San Lucas 8:18-40

¹⁸Hajap'a k'ĩirjubat hajim hanʌm, jãga pãrau hũr nʌ. Har chi t'ãar honee hũrm k'õsi hũr nʌm k'ʌʌnag Hẽwandamau warag k'ĩirjug deeju, hich hiek k'apcha hamk'ĩir. Mamʌ har hũrmap'apai hũr nʌm k'ʌʌn k'ĩirjug heemʌn, cha mua jaau chirʌm deeu Hẽwandamau hich hiek sĩepiba k'echeu haujugui hajim hanʌm, hũrmap'a naawai.

¹⁹Mag nʌm hee hich Jesús hãd hich chaain dʌ̈i hi haig bëejierram haajem. Mamʌ hõor pöm wëjöm k'urau pöd hi sim haarcha dubba, daaugajãrpai naaichëjim hanaabá.

²⁰Magbaawai hõrau hirig, —Pʌ heeugpeen pʌ hãd dʌ̈i daaugajãr nʌm. Ham hiek pʌ dʌ̈i hoom k'õsi nʌm haajem hajierram hanʌm.

²¹Mamʌ magbaawai hichig mag jaauchëtarr k'ʌʌnag Jesuu magjim: —Mʌrʌgan mʌig Hẽwandam hiek hũrwia hag hipierraa nʌm k'ʌʌnta hĩchab mʌ heeugpeenjönaa mʌ hãdjö sĩsidʌmgui hajim hanʌm.

²²Maimua biek hãb Jesuu hich k'apeenag, “Dök'ĩrag wëttarrau” hawia, chadcha döjãrr paauk'abaadëjim haajem.

²³Maimua ya ham mag döjãrr k'odjörröm hee, hich Jesús k'ãibaadëjim hanʌm. Mag hi k'ãi jörrömta, p'ũhãd pöm bëewia p'ũasdau dapag baupa haadeewai sosook'amua japau hãwatbajujö haadëjim hanaabá.

²⁴Hamachdëu mag hoop'öbaadeewai hi k'ãi jörröm haar mawia, —¡Maestro, p'iidʌbaad! Ya maachin k'öogpamgui hajierram hanʌm. Magbaawai p'iidʌwia, p'ũ t'eeg t'ʌnʌmʌg meeurrau sĩunaa, hĩchab chi p'ũasagjã meeurrau sĩubaawai, tag p'ũjã wëba p'ũasdaujã baupa k'aba, warre sĩi döjã meuu jöisijim hanaabá.

²⁵Maimua jũrr hichdëu hamag, —Keena hajim hanʌm, ¿mʌg pãar mʌ dʌ̈i k'odjörrömjã nem hök'öta nʌ? Jãgan pãrau chan mʌ pãach dʌ̈i chitʌmjã k'augbata naab hajim hanʌm, jãgcha jãp'ierraag. Mag hamach dak'ĩir p'ũ dʌ̈i p'ũaspa warre t'umba hat'am hoobaawai jãp'ierrnaa dauderraa nʌmua hamach happai hök'arii, —Keena, ¿k'anim wounta mʌg p'ũugjã hiek'anaa p'ũasagjã hiek'aawai hi hipierraa haajẽma? hajierram hanʌm.

²⁶Mag wëtmamua k'odjörröo hawia Gerasa durr barjierram haajem, hich hag t'ʌrrdö heepai t'oom higar Galilea k'ĩirp'ee.

²⁷Mag Gerasa durr barimawia Jesús durrpabaadeewai hi k'ĩirp'ee woun hãb p'öbör heemua höbërchëjim haajem. Mag woun hich warrgarwe dösãt bënëu sĩpwia hich mag bar nʌrraajeejim hanaabá. Mag gaaimua nawe degmua mawi, tag degjã k'aba, hãba hujã hʌ̃rpai k'ãinaa, k'ajũa k'arraa hich mag sĩerrajim haajem.

²⁸Mag wounau Jesús hoo hat'aawai dëgölp wiiu ha hi bʌ̈k'ʌrr p'õbk'abaimawia chaigpamamua t'et hirig magjim hanʌm: —Jesús, Cha Hʌ̃gt'aa P'uu Nʌm Hiewaa, ¿k'ant'eeta pua mʌ mʌgbaichëma? Hoob mʌ chig ha chiram hajim hanʌm, chi mepeer garmua Jesuu hichig woun mor heemua höbërpi jaaubaawai. Mag chi mepeer hajap t'ierrpa sĩerr haawai hʌ̃iba baarjeejim hanaabá. Mag barbaadeewai parii cadenau jʌ̃naa grillos hanʌm heejã bʌ̈ k'õok'a sĩsiuk'amjã hi hat'eem k'aba haajeejim hanʌm. Sĩi warag caden t'ʌrrëupʌ̈iwia hõor chukag haar warp warrjeejim hanaabá, chi meperau.

