LUKAS 8:30-54

³⁰Naž Jesusen' wnnable' be' x̱iwen', na' wnné': —¿Bi lio'? Be' x̱iwen' gožen Ḻe': —Be' Zan lia'. Ki wnnán dan' yoe'e be' x̱iwe' zan.

³¹Naž be' x̱iwe' ka' góta'yoegeklen Jesusen' bi seḻe'e ḻégaken latje choḻ chegak benne' gat ka'.

³²Ḻezka' wzóa to kwe' koch zan ga na', želdaba' žáwgakba' ḻaw ya'adon', na' be' x̱iwe' ka' belnnáb nyachen' Jesusen' we'e ḻégaken latje chejžó'ogaken ḻo koch zan ka'. Jesusen' bi'e ḻégaken latje.

³³Bežojgak be' x̱iwe' ka' ḻo bennen', na' bejžó'ogaken ḻo koch zan ka', na' jak koch ka' gan nak to ḻe'e ya'a yej ẕen. Bejbíx̱jgakba' ḻo nisdo', gan belyepba' nis.

³⁴Kate' benne' ka' žape chí'igake' koch ka', bḻé'egekle' kan gok chégakba', bžébegake', na' bebángekle'. Beẕónnjgake' ga na', zeyéjgake' lážgake', na' bejzéngekle' benne' ka' nníta'gake' yežen', na' ḻezka' benne' nníta'gake' yix̱en'.

³⁵Naž bžojgak benne' ka' nníta'gake' yežen', na' bejwíagake' dan' goken. Katen' bžíngake' gan zoa Jesusen', bḻé'egekle' bennen' wyoé'e be' x̱iwe' ka', ži'e x̱ni'a Jesusen'. Nakwe' laže', na' ba bezóe' cháwe'do', na' bžébegake'.

³⁶Benne' ka' nníta'gake' ga na' belzenle' ḻégake' kan goken, na' bḻé'egekle' ba beyák bennen' wyoé'e be' x̱iwe' ka'.

³⁷Naž yógo'te benne' zan ka', benne' wláž che yež ka' zej nbaben yež Gadara na', góta'yoegekle' Jesusen' yežoje' ḻo yežlyó chégake'. Ki béngake' dan' ẕžébegake'. Bebén Jesusen' ḻo barkwn', na' bezé'e ga na'.

³⁸Bennen' bežojgak be' x̱iwe' ka' ḻe' góta'yoele' Jesusen' we'e ḻe' latje chéjḻene' Ḻe' tẕen. Jesusen' gože' ḻe' ga'ne' ga na', na' wnné':

³⁹—Beyéj ližo'. Bejzenle benách wláž chio' ka' ka nak da' ẕen da' ben Dios ḻen le'. Beyéj bennen' liže', na' bzie' diža' dot ḻo yež ka' kan nak da' ẕen da' ben Jesusen' ḻen ḻe'.

⁴⁰Kate' bežín Jesusen' yecheḻá'a nisdon', benne' zan, benne' nníta'gake' ga na', bebégekle' ni'a chie' Ḻe' dan' želbeze' yógo'tegake' Ḻe'.

⁴¹Naž bžin to benne' lie' Jairo gan zoa Jesusen'. Nake' benne' blo che to yo'o gan žéngekle benne' judío ka' x̱tiža' Dios. Bzoa ẕibe' ḻaw Jesusen', na' góta'yoele' Ḻe' cheje' liže'.

⁴²Ki bene' dan' zoa to x̱kwide' no'le chie', na' ba žek gatbe'. Nakbe' bi' tlícha'kze chie', na' zejbe' ka chežinno yiz. Kate' ne zej Jesusen' tẕen ḻen benne' zan ka', ẕchígake' Ḻe'.

⁴³Zej to no'le ladjw benne' zan ka', na' ba gok chežinno yiz ẕzáka'ḻi'e, dan' bi ẕbez žen chie', da' žaken chégakkze no'le ka', na' ba bdie' bika' da' de chie', dan' wdiẕjwe' benne' ka' žeyóngake' benách ka', san nitó benne' bi gok yeyone' ḻe'.

⁴⁴Wbige'e zaka' x̱kože'l Jesusen', na' wdane' laže' da' nakwe', na' ḻa' wbižte yižwé' žen chien'.

⁴⁵Naž Jesusen' wnnable' benne' zan ka', benne' nníta'gake' ga na', na' wnné': —¿Noẕ benne' wdane' neda'? Nitóe' bi bechebe'. Naž Bedw ḻen benne' ka' nníta'ḻengake' ḻe', góžgake' Jesusen', na' wnnágake': —Benne' wsedle, zej nnita' benne' zan ga ni, benne' ẕchígake' Le', na' ẕžíga'gake' Le', na' ẕnno': “¿Noẕ benne' wdane' neda'?”

⁴⁶Naž Jesusen' wnné': —Zoa no benne' wdane' neda', dan' gókbe'ela' bžoj yeḻa' wak neda', dan' žeyonen benách ka'.

⁴⁷Kate' gokbe'el no'len' nnezle Jesusen' dan' bene', ḻo yeḻa' ẕžebe wẕize'. Bzoa ẕibe' ḻaw Jesusen', na' gože' Ḻe' ḻawgak benne' zan ka' biẕ chen' wdane' laže' da' nakwe' Ḻe', na' kan goken, ḻa' beyaktie'.

⁴⁸Naž Jesusen' gože' ḻe': —Ẕí'na'do', dan' žejḻi'o chia' ba beyako'. Binlo beyéj ližo'.

⁴⁹Kate' ne ẕnna Jesusen' da' ni, bžin to benne' wzé'e liž benne' blon', na' gože' bennen': —Ba got x̱kwide' no'le chio'. Biž gon ḻelo' benne' wsedle.

⁵⁰Kate' Jesusen' benle' da' ni, bechebe', na' gože' benne' blon': —Bi žebo'. Bejḻe'ze che Dios, na' yeyák x̱kwide' no'le chion'.

⁵¹Kate' Jesusen' wyoé'e yo'on', bi bi'e latje no benne' chó'oḻene' Ḻe' san ḻégakze Bedw ḻen Jakob, na' Ẕwa, na' ḻezka' x̱a x̱na' x̱kwide' no'len'.

⁵²Želbeže benne' ka' nníta'gake' ga na'. Želbeže nyache'e ni'a che x̱kwide' no'len', na' Jesusen' gože' ḻégake', na' wnné': —Biž kwéžele. Bi nat x̱kwide' no'len'. Ẕtászebe'.

⁵³Ben dítjgekle' Ḻe' dan' nnézgekle' ba natbe'.

⁵⁴Naž Jesusen' bex̱we' na'be', na' wnníe' zižje, na' wnné': —X̱kwide' no'le, beyase.