LUKA 9:17-55

¹⁷Iboudiai e aniani, bogadia e kunu. Bena aniani bahudia e habou, bosea gwauta-rua e hahonu.

¹⁸Nega ta ia sibona e ḡuriḡuri; ena hahediba danu ia ida e nohova. Bena ia ese e nanadaidia, eto, Taunimanima be dahaka e tomamu, lau be daika?

¹⁹Idia e haere, eto, Ioane Bapatiso e tomu; a haida e tomu Elia, ma haida e tomu peroveta tauna gunana ta vada e tore isi lou.

²⁰Ia ese ma e nanadaidia, eto, A umui be dahaka o tomamu, lau be daika? Petro ese e haere henia, eto, Dirava ena Keriso.

²¹Bena ia ese e taravadia, eto, Tau ta basio hamaoroa.

²²Ia ma eto, Taunimanima Natuna na hisihisi diaḡau do baine ani, hanua tau-badadia bona hahelaḡa taudia bona itorena taudia ese bae dadaraia, bona bae alaia mase; to dina ihatoina ai ma baine tore isi lou.

²³Ia ese iboudiai e hereva henidia, eto, Tau ta iḡavagu urana baine ura, ia na sihona baine hedadarai, dina iboudiai ena satauro baine abia isi, lau murigu ai baine raka.

²⁴Badina be ena mauri e dogoa taomu tauna ese ena mauri baine reaia; a lau daigu ai ena mauri baine negea tauna ese ena mauri baine abia.

²⁵Tau ta ese tanobada idoinai baine abia, a sibona ena mauri baine hadikaia eiava baine reaia, iena namo be dahaka?

²⁶Tau ta na lau daigu ai eiava egu hereva daidiai baine hemarai, Taunimanima Natuna na ia dainai baine hemarai, ia hairaina ai bona Tamana hairaina ai bona aneru helaḡadia hairaidia ai bainema negana ai.

²⁷Na hamaoromui momokanimu, haida o ini gigini na basie mase ela bona Dirava ena basileia bae itaia.

²⁸Ini hereva e ore murinai, dina taurahani vada ela, ia ese Petro bona Ioane bona lakobo e abidia hidi, ororo ai e hakaudia dara ḡuriḡuri totona.

²⁹E ḡuriḡuriva ai, ia vairana vada e idau, bona ena dabua e hururu-hururu kuroka-kuroka.

³⁰Bena tatau rarua ia ida e hereva-hereva, Mose bona Elia;

³¹mai hairaidia ida e hedinarai, ia Ierusalem ai baine mase herevana e gwauraia.

³²Petro mai bamona ida be mamahuta; bena idia e noga, ia hairaina e itaia, bona ia ida e gini bou taudia raruosi e itadia.

³³Raruosi e raka oho matama, bena Petro ese Iesu e hereva henia, eto, Biagumai e, namo herea ita iniseni ai aita noho; mani kalaga autoi aia kara, auta oiemu, auta Mose ena, auta Elia ena. E hereva kava: ede baine hereva toma na asi dibana.

³⁴Ia dounu e herevava ai, ori ta ese e gorudia ahu; bena idia na ori lalonai e vareai, e gari dikadika.

³⁵Bena ere ta ori lalona amo ema, eto, Ina na Natugu, na abia hidi tauna; ia erena ba kamonai.

³⁶Ere e doko ai, Iesu sibona e itaia. A unu e ita ḡaudia na asie herevalai, bona tau ta danu asie hamaorolaia.

³⁷Daba ai, idia na ororo amo e hekeiva ai, hutuma bada ida e hedavarai.

³⁸Bena hutuma bogaragidia amo tau ta e boiboi, eto, Hahediba taumu e, na noimumu, natugu mani ame itaia; ia na natugu vara-edeana.

³⁹Nega haida lauma dikana ese e butua taomu, bena e lolo dagumu; bona e hatororo-tororoamu, bena uduna e gwara-gwaramu; se rakataniamu ela bona kopina e bero momomu.

⁴⁰Lau ese emu hahediba na noidia, lauma dikana na bae lulua lasi, to asi dibadia.

⁴¹Iesu e haere, eto, Asi emui abidadama uruna! Gwau-edeede uruna! Lau na dekemui ai baina noho ela bona edena nega ai? Baina haheauka henimui ela bona edena nega ai? Natumu a mailaia.

⁴²E raka kahira negana ai lauma dikana ese tano e kwadilaia, e hatororo-tororoa. Iesu ese lauma dikana e gwau henia bona mero e hamauria, bena tamana e henia lou.

⁴³Iboudiai ese Dirava ena siahu e hoalaia una nega ai. Idia iboudiai dounu Iesu ena kara e hoalai, ia ese ena hahediba e hamaorodia, eto,

⁴⁴Ini hereva taiamui ai bae vareai na ba lalo tao: Taunimanima Natuna na taunimanima ediai taona bae torea.

⁴⁵A una hereva na lalodia asie parara, edia amo e hehunii, anina asie davaria; bona ioa inanadailaina garina e gari.

⁴⁶ldia sibodia e hepapahuahu, daika baine herea.

⁴⁷A Iesu na edia lalo-hadai dibana, bena mero-mero ta e boiria dekenai.

⁴⁸Bena e hamaorodia, eto, Lau ladagu ai ina meromero eabia daemu tauna ese lau danu e abigu daemu; bona lau e abigu daemu tauna ese e siaigu Diravana danu e abia daemu. Badina be umui bogaragimui ai maraḡi-herea tauna na bada.

⁴⁹Ioane ese e hamaoroa, eto, Biagumai e, ai na tau ta a itaia, oi ladamu ai lauma dikadia e luludia lasi, bena a gwaua tao, badina be ia na dia ita bamoda.

⁵⁰Iesu eto, Basioma gwaua tao, badina be se laomui ahumu tauna ese e kahamuimu.

⁵¹Ia iabi-isina dinana vada e kahira-kahira negana ai, ia ese Ierusalem e raka henia mai haheaukana ida.

⁵²Bena ena gwaukau taudia vada e siaidia guna. Idia na Samaria hanuana ta ai e kau, ena gabu bae heḡaeḡaelaia eto;

⁵³to Ierusalem e raka henia dainai idia ese asie abia dae.

⁵⁴Ena hahediba, Iakobo bona loane, una kara e itaia, bena eto, Lohiabada e, o uramu lahi guba amo baia gwauraia, baine diho, baine habuadia a?

⁵⁵A ia e gini kerehai, raruosi e gwau henidia;