Lucas 8:30-54

³⁰Hua Jesús oquetlajtlanejque: ―¿Quiene tomotucö? Yaja oquejto: ―Nocuitea Trupa. Pues meyactie demunios ocalajque ijtecopa yaja.

³¹Hua inu demunios tietlötlajtiöya majcamo quentitlanecö ipa inu tlatecoyöbelespa bejcatla.

³²Hua ompa oyeya meyactie petzome tlajtlacuajtenemeya ipa inu nieca tepietl. Entunses inu moxicoöneme tietlötlajtejque ma quencöhuacö ma calaquecö imijtecopa de petzome. Yejuatzi oquencöjque.

³³Entunses inu demunios quistiejque de ijtecopa tlöcatl hua ocalaqueto imijtecopa petzome. Cuöquenuju omomiemeröjque noche petzome motietepexebito hasta ijtec ötiescatl, hua ompa oöijyumejque.

³⁴Inu tlöca tli quentlajtlacualtejtenemeya petzome, cuöc oquejtaque tli omochi, ochucholojtiejque. Tlamachestito ipa puieblo hua ca caltienco.

³⁵Pues oquisque giente oquejtato tli omochi. Hua ohuölajque tieca Jesús. Oqueniextito inu tlöcatl de öque itech oquisque demunios, que ye möquejtaya itzotzomajua, hua ayecmo lucojtec. Yehuataya tieicxetla Jesús. Pos yejua giente omomajtejque.

³⁶Entunses yejua tli miero quejtaque lo que opasöre oquepujque, quiene pajtec inu nieca.

³⁷Yecuöquenu noche inu niecate giente de puieblo de Gerasa hua de ocseque tlölte tli ca ompa itech, otietlötlajtejque ma biloa de ompa, ipampa lalebes momajtiöya. Hua yejuatzi ocalacoac ipa börco para onecuepaluc.

³⁸Hua inu nieca tlöcatl, de öque ijtec oquisque demunios, otietlötlajte ma seme iye tietlac. Cache Jesús oquetitlanque ma beya. Oquelfejque:

³⁹―Xomocuepa ca mochö, hua xecpoa noche tli bieye tlachihualestle oquechijque Deus ca taja. Hua yaja uya, otlanunutztöya ipa noche inu puieblo de tli bieye tlachihualestle oquechijque Jesús ca yaja.

⁴⁰Cuöc Jesús onehualnecuepaluc, otieselejque giente ca pöquelestle, pues innochtie tiechixtaya.

⁴¹Yecuöquenu ohuöla sente tlöcatl itucö Jairo, tlayecönque de teopanconetzi. Yaja omopechtiecac tieicxetla Jesús. Tietlötlajtiöya ma biloa pa ichö.

⁴²Pos yaja quepeaya sa sente ichpuch, tli quepeaya quieme majtlactle huan ume xebetl. Ini nönca ye omectaya. Hua cuöc yejuatzi biloaya ca ichö de Jairo, tiepötzoöya giente.

⁴³Hua sente sohuatl ye mococoöya majtlactle huan ume xebetl de itlapalyeso. Ye oquecastöro noche itomi inca miercojte, hua nionöque abele oquepajte.

⁴⁴Yaja oaseto ca tiecuetlapa Jesús hua oquemötocac itienco de tietlaquie. Hua nima omoquetz itlapalyeso.

⁴⁵Jesús oquejtojque: ―¿Öquenu yaja oniechmötocac? Innochtie oquejtojque que yejua amo tiemötocaque. Entunses oquejto Piero: ―NoTlöcatzi, noche ini meyac giente metzmopötzelfea.

⁴⁶Hua Jesús oquejtojque: ―Yeca oniechmötocac. Pos onecmachele que oquis checöhualestle de notech para onetlapajte.

⁴⁷Yecuöquenu, inu sohuatl omomacac cuienta que abele mojyönas. Omopacho mös bebeyocaya lalebes, hua omopechtiecac tieicxetla. Hua oquepu imixtla noche giente tli ipampa otiemötocac, porque mococoöya, hua quiene sa nima opajtec.

⁴⁸Yejuatzi oquelfejque: ―Nochpuch, por que tomoneltocac ye tepajtec. Xebeya ca cuale.

⁴⁹Mientras yejuatzi oc tlajtlajtulutaya, ohuöla sente tlöcatl desde ichö de inu tlayecönque de teopanconetzi. Oquejto: ―Pos mochpuchtzi ye omec. Ayecmo xetiemotequemaquele nöiloac maestro.

⁵⁰Pero Jesús oquecajque, hua oquenönquele: ―Amo xomomajte. Sa xomoneltoca, hua pajtes.

⁵¹Hua cuöc axihuato ipa ichö, amo öque oquecöjque ma calaque tiehua tlöcamo sa yaja Piero, ca Jacobo, hua Xohuö, ca tiehua itajtzi hua inöntzi de inu sisehuantu.

⁵²Hua chojchucaya innochtie giente, hua chuquestlajtoöya porque omec sisehuantu. Hua yejuatzi oquejtojque: ―Amo xechucacö. Pos amo omec, tlöcamo sa cochteca.

⁵³Cache moburlörojque de yejuatzi, pues oquemajtaya yejua que ye omec.

⁵⁴Pero yejuatzi caseque imö sisehuantu, hua oquenutzque. Oquejtojque: ―Sisehuantu, xemiehua.