Luk 8:18-40

¹⁸“Wal yumob garra jinggabat brabliwei ol dislot ting weya mi dalimbat yumob, dumaji if yumob garram det wed langa yumob laif, wal God garra meigim yumob sabi mowa. Bat if yumob irrim det wed, en yumob nomo duwit, wal God garra deigidawei det wed brom yumob.” Lagijat na Jisas bin tok.

¹⁹Brom deya det femili blanga Jisas bin kaman langa im. Bat dei nomo bin gedim rum blanga go langa im, dumaji bigmob pipul bin deya,

²⁰en sambodi bin dalim Jisas, “Yu mami en yu braja olabat deya atsaid, en olabat wandi luk yu.”

²¹Wal Jisas bin tok, “Ol detlot pipul hu lisin langa det wed blanga God en duwit, olabat na main mami en main braja olabat.”

²²Bambai na wandei Jisas bin dalim im wekinmen olabat, “Kaman na. Wi go najasaid langa dijan bigwan leik.” En deibin gowin langa bout blanga krosim det woda,

²³en hafwei Jisas bin go silip, en wen imbin stil silip, strongbala win bin kaman langa det woda, en imbin blowimbat det bout ebriwei, en ola woda bin stat gowin langa det bout, en detlot wekinmen bin bradin, dumaji deibin luk miselp langa trabul,

²⁴en deibin go en weikimap Jisas, en deibin tok, “Bos! Bos! Wi binij na! Wi garra dai!” Wal Jisas bin gidap, en imbin dalim det strongbala win en bigbala weib blanga stap, en streidawei dubala bin stap, en ebrijing bin jidan kwaitbala.

²⁵Afta na Jisas bin dalim detlot wekinmen, “Wotfo yumob nomo bilib langa mi?” Bat detlot wekinmen bin hatjamp en bradin, en deibin askim miselp, “Wotkain men dijan? Imbin dalim win en weib blanga stap, en dubala bin duwit langa im!”

²⁶Afta na wen Jisas en im wekinmen olabat bin krosim det bigwan woda, deibin kamat langa det kantri gulum Gerasa najasaid brom Gelali,

²⁷en wen Jisas bin godan brom det bout, wan men brom det taun bin midim im deya. Wal det men bin abum nogudbala spirit insaid langa im, en im nomo bin werrimbat klos brom longtaim, en im nomo bin jidanbat langa im kemp du. Imbin oldei jidanbat langa detlot keib weya deibin oldei pudumbat ola dedbala pipul.

²⁸Lodataim detlot pipul langa det taun bin trai en taiyimap det men langa im bingga en langa im fut garram tjein jis laiga prisana. Bat det nogudbala spirit bin oldei wek insaid langa im, en det men bin oldei breigim detlot tjein, en det nogudbala spirit bin oldei deigidawei im langa det bush kantri. Wal wen det men bin luk Jisas, imbin jingat adbala, en imbin buldan langa Jisas fut, en Jisas bin dalim det nogudbala spirit blanga gowei brom det men, en det men bin tok, “Jisas, ai sabi yu det san blanga det brabli haibala God. Wal wanim yu wandim brom mi? Yu pramis mi yu kaan ardim mi.”

³⁰Wal Jisas bin askim det men, “Wanim yu neim?” En det men bin tok, “Main neim Bigmob.” Lagijat na imbin tok, dumaji bigmob nogudbala spirit bin jidan insaid langa im,

³¹en detlot nogudbala spirit bin askimbat Jisas nomo blanga lokimap olabat langa det dipwan hol.

³²Wal bigmob bigibigi bin fidabat deya wansaid langa det hil, en detlot nogudbala spirit bin askimbat Jisas blanga larram olabat go langa detlot bigibigi, en imbin larram olabat go deya.

³³Imbin andimwei olabat brom det men, en deibin gowin insaid langa detlot bigibigi, en ol detlot bigibigi bin randan langa det klif, en deibin buldan langa det woda, en deibin ol draun.

³⁴Wal wen detlot men hubin lukaftumbat detlot bigibigi bin luk wanim bin hepin, deibin ol ranawei, en deibin go en dalimbat det nyus langa det taun en ebriweya langa det kantri,

³⁵en ebribodi bin go deya blanga luk wanim bin hepin, en wen deibin kamat langa Jisas, deibin luk det men weya bin oldei abum detlot nogudbala spirit insaid langa im. Det men bin jidanbat deya gudbalawei, en imbin werrimon klos, en imbin jinggabat raitwei. Wal wen detlot pipul bin luk det men, deibin ol bradin,

³⁶en detlot pipul hubin luk det ting bin hepin bin dalimbat detlot pipul hau detlot nogudbala spirit bin gowei brom det men en det men bin gudbala na.

³⁷Wal detlot pipul deya langa det kantri bin askim Jisas blanga gowei brom olabat kantri, dumaji olabat bin brabli bradin, en Jisas bin gowin langa det bout blanga gowei,

³⁸en det men bin askimbat im, “Ai gin kaman garram yu?”

³⁹Bat Jisas bin dalim im, “Nomo. Yu gobek langa ola femili blanga yu en dalim olabat wanim God bin dum blanga yu.” Lagijat na Jisas bin tok langa det men, en afta na imbin jandimwei im, en det men bin go ebriweya langa det taun, en imbin dalimbat ola pipul wanim Jisas bin dum blanga im.

⁴⁰Afta na wen Jisas bin krosim det bigwan woda, loda pipul bin weidabat blanga im deya, en deibin gudbinji blanga im.