Lucas 9:17-55

¹⁷Beju pamapa cristiano cuana diadiatana tupu. Pan cuana, se detse beju puchu puana. Eped'u cuana chudutana huecuana. Piada tunca beta ejaitiana d'iti cuana sejeatana huecuana puchu cuana neje.

¹⁸Pia tsine Jesús discípulo cuana neje bahui aniana. Pia cristiano cuana beju aimue ani putana. Jesús da discípulo cuana chuadera tu mehua Diusu neje jamitsutiana. Jamitsupeti putsu, discípulo cuana peje su janariatiana. Uja quisabatana huecuana: —¿Cuaja ni da cristiano cuana ema jepuiti eputani?

¹⁹Da su jeutsutana huecuana uja: —Piada piada mida pa Juan Bautista chenu id'eyujiji eputani. Pia cuana mida pa Elías chenu id'eyujiji eputani. Pia cuana di mida pa pia Diusu sa profeta eputani.

²⁰Da su Jesús ja quisabatana huecuana: —¿Aidhe ni da ema micuaneda epibatiani? Beju Pedro ja jeutsutana: —Mida da Cristo, Diusu sa Jabeituti Deja.

²¹Da su beju Jesús ja discípulo cuana jubida cuatsasiatana: —Be aidhe biame mequisaji aidhe ema.

²²Ema da Diusu sa Jabeituti Deja biame, ebia su sufri pu taji. Beju judío cuana sa ehuidusuji, sacerdote, huaraji aida, jacuatsasiati ebuetsuaji cuana ja ema jusiadera putsu, emanuameta huecuana. Quimisha tsine ejaitiana su, ema eid'eyu manujiji cuana duju jenetia.

²³Da su Jesús ja mesa discípulo cuana uja atana: —Quebata ja ema tije aja su, pamapa muesumu neje ema tije paata. Ema pamapa mesa ai cuana quitaita ebia su tsada pabata.

²⁴Tusa manu teje ema tije paata, manuameja paata huecuana biame.

²⁵¿Ai puji saida ni da etse sa pamapa mundo sa chipilu cuana paani pu cua, cuati castigo su etse eputi biame?

²⁶Quebata da cristiano cuana butse su ema jepuiti, quema quisa cuana jepuiti di ebidhu su, ya di tu jepuiti ebidhu, ema esiapati su. Da su ema Echua Puji Huaraji Aida epu. Quema Tata Diusu sa gloria neje, pamapa tusa ángel cuana neje ema esiapati.

²⁷Ene putsu, yama micuana equisainia, hue enetita piada piada cuana aimue emanuta tsuhu mahue Diusu ecuatsasiati ebayu teje.

²⁸Ocho tsine beju jaitianana su, Jesús murucu aida bia su tsuatiana Diusu neje emitsuti puji. Pedro, Jacobo, Juan cuana ja buquetana.

²⁹Dapia Jesús Diusu neje emitsutiani cama, tuna butse su jabupiatiana. Mesa ejud'uji cuarecuare pasapasa puana.

³⁰Da su Elías, Moisés chenu detse bataji puana eid'e batana huecuana. Jesús neje quisaquisa epuani batana huecuana.

³¹Cuaja Jesús sufri pu putsu, emanu Jerusalén ejude su Jesús neje jaquisatiana tse. Hueda cuarecuare ja biababutana huecuana.

³²Beju Pedro, Jacobo, Juan cuana ebia su tahuija putana biame, id'etaniana huecuana, tueda quimisha deja sa hueda ba putsu.

³³Moisés, Elías detse beju eputiyupiba epuani su, Pedro ja Jesús atana: —Echua Puji, saida ecuaneda upia pamapa su meanija. Quimisha epahuaneti cuana ecuanaju paaiti, ahua mique tsada su. Piada miqueda puji, piada Moisés sa puji, piada Elías sa puji ecuanaju paaiti. Pedro beju mue jashanapati cuaja emimiani, ebia su iyuame pu putsu.

³⁴Daja Pedro emimiani cama, judu ja beju dunutana huecuana. Da su beju Pedro, Jacobo, Juan cuana ebia su iyuame putana.

³⁵Judu duju jenetia Tata Diusu ja atana huecuana uja: —Ye da quema ibuneda Ebacua. Tueda bahui meid'abaenique.

³⁶Tata Diusu mimipeana su, beju Jesús tu mehua batana huecuana. Moisés, Elías detse aimue beju batana huecuana. Da su cuatsa mahue anitana huecuana. Mue aidhe biame quisatana huecuana mahue tuna batana ai cuana.

