Luk 8:18-40

¹⁸“Miaŋgöra Anutugö keu mötzei, mi mönö urukönömŋine ala mötmöriba köl guliba malme. Kunŋan mötkutukutuŋambuk maljawi, Anutunöŋ mönö mi toroqem waŋgii qarimapmö, kunŋan mötkutukutuŋi qahö maljapmö, ‘Miambuk maljal,’ jizawi, Anutunöŋ mönö mötmötŋi moröŋi mi mewöyök qeköba waŋgitma.” Mewö.

¹⁹Jisösnöŋ mewö jiba maliga nam munŋan i ekingö kagetmö, ambazip kambu ketaŋan ölököba gwözöŋgeraŋgöra kösutŋe anbingö osiget.

²⁰Osiba kingetka kunŋan kewö jii mörök, “Göhö nam-mungan mönö yaigep kinda gi gekingö mötze.”

²¹Jii mörökmö, Jisösnöŋ kewö meleŋda jii mötket, “Ambazip ki Anutugö Buŋa keu möta tem köla köl gulimakzei, mieŋön mönö nöŋgö namni aka munurupni akze.” Mewö.

²²Wehön kunöŋ Jisösnöŋ gwarekurupŋi kewö jii mötket, “Mönö mosöta o aŋgö kutuba likepŋe aŋgotpin.” Mewö jiiga waŋgenöŋ mohotŋe öŋgöba o aŋgö qakŋe anget.

²³Anda opo seri möröreŋgögetka luhutnöŋ naŋgöiga angetka Jisösnöŋ gaun ahöyök. Ahöiga luhut raidimbom o aŋgönöŋ gila siri kunduriga waŋge uruŋe geyök. Geba numbuŋe qemamgö aiga ayuhubingö aket.

²⁴Ayuhubingö aka gwarekurupnan anda möndöba jiget, “Kembu Ketaŋamnini, mönö nini aŋgönöŋ ayuhubingö akzin.” Mewö jigetka imbiŋi möta luhut aka o aŋgögö siriŋi kewö jim qetal etkiiga ösumŋiran eriga nöŋ qeba ahöyök.

²⁵Mewö aiga jii mötket, “Eŋgö mötnaripŋini mi denike?” Mewö jiyökmö, yeŋön awöwöliba qem sömbuŋini möta jiget, “Yei, azi kia mönö denöwöŋan malja? Yaŋön mönö luhut aka köwet siri jim kutum etkiiga jitŋi tem köl waŋgizahot.” Mewö.

²⁶Jisösnöŋ gwarekurupŋi yembuk toroqeba opo seri möröreŋgögetka luhutnöŋ naŋgöi anda o aŋgö kutuba Galili prowins likepŋe Gerasa gölmenöŋ aŋgotket.

²⁷Miaŋgöreŋ aŋgota saknöŋ öŋgöi azi ömeŋambuk kun mi taonöhök kaba Jisös miwikŋaiyök. Azi mi qaksirinöŋ mala qamöt köteŋi esiba urorohoget ahögeraŋgöreŋ ahöm malök. Nalö köröpŋi opo maluku qahö löŋgöta miri kungö uruŋe qahö ahömalök.

²⁸Ömenöŋ nalö köröpŋi öröm ureim waŋgiiga azi gwötpukŋan börö takŋi qeba könaŋi tapepnöŋ (muŋgamuŋga) jöhöba galöm köla malgetmö, tapepŋi öröi tiŋgitqiŋgiriga ömenöŋ kuŋguiga gölme qararaŋkölkölŋe anda laŋ malök. Miaŋgöra Jisösnöŋ ömeŋi mi kewö jim kutum waŋgimamgöra ahök, “Öme bölöŋi, gi mönö kota azi ki mosöta anöŋ.” Mewö jimamgö aiga Jisös eka silata gölmenöŋ kösutŋe geba qet gigilahöba kewö qerök, “Aek Jisös, gi Anutu öŋgöŋgöŋaŋgö nahönŋi akzan. Gi mönö denöwö ak niŋgimamgöra ki kazan. Nöŋön ulet gihizal: Gi sihimbölö könöpŋambuk kude ak niŋginöŋ.”

³⁰Mewö jiiga kewö qesiyök, “Gi qetki niŋi?” Ömewöröme gwötpuk uruŋe geba malgeraŋgöra “Qetnini lijön jizin” jiget. Mi nanine keunöŋ Kerök kambu ketaŋi.

³¹Mewö jiba Jisös kewö ulet waŋgiget, “Gi neŋguataŋgöba öme löm dutŋi qahö miaŋgöreŋ gebingöra kude jim kutum neŋgiman.”

³²Kösutŋine kunduŋi marömŋe miaŋgöreŋ bau kambu ketaŋi kun gwözözak uruŋe kuluŋda malget. Miaŋgöra ömenöŋ kewö jiba ulet waŋgiget, “Gi ölöp jinöŋga nini bau mieŋgö uruŋine gebin.” Ulet waŋgigetka “Mönö anda geget.” Jiba jim kutum eŋgiyök.

³³Jim kutum eŋgiiga azi uruŋeyök kota anda bau uruŋine geget. Gegetka bau kambu yeŋön mönö luhuba nembönembönöŋ anda jororoŋgöba o aŋgönöŋ geba nemulahöba kömuget.

³⁴Mi asuhuiga bau galöm yeŋön mi eka taon aka miri morömorö miaŋgöreŋ ölöŋ unjurata anda keu buzupŋi mi jiget mötket.

³⁵Jiget möta ambazip sesegilgil yeŋön yuai asuhuyöhi, mi ekingöra kaget. Kaba Jisösgöreŋ kaŋgota azi uruŋeyök ömenöŋ kotkeri, yaŋön könaŋe tariga miwikŋaiget. Opo sileötaŋi törörök jöhöba uruŋi amöriiga imbi mötmötŋi pakpak asuhuiga eka awöwöliget.

³⁶Azi ömeŋambuk malöhaŋön denöwö ölöwahöhi, mi jeŋinan ekeraŋön jiget mötket.

³⁷Möta gwötpuk awöwöliba qem sömbuŋini mötket. Miaŋgöra Gerasa gölmegö ambazip kambu pakpak yeŋön Jisösnöŋ eŋgömosötmapköra ulet waŋgiget. Ulet waŋgigetka liliŋgöba anmamgö waŋgenöŋ öŋgömamgö ahök.

³⁸Öŋgömamgö aiga azi uruŋeyök ömenöŋ kotkeri, yaŋön kaba Jisösbuk mohotŋe anda malmamgöra qesiyök. Mewö qesiyökmö, Jisösnöŋ qetala melaim waŋgiba kewö jiyök,

³⁹“Gi mönö liliŋgöba mirige anda Anutunöŋ aŋgöletot ketaŋi ketaŋi ak gihiyöhi, miaŋgö kösohotŋi jinöŋga mötme.” Mewö jiiga anda Jisösnöŋ aŋgöletot ketaŋi ketaŋi ak waŋgiyöhi, miaŋgö keuŋi mi taon uruŋe liliköba miri dop jim sehiyök. Mewö.

⁴⁰Ambazip pakpak Jisösgö mambötketka liliŋgöba kaiga kambu köla söŋgaiba öröm waŋgiget.