.

³⁶Wadya wawone imbuli idya, wawagambila wantu yudya mntu mta mpepo viya ahonyigwe.

³⁷Niyo wantu woseni wa si ya Gelasi wamwunga Yesu aite kwaviya nawakogoha vidala. Ivyo Yesu engila mwe ngalawa na kuhalawa.

³⁸Yudya mntu alavigwe izimpepo amlombeza Yesu waitanye. Mna Yesu amgamba,

³⁹“Uya kukaya naho ukawagambile wantu chiya udamanyizwe ni Chohile.” Yudya mntu niyo aita ko umzi wose, awagambila wantu viya adamanyizwe ni Yesu.

⁴⁰Yesu eze auye kwe ntendele ntuhu ye diziwa, wantu wamhokela, kwaviya woseni nawakamgoja.

⁴¹Akaheza niyo eza mntu yumwenga akwitangwa Yailo, nani mntu mkulu mwe nyumba yo kuvikila. Kedula hasi mwe viga vya Yesu na kumlombeza aite kwakwe,

⁴²kwaviya mwanawe ywa chiche ywe ichedu mta mihilimo mlongo na midi, na akabanika. Umo Yesu akaita uko, fyo dya wantu na dikamfinta.

⁴³Mgati mwawo nakuna mvyele akulawigwa sakame kwa mihilimo mlongo na midi, alavyaga vyoseni ananavyo kwa wagangana, mna hahana hata yumwenga adahile kumhonya.

⁴⁴Mvyele uyo kalaila mwe difyo hanyuma ha Yesu nakukufya lepe dye suche yakwe, aho sakame niyo ileka kumlawa.

⁴⁵Yesu auza, “Sikufywa ni yani?” Chila yumwenga kalemela, niyo Petulo agamba, “Zumbe, wantu woseni wakuzunguluka nakukufintafinta.”

⁴⁶Mna Yesu agamba, “Kuna mntu yumwenga anikufize, sibunkula kwaviya nguvu zinilawa.”

⁴⁷Yudya mvyele kawona kugamba kabunkulwa, Elo eza akazingiza nakwedula hasi he viga vya Yesu. Mwa meso ya chila mntu, akamgambila ivyo vilekile akamkufya na vilekile kahonywa aho.

⁴⁸Yesu niyo amgamba, “Mwanangu, uzumizi wako ukuhonya. Jenda na utondowazi.”

⁴⁹Umo Yesu achei akulonga mbili izo, msigilwa yumwenga eza kulaila kwa yudya mkulu akwitagwa Yailo we nyumba yo kuvikila. Amgamba Yailo, “Mwanawo kabanika,” “usekumjela kivuzovuzo mhinya naho.”

⁵⁰Mna Yesu eze eve ivyo, amgamba Yailo, “Usekogoha, zumila du, nahone.”

⁵¹Yesu eze abule kwe nyumba ya Yailo, haungile engile kunyumba na mntu mna Petulo, Yohana, na Yakobo, na tati ya mtu na mami ywa mwana.

⁵²Wantu wose nendile wakaila nakulomboleza kwa chausa cho mwana. Yesu agamba, “Usekwila, mwana habanike katakutongomala du!”

⁵³Wose niyo wamseka, kwaviya nawamanya kugamba kabanika.

⁵⁴Mna Yesu niyo amtoza umkono na kumwitanga kwa izwi, “Chimala, mwanangu!”