³⁷Pia huenati murucu aida jenetia butetana huecuana. Ebutesa su, jucuada cristiano cuana ja Jesús tsutitana.

³⁸Piada deja ja cristiano cuana duju su Jesús jubida uja atana: —Echua Puji, chamaque quema piada quita ebacua.

³⁹Einid'u madhada ja tueda ina putsu, etsiatsiametani jubida. Tseitsi nime edajajametani. Equedi bahui purapura mesa ecuatsa su epuani. Tueda einid'u madhada ja quema ebacua emadhatani. Mesiaja mahue yatani.

⁴⁰Beju yama mique discípulo cuana bajaitia einid'u madhada pajemicuinata huecuana puji. Cuaja jemicuina taji mahue bataitia huecuana.

⁴¹Da su Jesús ja anititana discípulo cuana d'ayapirutana uja: —¡Ai! ¿Jucuaja su jia micuaneda jei puja mahue? ¿Que tupu teje jia quema micuana neje ani taji? ¿Que tupu teje jia quema micuana etuchea taji? Meduseque edeahue mimi bue mahue.

⁴²Edeahue janariatiana su, einid'u madhada ja dajajametana. Jubida edeahue riariametana. Da su Jesús ja einid'u madhada d'ayatana su, beju saisibana edeahue. Jesús ja deja tusa ebacua saida menajatiataibana.

⁴³Beju pamapa batana cristiano cuana ebia su nimetiunetitana, Diusu ebia su tucheda, aida batana huecuana putsu.

⁴⁴Beju cristiano cuana enimetiutani cama, Jesús ja mesa discípulo cuana quisapirutana: —Meid'abaenique ema. Be mesetaji. Ema da Diusu sa Jabeituti Deja. Ema emenajatiata huecuana deja madhada cuana peje su pamanuameta huecuana puji.

⁴⁵Beju discípulo cuana ja Jesús sa quisa aimue shanapatana mahue, tuseda tsada mahue putsu. Iyuame putana huecuana tu equisaba puji cuaja mesa quisa epuani.

⁴⁶Da su beju discípulo cuana jacuicuinapirutitana. ¿Quebata jia tuna duju su ebia su aida? jacuicuinatitana huecuana.

⁴⁷Beju Jesús jashanapatiana daja yacuicuinatitani huecuana. Da su yanana chidi inachidi putsu, tu naja su ichatana.

⁴⁸Discípulo cuana uja atana: —Ye yanana da ema peje su jei eputani nimemitsida cuana nime. Quebata ja saida ebatsuta huecuana su, tuahueda ema ebatsutani pu cua nime. Daja huecha quebata ja ema ebatsuta su, tuahueda quema Tata Diusu ebatsutani pu cua nime, Diusu ja ema beitutana putsu. Quebata micuana duju su nimemitsida epuani su, tueda da ebia su aida micuana duju su epu.

⁴⁹Da su beju Juan ja Jesús uja atana: —Echua Puji, pia deja ja einid'u madhada cuana cristiano cuana peje jenetia ejusiacuinatani ecuanaju bana. Beju ecuanaju tueda, “Be daja aji”, ana, aimue tueda ecuanaju neje epuniunetiani mahue putsu.

⁵⁰Da su beju Jesús ja Juan uja atana: —Be tueda deja memenahueji. Quebata deja ecuana neje madhada hue epuani mahue, tueda da ecuana sa eshanapa beju.

⁵¹Jesús cielo su eputi tiempo beju enariatiani putsu, janimetucheatiana Jerusalén ejude su eputi puji.

⁵²Equene tu hui su pia discípulo cuana beitutana. Piada ejude su Samaria yahua su cuinatitana huecuana tahui jude ete ebasetati puji.

⁵³Beju samaritano cristiano cuana ja dapia ejude su aimue Jesús batsuja atana mahue, tueda Jerusalén ejude su epuhu shanapatana huecuana putsu.

⁵⁴Da su Jesús sa discípulo Jacobo, Juan detse ja daja id'aba putsu, Jesús uja atana tse: —Echua Puji biahua tiempo Diusu sa profeta Elías chenu ja cristiano madhada cuana cuati neje taitanamepetaidha. Beju jiahue, ¿a mique tsada ecuanaju Diusu ebaja cuati pabeituta puji, tueda samaritano cristiano cuana etaitanamepe puji?

⁵⁵Beju Jesús sa tsada mahua putsu, discípulo detse jubida d'ayatana, daja quisabatana tse su.