Luka 8:18-40

¹⁸Eꞌano'o eḡeꞌa ziꞌeteꞌe ḡoeꞌa faine zamare egoꞌi! Faifaine zamare igiꞌeteꞌe azaḡaꞌe, Badiꞌaꞌa edeḡa boro ziniꞌuma. U mene faine zamare igiꞌeteꞌe azaḡaꞌe, Badiꞌaꞌa zeꞌe tahiḡa edeḡa rae zamareꞌeteꞌe zuni mae vaḡiniꞌuma.

¹⁹Eꞌe enogano Iesu viꞌa ebu negoḡa duḡuruꞌa ani vaḡe onamiro, rehano vaze ḡuḡuvaḡa ꞌahine ani uhiḡa onamoga mene idararo.

²⁰Ebu vaze ꞌahoḡaniꞌa Iesu niro, raenaꞌa, “Ḡa viꞌu zu negoḡo duḡuruꞌa ḡiaꞌihi radu ne enona edau radiuꞌohe.”

²¹Ebu Iesuꞌa naenaeziro, raenaꞌa, “Badiꞌa ḡoere egadu haḡaiḡa haḡaeꞌeteꞌe azaḡaꞌe eḡe nanu zu eḡe nego.”

²²Mada ꞌahogano Iesuꞌa ane tahiꞌatahiꞌa teite ḡasio tiradu ze ziro, raenaꞌa, “Aro, duꞌura moneafa fare onamihi.” Ebu ze fare onamiro.

²³Ze fare onameꞌeteꞌe zamaḡano, Iesu ani baziro. Ebu zavara boroꞌa feuradu vuꞌa ḡasi kafere diuḡadu foꞌariro. Zeꞌe ariga runeo diuḡiro!

²⁴ꞌOugirotene, Iesu tahiꞌatahiꞌaꞌa ani evaniro, raenaꞌa, “Zuhiꞌa Boro, Zuhiꞌa Boro, eme izidi hunuhuneꞌohe!” Ebu Iesuꞌa evatadu zavara zu saꞌu riḡa ḡoreziro, raenaꞌa, “Sifu radadu roḡeranoꞌi!” Ani ꞌouge reirotene, zavara zu saꞌuꞌa hauḡiro zu duꞌuraꞌa roḡeraro.

²⁵Ebu Iesuꞌa ziro, raenaꞌa, “Za eḡe mazao mene fieꞌohe!” Rehano, zeḡe niduꞌa rihauꞌenaꞌa zu zaguzagauꞌenaꞌa, ḡadititiro. “Ahiꞌe iniu? Aniꞌa zavara zu saꞌu riḡa ḡorezitene, ḡoeꞌa egohuꞌohe!”

²⁶Eꞌe enogano, Iesu zu ane tahiꞌatahiꞌaꞌa Galilea duꞌuraḡa moneafa ruhau faradu Gerasa azaḡa habao hebetiro.

²⁷Iesu ani ḡasionoꞌo buarotene, eꞌe habaꞌano vine sauꞌa sauꞌaḡeta vazeḡa ꞌahoganiꞌa Iesu hidiro. Aniꞌe mada faḡa firina zu neḡano mene radiunu, rehano ꞌidu habaꞌano radiudo.

²⁸Vine sauꞌaniꞌa vaze ꞌadiꞌe mada ḡehaḡa ibitohaudoteꞌe uꞌano, haba eꞌe azaḡaniꞌa auri miniḡa riḡa hina evoꞌa zu odaḡa batune teadu taufe radiudo. Rehano aniꞌa mini eꞌe riꞌi ḡuzuhadu vine sauꞌaniꞌa tuḡune haba bohaꞌa onamido. Aniꞌa Iesu horonirotene, Iesuꞌa riḡa ḡoreniro, raenaꞌa, “Vine sauꞌa toraga, ani mazaonoꞌo buanoꞌi!” Ani Iesu zamao hiḡau bauradu ḡaniḡanaro, raenaꞌa, “Iesu, Ḡihiꞌahune Badiꞌaḡa Ubuga! Ḡaꞌe eḡe mazao nagini urateꞌohe? E umiꞌeꞌohe, aduga aḡo enoꞌi!”

³⁰Ebu Iesuꞌa ḡadiniro, raenaꞌa, “Ḡa niḡo iniu?” Ebu aniꞌa naenaeniro. “E niꞌe Legioni!”, mazaḡa vine sauꞌa ḡehaḡa vaze eꞌe ranao radiunu.

³¹Vine sauꞌa sauꞌaniꞌa Iesu uminiro, raenaꞌa, “Eme hoꞌone ḡonaga oꞌoꞌano ago tuḡufoꞌi!”

³²Eꞌe madaḡano aba ḡehaḡaꞌe haba maḡano ogaunu. Eꞌanoꞌo vine sauꞌa sauꞌaꞌa bare Iesu uminiro. “Eme aba eꞌe mazao diuḡoga tuḡufoꞌi!” Iesuꞌa naenaezinaꞌa, “Idaḡa, buꞌanadu onamoꞌi!”

³³Ebu vine sauꞌa sauꞌa ꞌai vaze eꞌe mazaonoꞌo buanadu aba ḡehaḡa mazao diuḡe ḡouriro. Aba ḡehaḡa ꞌai maḡa beꞌanoꞌo dure ovoadu duꞌurao hunuhune rudaro.

³⁴Aba taufeꞌeteꞌe azaḡaniꞌa naginiꞌa fureraroteꞌe horonadu, ferau uhiḡa neḡa zu habaꞌa habaꞌa onamiro. Ebu eꞌe hariḡa vazevaze mazao meꞌodiro.

³⁵Vaze ḡehaḡaꞌa naginiꞌa fureraroteꞌe ḡianoga veize Iesu vaḡe onamiro. Ze onamirotene, vine sauꞌaḡeta vazeḡa eꞌe dabua vidanadu zamarone manoḡano Iesu oda babaḡano ehoriroteꞌe horoniro. Eꞌanoꞌo zeꞌe rihau ḡouriro.

³⁶Ebu fureraroteꞌe haḡaiḡa niduꞌa horoniroteꞌe azaḡaniꞌa haba ꞌahoga ꞌahoganonoꞌo onairoteꞌe azaḡa mazao Iesuꞌa vine sauꞌaḡeta vaze eꞌe nougenouge ḡaboniroteꞌe meꞌodoziniro.

³⁷ꞌOugadu Gerasa habaꞌa azaḡa niduꞌaꞌe rihoꞌa mae ḡouriro. Ebu zeꞌe Iesuꞌa eꞌe habaꞌanonoꞌo vaḡinoga veize uminiro. Eꞌanoꞌo Iesuꞌe ḡasio tiradu bare duꞌura moneafa fare onamiro.

³⁸Vine sauꞌaonoꞌo manoriroteꞌe vazeḡaꞌe Iesu teite onamoga veize uminiro. Rehano Iesuꞌa ani tuḡuneꞌenaꞌa, niro.

³⁹“Mene. Ḡa bare neḡo onamadu Badiꞌaꞌa ḡae mazao haḡai manoḡa haḡateꞌe nabuḡo ihozoꞌi!” Eꞌanoꞌo ani bare onamadu ne niduꞌa ragaveꞌenaꞌa, Iesuꞌa ani mazao nagini haḡairoteꞌe haḡaiḡa meꞌodo ziniro.

⁴⁰Iesuꞌa faradu ruhau hebetirotene, vaze ḡehaḡaniꞌa hidadu mae ḡihiniro, mazaḡa zeꞌe mada faḡa guhiniro.