LUKA 9:17-55

¹⁷Na tenepo wanthuwo adadya acikhuta wentse. Ndipo adalokota mbvululu zakusala acidzaza bzitundu khumi na bziwiri.

¹⁸Pantsiku inango Jezu akhana ateweri wace. Ndipo iye akhapemba yekha kumbali Na tenepo iye adawabvundza kuti: “Kodi wanthu ambalewa kuti ine-pano ndine yani?”

¹⁹Ndipo iwo adatawira aciti: “Winango ambalewa kuti ndiwe Juwau M'batizi. Winango ambalewa kuti ndiwe Eriya. Winangombo ambalewa kuti ndiwe mpolofeta wakale-kale omwe adafa wamuka pomwe.

²⁰Pamwepo iye adawabvundza kuti: “Kodi imwepombo mumbalewa kuti ndine yani?” Ndipo Pedru adatawira kuti: “Ndiwe Krixtu wa Mulungu.”

²¹Tsono iye adawacenjeza kuti aleke kuuza munthu na m'bodziyo ekha bzimwebzo.

²²Na tenepo iye adawauza pomwe kuti: “Mwana wa Munthu andzabonera kwene-kwene. Ndipo iye an'dzalambidwa na atsogoleri wa wanthu, na akulu-akulu wa azibaba wa ntsembe na apfundzisi wa ntemo. Na tenepo iye an'dzaphedwa. Tsono an'dzalamuka pomwe pa paimpfa zikadzapita ntsiku zitatu.

²³Ndipo iye adawauuza kuti: “Penu munthu an'funa kunditewera, cakuyamba mbaabzilambe yekha acitakula mtanda wace ntsiku zentse kuti anditewere bwino.

²⁴Ndipo munthu ali wentse omwe an'funa kupulumusa moyo wace, mbaatome kuutaya nakuti ule omwe an'taya moyo wace na thangwe rangu, iye adzaupulumusa pomwe.

²⁵Kodi munthu angakhale na phindu lanyi akawona bzinthu bzentse bza pa padziko la pantsi, iye akamala n'kubzipha ayai n'kubzikweteka ekha?

²⁶Nakuti munthu ali wentse omwe an'bva manyazi na ine na mafala yangu, ndipo Mwana wa Munthu adzamubverambo manyazi akadzabwera na mbiri yace na ya Baba na ya Anjo wakucena.

²⁷Dziwani kuti pana winango pamwepano iwo an'dzafa lini acidzasaya kuwona Umambo bwa Mulungu.

²⁸Pakupita ntsiku zisere pomwe Jezu adalewa mafalaya, iye adatenga Pedru na Juwau na Tiyago acikwira nawo m'phiri kuti akapembe.

²⁹Pomwe iye akhapembapo, nkhope yace idasandulika na bzakubvala bzace bzidacena ninga kupenya kwa Mulungu!

³⁰Ndipo panthawe imweyo adawoneka wanthu awiri acimbalewa-lewa naye: iwo akhali Mozeji na Eriya.

³¹Na tenepo iwo akhadayetima kwene-kwene acimbalewa bza mayendedwe ya Jezuyo yomwe yangadadzacitikira kuJeruzalema.

³²Ndipo Pedru na andzace akhadagona tulo. Tsono pomwe iwo adapenya, adawona kuyetima kwace na kwa andzace omwe akhanaye pabodziwo.

³³Pomwe iwo akhayenda, Pedru adauza Jezu kuti: “Mbuya, n'psabwino kuti tikhaliretu pompano! Mbatikonzde bzikumbi bzitatu: cibodzi canu, cinango ca Mozeji na cinango ca Eriya.” Tsono iye akhadziwa lini kuti ali kulewa ciani.

³⁴Panthawe akhalewa bzimwebzopo udabwera mtambo uciwagwanankhira. Pomwe iwo akhali munthambomo adabva mantha.

