30O Isus pe godova phučlales: “Sar si ćiro alav?” Vo phendas: “Majbut džene sam katar jek,” kaj ande leste dine e but e benga.
31Thaj zamolisardine e Isuse te na naredisarel lenđe te džantar ando bezdan.
32A okote ande gora sas bari gomila bale save čarjonas. Askal e duhurja zamolisardine e Isuse te mućelen te den ande bale. Thaj vo muklalen.
33Askal e benga inkljistine andar o manuš thaj dine ande bale. Thaj e bale pojurisardine niz o brego ando jezero, thaj utopisajle.
34A kana dikhline okola kaj araćhenas e balen so sas, našline thaj razglasisardine pe gava thaj okoline so dikhline.
35A o them inkljisto te dićhel so sas. Avile dži ko Isus thaj dikhline e manuše andar savo inkljistine e benga sar bešel dži ke Isusešće pungre, savo lijas pe peste e drze thaj sas gođaver, thaj darajle.
36A okola save godova dikhline phendine averenđe, sar o Isus oslobodisardas e manuše ande savo sas e bilačhe duhurja.
37Askal e Isuse zamolisarda sa o them andar e geresesko krajo te džaltar lendar kaj lijalen e bari dar. O Isus dija ando čamco thaj teljarda palpale ande Galileja.
38A o manuš andar savo o Isus tradas e benga zamolisarda e Isuse te šaj ačhel lesa, ali o Isus muklales te džaltar alavenca:
39“Boldetu ćhere thaj phen sa so ćerda tuće o Del.” Vo đelotar thaj razglasisarda pe sasto gav so ćerda lešće o Isus.
40A kana o Isus boldape palpale pe koja rig e jezerošći, maladale o them kaj željno ažućarenasle.
41Thaj dik, avilo o manuš kasko alav sas Jair, savo sas jek katar e vođe ande sinagoga. Thaj pelo pe pire koča angle Isusešće pungre thaj molisardale te del ando ćher lesko
42kaj sas po meripe lešći jedino čhej savja sas varekaj katar dešuduj brš. Dok o Isus džalas ande Jairesko ćher oko leste ćićidelaspe sa o them katar sa e riga.
43A maškar o them sas jek manušnji savi sas nasvali katar o godova kaj dešuduj brš thavdelas o rat latar. Sa so sasla dija pe doktorja thaj khonik naštiksarda te sastarela.
44Nakhli palal leste thaj astardape e ćoškostar katar e Isusešći haljina, thaj o rat odma ačhilo latar.
45A o Isus phendas: “Ko astardape mungre haljinatar?” Savora počnisardine te braninpe, a o Petar phendas: “Sikavneja, o but o them ćićideltu thaj spidelpe. aj tu phučes ko astardape pale mande.”
46A o Isus phendas: “Vareko astardape pale mande namerasa. Haćardem sar e sila inkljisti andar mande thaj vareko sastilo.”
47A e manušnjii dikhla kaj naštik garadol, sa ande dar avili thaj čhudape pe koča angle leste thaj anglo sa o them phendas sostar astardape pale leste thaj sar odma sastili.
48A vo phendas laće: “Čhejo, ćiro paćipe sastardatu. Dža ando miro!”
49Dok o Isus još ćerelas svato e romnjaće, avilo vareko andar e Jairesko ćher savosas vođa ande sinagoga ćher e porukasa: “Muli ćiri čhej. Na majbut mučisar e sikavne.”
50Ašunda godova o Isus thaj phendas: “Nadara! Samo paća thaj voj traila!”
51O Isus dija ando ćher, al khonikas či mukla te del lesa andre osim e Petre, e Jovane, e Jakove thaj e čhoraće dade thaj laće deja.
52A savora save sas ando ćher rovenas thaj žalinas pale čhori. A o Isus phendas lenđe: “Naroven! Či muli, nego samo sovel!”
53A von asanas lestar kaj džangline kaj muli.
54O Isus astardala palo vas thaj čhuta muj: “Čhorije, ušti!”