³⁰Maimua Jesuu hirig, —¿Pʌ k'an ha t'ʌ̃ʌrjẽ? hajim hanʌm. Magbaa chi wounau, —Mʌʌn “Mepeen P'öbör” ha t'ʌ̃ʌrjemgui hajim hanʌm. Hirua mag sĩerran, bën pöm hich mor hee dubchë t'ʌnʌm wai nʌrraajerr haawaita mag sĩejim hanaabá.

³¹Magbaawai chi mepeen woun mor hee mag t'ʌnarrau Jesuug, —Hoob warre k'ĩmie durr chan maar pʌ̈i chiram.

³²Mag k'ãyau har k'ũsnaan p'at'au k'ö wënʌrrʌm heeta hidëu maar dubpibá hajierram hanʌm, hag dak'a k'ũsnaan k'apan t'ʌnarr haawai. Magbaawai Jesuu hamag hʌdʌraa k'ũsnaan heeta dubpijim hanaabá.

³³Magbaa chadcha woun mor hee mepeen pöm mag t'ʌnarr höbërdʌtk'awia jũrr k'ũsnaan hee naaimaawai, k'ũsnaanta parhooba k'ap'ig p'öbaadëwia hit'urmʌg hʌ̃rmua t'ʌrrdö pöm wëjöm hee dʌrbagk'a sĩi k'ẽu k'uurbʌ k'ëchjierram haajem.

³⁴Magbaa chi k'ũs t'ʌa narr k'ʌʌnau hamachdëu mag hoobaawai jãp'ierrwia p'öbörög k'ap'ig p'öbaadëjim hanʌm, hõrag jawaan. Mag wëtumua hĩchab p'öbör chaauraa di nʌnʌidʌm heem k'ʌʌnagjã jaaumajierram haajem.

³⁵Mag p'öbör hee jaaubaimaawai, chadcha haar hoon weetwai, chi woun mor hee bën pöm wai sĩerr wajap'a k'ajũa jũanaa, hag na magba haajerrjö, sĩi ya maach k'ĩir hich mʌg Jesús k'ĩirp'ee jup sim hooimajierram hanaabá. Hamachdëu mag hoobaimaawai jãp'ierraa hap'öbaadëjim hanʌm.

³⁶Magtarr chi hootarr k'ʌʌnau jũrr chi hoon bëe nʌm k'ʌʌnag jaau naajim hanʌm, jãga mag woun dösãtau mag wai nʌrraajerrta hʌ̈u Jesuu monaaupʌ̈ijĩ.

³⁷Magbaawai Gerasa perasöm k'ʌʌn pöm haig t'ʌnarr k'ʌʌnau jãp'ierr nʌmua Jesuug chawag mapi jaau naajim hanʌm, hamach hee sĩepiba. Mag chadcha, Jesús jap hee pabaadëjim haajem, deeu hamach berrag wëtaag.

³⁸Mamʌ mag ham wëtaagpam hee, chi woun mag dösãt bënëu baarjerrau Jesuug jëjëeu haajeejim hanaabá, hi dʌ̈i maag. Mamʌ Jesuu hi harrba warag hirig,

³⁹—Pʌch diigta petá, maimua t'umaam k'ʌʌnag jaaupet hajim hanʌm, jãga Hẽwandamau hʌ̈u pʌ heeg hoowi pʌ monaaubar. Hichig magbaawai chadcha p'öbör hee petawia hich mag jajawag majim haajem t'umaam k'ʌʌnag, jãga Jesuu hi dau haug k'augwia hich bën chugpaapʌ̈itarr.

⁴⁰Mag Jesús deeu hich k'apeen dʌ̈i jap hee pawia Galilea durr barimaawai hõor pöm sĩi hi nʌ k'odt'ʌnaajim haajem. Mag hi barbaimam hoobaawai t'umaam k'ʌʌnau hirig, “Hʌ̈u pʌ bëejim” hanaajim hanʌm.