³⁵Ndipo munthambomo mudabveka fala liciti: “Uyu ni Mwanangu, omwe ndidasankhula! Mutetekereni.”

³⁶Pomwe falalo lidanyamala Jezu adasala yekha. Ndipo iwo adanyamala basi pantsiku zimwezo. Na tenepo iwo alibe kuuza munthu bzomwe adawonabzo.

³⁷Pomwe iwo adabuluka m'phirimo mangwana yandzace, nthithi wa wanthu azinji kwene-kwene udabwera kudzawona Jezu.

³⁸Ndipo munthu m'bodzi adakuwa panthithipo aciti: “Mbuya ndiri kukukumbirani kuti mundiwonerembo mwananguyu. Nakuti iye ni m'bodziyu yekha.

³⁹Ndipo iye ambagwa ciwanda, panthawe imweyo ambakuwa-kuwa cicimugwesera pantsi na kunjenjemera, acimbacoka maphobvu. Ndipo pakumalizira cicimutcola manungo.

⁴⁰Na tenepo ndikhadakumbira kale ateweri wanuwa kuti acithothe tsono alibe kucikwanisa.”

⁴¹Ndipo Jezu adalewa aciti: “Nandi dzindza la wanthu wakusaya kukhulupira na kusaya ndzerumwe! Kodi mun'funa kuti ndikhale namwe ndicikubonerereni mpaka lini? M'bwerese kuno mwanakoyo.”

⁴²Pomwe akhayenda naye mwanayo, ndipo ciwandaco cidamuthusa pantsi acimbanjenjemera. Tsono Jezu adacizula. Pamwepo mwanayo adalimba ndipo acimupereka kuna babaceyo.

⁴³Na tenepo wanthu wentse adadabwa na mphambvu za Mulungu. Nakuti wanthu wentse adadabwa na bzomwe akhacita Jezu. Na tenepo iye adauza ateweri wace kuti:

⁴⁴“Bvesesani bwino mafala yanguya: 'Mwana wa Munthu ankaperekedwa m'manja mwa wanthu.”'

⁴⁵Tsono iwo alibe kubva bwino mafalayo. Nakuti yakhali yakubisika kuna iwo asye kuyabvesesa. Na tenepo iwo adagopa kumubvundza.

⁴⁶Ndipo ateweriwo akhaganizana okha-okha kuti mbani nkulu pakati pawo.

⁴⁷Pomwe Jezu adadziwa ndzeru zawo, atenga mwana acimuimisa pana iyepo.

⁴⁸Ndipo iye adawauza kuti: “Munthu omwe an'tambira mwana ninga uyu mu dzina langu, iye an'tambirambo ine-pano. Ndipo ule omwe an'tambira ine ule, iye an'tambirambo ule omwe adandituma. Nakuti ule omwe an'bzicepsa pakati panupa, umweyo ndiye nkulu.”

⁴⁹Ndipo Juwau adatawirambo kuti: “Misiri, tawona munthu ali kuzula bziwanda mu dzina lanu. Tsono ife-pano tamuletsa thangwe iye ngwathu lini.

⁵⁰Ndipo Jezu adamutawira aciti: “Lekani kumuletsa, thangwe munthu omwe ambaticitira lini kuipa, omweyo ngwathu.”

⁵¹Pomwe idakwana nthawe yace Jezu kuti akwire kudzulu, iye adalonga ulendo kuti ayende kuJeruzalema.

⁵²Ndipo adatsogoza atumiki wace kuti akanyan'gane malo. Na tenepo iwo adafika m'mui wa Asamaliya.

⁵³Tsono wanthu wa m'mwemo alibe kumutambira thangwe iye akhandopita njira aciyenda kuJeruzalema.

⁵⁴Pomwe Juwau na Tiyago adawona bzimwebzire, adamubvundza Jezu kuti: “Mbuya, kodi munfuna kuti ticemerese moto wakudzulu kuti uwatenthe?

⁵⁵Tsono Jezu adaceuka aciwakalipira.