LUCAS 8:18-40

¹⁸’Jadeꞌents ɨdøꞌøn øy xmadoꞌodɨt; pøn tpabøjktɨp jøts tmadogukɨwya̱ꞌa̱ndɨ øy øy, ja̱a̱kyikpudøkɨpts ja yikxondɨ jøts ja tja̱ꞌgyukɨdɨt. Pønts kaꞌ, ja̱a̱ktyimyikpøjkxɨdɨp jaꞌ ja wyijyꞌa̱jtɨndɨ midi ja ja̱a̱kjanadyaja̱ꞌwɨyɨdɨp jøts ja nɨsudsoꞌampy tkidyimyja̱ꞌgyukɨdɨt.

¹⁹Wɨnets ja Jesús yꞌuch yja̱ꞌttøø møøt ja tya̱a̱k ma̱ ja jam wyɨnaty, nɨkaꞌap ɨdøꞌøn ja tpa̱a̱ttɨ wɨngon kumɨ janch mayja̱a̱ꞌy jam wyɨnatyɨ.

²⁰Xjats ja Jesús yiktukmadøøy jøts ja yiknɨma̱a̱y: ―Ja mda̱a̱k møøt ja mꞌuchtɨ jaꞌ mmɨga̱jpxwa̱jnɨp, ɨxap ja tøjkwimptyɨ.

²¹Jøts ja tꞌadsøøy: ―Jaꞌ øts ɨdøꞌøn nda̱a̱gɨp, jaꞌ øts ɨdøꞌøn nꞌuchɨdɨp nmɨguꞌugɨdɨp, pøn tmadoodɨp ja Dios yꞌøgyajpxy yꞌøyꞌayuujk jøts ja jadeꞌen tpadundɨ pønɨ sa̱ nwa̱ꞌa̱ñ.

²²Wɨnets ja nay jaꞌabɨ xøøw tyøjkɨyɨɨꞌñ ba̱rkɨjøtpy møøt ja pyabøjkpɨtøjk, jøts ja tnɨma̱a̱y: ―Wan tja̱a̱ꞌmyɨndɨ jam jaduktama̱jñ. Jøts ja ñøjkxtøø,

²³jam ja wyɨnaty mejkyujkꞌa̱mdɨ ku ja Jesus myaꞌooꞌkna̱a̱. Jøts ja møk poj ja jam jotmøñ pya̱a̱jtɨdøø, yikxon ja nøø jam ba̱rkɨjotp yjanchtøjkyɨnɨ øy ja tyiknɨtɨgøøñɨt.

²⁴Jøts ja tyujxtøø ja Jesús jøts ja tnɨmaadyøø: ―¡Wɨndsøn! ¡Wɨndsøn! ¡Nøøjøøꞌkxwa̱a̱ꞌnɨndɨp! Wɨnets ja Jesús pyɨdɨꞌjky jøts ja møkꞌampy twɨnguga̱jpxɨyɨɨꞌñ ja møk poj ku ja nøø ja tyiktojmjɨꞌɨky adsøꞌjkɨbɨm; jøts ja poj jatyɨ yjanchꞌamøꞌjty, jadiꞌiñɨ ja myøøñ.

²⁵Jøts ja tnɨma̱a̱y ja pyabøjkpɨtøjk: ―¿Ma̱ døꞌøn ja mjanchja̱ꞌwɨndɨ xyiktunwa̱ꞌa̱ndɨ? Tø ja yjanchnɨchøꞌjkɨdyɨgøøñɨdɨ, ñɨgyuma̱a̱p ja tyimyja̱ꞌwɨdøø jøts ja xem ya̱m ñawya̱jnɨdøø: ―¿Ti pønɨmts ya̱ꞌa̱t jadeꞌen, pø mɨmadojɨpts ja poj yøꞌ, pø mɨmadojɨpts ja nøø yøꞌ ku yø tꞌaneꞌemy?

²⁶Jøtsnɨm ja yja̱ꞌttøø jam Gadarɨt etjotp midi ɨdøꞌøn ja jaduktama̱jñ ta̱mp Galileɨt et wɨngon.

²⁷Jøts ku ja Jesús jam wyɨna̱a̱jky, yøꞌøpyɨdsɨɨmy, jøts ja ñɨmejnøø tuꞌuk ja kuga̱jp pøn ja mɨkuꞌ wyɨnaty jekyɨp tø tyatøjknɨyɨ. Nɨwa̱ꞌa̱ts ɨxwa̱ꞌa̱ts ja wyɨdejtnɨ, kaꞌap ja tyøjkjotp yꞌuktsɨnaañɨ, jam ja chɨnaadya̱knɨ ma̱ ja ooꞌkpɨ ña̱xøkɨdɨ.

²⁸Jøts ku ja tꞌejxpa̱a̱jty ja Jesús jøts ja jatyɨ twɨnguxana̱a̱y, yɨdeꞌen ja tjantyimñøjmɨ møkta̱ꞌa̱ky: ―Jesús, Dios Uꞌnk tsa̱jpjøtpyɨt, ¿ti ø xanɨbøjkɨp? Tun mayꞌa̱jt kidi xjantyimyꞌayoꞌonduñ.

