Lukas 8:30-54

³⁰Manjari tinilew iye weˈ si Isa, paˈinne, “Sine ēnnun?” Nambung iye, paˈinne, “Ēnkun si Ibuhan.” Peggeˈ ekka hep seyitan mapaˈasek si aˈa miyaˈan.

³¹Duk pabuyuˈ-buyuˈ teˈed meˈ seyitanin pu si Isa, gaˈi siye makipapī dem narkaˈ.

³²Niyaˈ magsungkal laˈi diyataˈ bīd panenan bawi, ekka manamal. Pabuyuˈ-buyuˈ meˈ seyitanin pu si Isa weˈ paˈasek siye pī dem meˈ bawihin. Dinaˈak ne siye weˈ si Isa.

³³Manjari paluwas meˈ seyitanin amban aˈahin duk padiyalem siye pī magdem baran meˈ bawihin. Magtawus panenan bawihin magubas padurul pī si pampang magdem lamew duk lambo siye kēmon.

³⁴Pagkite meˈ aˈa magipat bawihin maˈumantag inin, magubas siye duk magaka-aka siye laˈi si puweblo duk si meˈ lahat diyataˈ.

³⁵Manjari pī meˈ aˈahin mayaman bakas maˈumantag miyaˈan. Pagtekkade laˈi pu si Isa, takitede aˈa bakas pasayedan seyitanin ningkoloˈ laˈi si bihing bettis si Isa. Magsemmek ne iye duk hāp ne pikilannen. Manjari tinalew siye.

³⁶Ubus inaka-akahan ne siye weˈ meˈ aˈa bakas mangitehin bang saˈingge pamakawuliˈ si Isa aˈa bakas pasayedan seyitanin.

³⁷Manjari kēmon meˈ aˈa miyaˈan, meˈ amban kalahat-lahatan laˈi si Gerasa, dinaˈak weˈ de si Isa tahalaˈ peggeˈ paˈasekan talew teˈed siye. Hangkan pasakey si Isa dem bangkaˈ duk sōng patulak ne.

³⁸Aˈa makawuliˈanin pabuyuˈ-buyuˈ nuhut iye. Saguwaˈ papoleˈ si Isa iye, paˈinne,

³⁹“Hap lumaˈ ne kew duk magaka-aka kew si meˈ aˈahin sabab hinangan hadje tahinang Tuhan si kaˈuhin.” Manjari lumengngan ne aˈahin duk ilatag weˈ ne puweblohin magaka-aka sabab hinangan hadje bakas tahinang si Isa si iyehin.

⁴⁰Pagbalik si Isa si dambiyaˈ lamew, sinna meˈ aˈahin pasampang si iye peggeˈ inagad-agad hep iye weˈ de.

⁴¹Niyaˈ tekka pī si iye dambuwaˈ nakuraˈ si langgal lahat miyaˈan, ēnnen si Jairus. Pasujud iye si antag bettis si Isa duk pabuyuˈ-buyuˈ teˈed iye moˈo si Isa si lumaˈne.

⁴²Peggeˈ niyaˈ anakne dende dambuwaˈ-buwaˈ, sampūˈ duk duwen tahun umulnen, legget manamal duk sōng matey ne. Nuhut si Isa iye. Sasangde mapīhin, taligpit ne si Isa weˈ meˈ aˈa mabanes mapatuhut si iyehin.

⁴³Niyaˈ laˈi dem kaˈekkahan aˈahin dambuwaˈ dende saki, luwal paguwaˈan lahaˈ. Sampūˈ duk duwen tahun ne kemuwe kasakinen. Ubus ne tagastune kēmon sīnnen si meˈ doktol, saguwaˈ gaˈ niyaˈ makakawuliˈ iye.

⁴⁴Pī iye patapit si bukutan si Isa, duk inantan weˈ ne tuggu badjuˈ si Isahin. Magtawus padeheng paglahaˈnen.

⁴⁵“Sine bakas mangantan akuhin?” paˈin si Isa. Maggaˈ siye kēmon. Manjari paˈin si Petros, “Tuwan, kabanes meˈ aˈa mapalaray si kaˈu inin, magtilew pe kew?”

⁴⁶Saguwaˈ paˈin si Isa, “Asal niyaˈ bakas ngantan aku, peggeˈ talessaku weˈ niyaˈ balakat paguwaˈ amban dem baranku.”

⁴⁷Sakaliˈ kataˈuhan dendehin weˈ gaˈi katapukanne bakas hininangne miyaˈan, patapit iye pī migpid duk pasujud iye si antag bettis si Isa. Duk inakahan weˈ ne si Isa si pakalehan meˈ aˈahin bang weˈey iye antanne, duk inakahan isab weˈ ne weˈ kawuliˈan iye magtawus.

⁴⁸Paˈin si Isa si iye, “Dende, kawuliˈan ne kew peggeˈ sandel kew si aku. Pī ne kew, daˈa kew suse.”

⁴⁹Sasang si Isa pe mamissā si dendehin, niyaˈ ne aˈa tekka amban lumaˈ si Jairus. Paˈinne pu si Jairus, “Anaknu dendehin gaˈ ne. Daˈa ne sasewun guruhin.”

⁵⁰Takale si Isa inin, ubus paˈinne pu si Jairus, “Daˈa kew tinalew. Sandel kew hadja. Ellum du iyan anaknun.”

⁵¹Pagtekkade laˈi si lumaˈ si Jairus, gaˈ niyaˈ daˈakne padiyalem luwal hadja si Petros, si Yahiya, si Yakub, duk saˈi-sama nakanakin.

⁵²Kēmon aˈa malaˈihin magtangis duk magmatey sabab nakanakin. Saguwaˈ paˈin si Isa si siye, “Daˈa kaˈam magtangis. Dumaˈin matey nakanakin saguwaˈ tuli hadja.”

⁵³Pinagsayehan iye weˈ de, peggeˈ kataˈuhande weˈ asal matey ne nakanakin.

⁵⁴Manjari inantanan weˈ si Isa tangan nakanakin duk paˈinne pinapales, “Endeng, dongaˈ kew.”