Luka 8:30-54

³⁰Iesu i hesiolau ia arinai, i ene, “Oa esam wa?” Ia i ene, “Legeona”: paana demoni gamagaridi ia boeana eai se lui.

³¹Isi se awanorilau ia arinai tabu i lauhesomdi se lau gabotum eai.

³²Metai sarai eawoidi lailai oea eai se aibai: se awanori ia arinai bena se lulau isi boeadi eai. Ia abo ie eari.

³³Demoni wa tau wa abo se pesagabaei, se lulau sarai boeadi eai: eawoidi wa abo se haidagoidi se lau malasarisari eai, se beu gabogabo eai, abo se galamosi.

³⁴Tauheaidi wau wa se ita, abo se dago, se lau eanua eai eo oea eai se wasaduaiei.

³⁵Isi abo se pesa se lau se ita; se laoma Iesu arinai, tau wa demoni se laugabaei wa, i bawabigabiga Iesu aena gegesina eai, ana lulu i lui, eo nuana i sibasibao: arinai isi se matausi.

³⁶Headi laulau wa matadi eai se ita se ribaei laulau sahasaha se abiabiei, arinai demoni tauluina se hemauri.

³⁷Gerasene oeadi se hetaiiri tataodi gamagaridi se awanorilau ia arinai bena i laugabaedi; paana isi matausi lailai se hearo: abo i gerusae waga eai, ie uio.

³⁸Tau wa, demoni se pesagabaei wa, i awanori Iesu arinai bena maena se mia. Iesu mo i hetamari, i ene,

³⁹“U uio em numa eai, ginauri saesaedi Eaubada i abidi arim eai u hemasarahadi.” I lau ena dobila eai, eanua se ohihai, wau abiabina wa Iesu ie abi ia arinai, i heribadi.

⁴⁰Iesu ie uio, tatao gamagaridi maenayao se hailobai matadi se soasoari: paana gamagaridi ia se nuanuaiei.

⁴¹Na tau esau i laoma esana Iairo, ia sunago tanuagana esau: i guridobi Iesu aena eai, i awanori ia arinai, bena i laoma ena numa eai.

⁴²Ia natuna siu esega mo, ena borimai saudoudoi‐labui, ia ie ota matena i hanahanaui.

⁴³Sine esau asiebo osina ie abi borimai saudoudoi‐labui, ena moni gamagari i moseohi doketa aridi eai, nige esau ia i helolo.

⁴⁴Ia Iesu murina eai i laoma, ana lulu dedeana i abiita: ma esega abo asiebo osina i lautom.

⁴⁵Iesu i ene, “Eai i abiitaguma?” Gamagaridi se harere, abo Petero ma ana sasaguyao si ene, “Tanuagamai e, moutuana wa se lauihiihiem, eo se heduheduiahalaim, hinage u ene, Eai i abiitaguma?”

⁴⁶Iesu i ene, “Esau i abiitagu: paana ea nuatuiyao gigiborigu i leyao.”

⁴⁷Sine wa ie ita ia nige i tauyamuyamui, i laoma ma tabutabubuna ia matana eai i guridobi, eo tatao gamagaridi matadi eai Iesu ena abiitana paana i riba hemasaraha, eo ma esegana i mauri.

⁴⁸Ie ribalau ia arinai, i ene, “Natugu e, nuam ie taru: em sunuma eai u mauri; ma nuabigabigam u lau.”

⁴⁹Ma‐ribaribana, esau sunago tanuaga numana eai i laoma ia arinai, i ene, “Natum siu wa ie mateo; Tanuagada tabu u hegadotoa.”

⁵⁰Iesu i ataiei arinana i heuio, i ene, “Tabu u matausi: u sunumawatai mo ia abo se hemauri.”

⁵¹Iesu i laoma numa eai, tatao i ribanuahidi tabu esau i awasae, na Petero eo, Iamesi eo, Ioane isibom. eo siu wa tamana eo sinana hinage.

⁵²Gamagaridi se doudou, eo se laulaukapore: ia mo i ene, “Tabu au doudoui: ia nige i mate, ma enona.”

⁵³Isi ia se marumaruhiei, eo se alaliuliuaei, paana se itayao i matearirio.

⁵⁴Iesu i aiduiedi, se pesa murimuri eai, siu nimana eai ie abi i eoga, i ene, “Siu e, u toro.”