²⁹Jaꞌ ɨdøꞌøn ja jadeꞌen tyikwa̱mp ku ja Jesús ja mɨkuꞌ møkꞌampy tꞌaneꞌemy jøts ja jam pyɨdsøꞌømt ja ja̱a̱ꞌy yꞌa̱m yjotp. Ejtp ɨdøꞌøn ja mɨkuꞌ ja xyumɨmɨꞌadɨꞌɨchɨyɨ ku ja yjayiktagɨwɨɨñ yjayiktapakwɨɨñ pujx kadeen; jatyɨ ja ttapojtɨguixy ya̱m ja ja̱a̱ꞌy ja jadeꞌen tø yjaꞌuktajotkujkꞌa̱jtmɨyɨ jøts ja nɨma̱ kyanøjkxt, jøts ɨdøꞌøn ja mɨkuꞌ ja yikakwɨdityɨ o ma̱ jam aba̱k etjotp.

³⁰Jøts ja Jesús yɨdeꞌen tyiktɨɨy: ―¿Ti mxøøw? Jøts ja yꞌadsøøy: ―Legión ø nxøøw. Jaꞌagøjxp ja jadeꞌen ñaxyøømøꞌøyɨ kumɨ janch may mɨkuꞌ ja wyɨnaty tø tyatøkɨyɨ.

³¹Jaꞌaxɨ døꞌøn jadeꞌen køꞌøm wa̱ndɨp jøts ja tnɨmaadyøø ja Jesús jøts ja kaꞌap kyaxɨdɨt jap ma̱ mɨkuꞌ yꞌayoꞌomba̱a̱ttɨ.

³²Jamts wyɨnaty ja kuch yjøøꞌkxwɨdejtmɨdɨ jam kojpkøjxp ku ja mɨkuꞌ ñuuꞌkxa̱ktøø jøts ja ttatøkɨdɨt ja kuch; yikja̱jt ɨdøꞌøn ja Jesús ja jadeꞌen.

³³Xjats ja mɨkuꞌ tmajtstuttøø ja ja̱a̱ꞌy jøts ja kuch ja ttatøjkɨdøø, wɨnets ja jɨyujk nɨdukɨꞌɨyɨ yjanchepkuwoꞌongøjxtøø jøts ja nøøjøtpy ñaxkɨda̱køjxtøø, japts ja ojts ñøøjøøꞌkxkøxtɨ.

³⁴Jøts ja ja̱a̱ꞌy pøn wyɨnaty kuchꞌejxtɨp ku ja jadeꞌen tꞌejxtøø yja̱ttɨ kyubattɨ ja kyuch, jøts ja yjantyimchøꞌjkɨdøø, jøts ja kyaknøjkxtøø jam ma̱ jaty pøngapøn chøønɨ ka̱mjotp jøts nayɨdeꞌen jam ka̱jpjotp, jamts ja tukɨꞌɨyɨ ttamɨmadya̱køjxtøø.

³⁵Jøts ja ja̱a̱ꞌy ja tnɨdsoꞌongøjxtøø jøts ja tꞌejxwa̱ꞌa̱ndɨ pønɨ janch ɨdøꞌøn jadeꞌen. Jøts ku ja yja̱ꞌttøø jam ma̱ ja Jesús jam wyɨnaty, xjats ja tꞌejxpa̱ttøø ja ja̱a̱ꞌy pøn ja maamyɨkuꞌ wyɨnaty tø myajtstuꞌudyɨyɨ jøts ku ja jam chøønɨ wijy kejy, xøxy piky ja jam ma̱ ja Jesús wyɨnaty tyanɨ, jøts ja yjantyimchøꞌjkɨdøø.

³⁶Jøts ja ja̱a̱ꞌdyɨ pøn wyɨnaty køꞌøm tø tyimyꞌejxtɨ, jaꞌats ja tmadya̱ktøø sudsoꞌampy ja ja ja̱a̱ꞌy wyɨnaty ja maamyɨkuꞌ tø myajtstuꞌudyɨyɨ.

³⁷Jaꞌagøjxpts ja ja̱a̱ꞌy nɨꞌijtyɨ ñuuꞌkxa̱ktøø pøn jaty jam wyɨnaty tsɨnaadyɨp Gadara jøts ja Jesús jam pyɨdsøꞌømt etjotp, pø jantyimchøꞌjkɨdɨpxɨ døꞌøn jaꞌadɨ. Jadeꞌents ja Jesús ttatøjkɨyɨɨꞌñ ja bya̱rkɨ jøts ja chøꞌjñ.

³⁸Jøts ja ja̱a̱ꞌy pøn wyɨnaty tø myajtstuꞌudyɨ ja maamyɨkuꞌ, jaꞌats møkꞌampy nuuꞌkxa̱kma̱a̱ jøts ja yikmøødɨt jøts Jesús ja tmøøtnøjkxt, jøts ja ojts tꞌaneꞌemy jøts ku ja neꞌegɨ tya̱ꞌa̱nt, yɨdeꞌen ja tnɨma̱a̱y:

³⁹―Nøjkx mdøjkwɨndum, jamts xnɨga̱jpxt xnɨmadya̱ꞌa̱kt sa̱ Dios tø mꞌødyuñɨyɨ. Nøjkx ɨdøꞌøn ja ja̱a̱ꞌy jøts ja ttamɨmadya̱ktøjkɨyɨɨꞌñ amuum ja mayja̱a̱ꞌy sa̱ Jesús ja wyɨnaty tø yikmøkpikyɨyɨ yikꞌøyꞌatyɨyɨ.

⁴⁰Jøts ku ja Jesús wyɨmbejtna̱a̱ ñøjkxnɨma̱a̱ jam jaduktama̱jñ, pøkpa̱a̱t may ja̱a̱ꞌy ja jam yjanchja̱ꞌwɨyøø, pø tum awejxɨpxɨ ja ja̱a̱ꞌy ja wyɨnaty.