Luka 24:30-49

³⁰Pawekare pameza kurya, Insa akitwala nkate, akishukuru, akimeya, akiwawanyira.

³¹Mpunde sinkulu, wanu ware maso awo akiwafunguka ngwê, wakimmanyira. Neye akilainika!

³²Wakambirana watupu: “Iye paakisowera nofwe munjira mure kuno akitifafanurira Mandiko, myoyo yetu ikitibiya shindo pakifuwa, sinovyo?”

³³Kwa mpunde noure wakilamuka, wakiludira Yerusalemu, wakiwasingana mawalii kumi na mmoja na wengine‑po wajumane pamoja.

³⁴Pawafikire, wo‑wawiri wakamba: “Ndi kweli Mwenye kafufuka! Iye kânlawirira Peduru!”

³⁵Ikisa ewo wakiwereza viwakunire munjira mure. Wakamba: “Insa timmanyira wakati wameyire nkate.”

³⁶Evi vinu‑vi pawakereza, Insa akiritula kati-kati yawo, akiwambira: “Salama iwe namwe!”

³⁷Fala ewo wasusuka, wakibaki wakushanga wawenye, wakidaniza kuwa nsoka.

³⁸Iye akiwambira: “Mbana mususuka? Sababuni kuwa na dana mmoyo mwenu?

³⁹Ninang'anizeni mmakono mwangu‑mu na mmaulu mwangu‑mu. Ndi nomi-nomini. Nipameni muniwona, kamana nsoka auna nyama wala makongolo, kamba vyamuniwona vyaniri nawo omi‑vi.”

⁴⁰Nakusowera javire, kawolotera mmakono na mmaulu.

⁴¹Ingawa awakikubali sana, fala iwejala radi na kutajabu! Basi Insa akiwadairi: “Epa mwanawo cakurya kimojawapo?”

⁴²Ewo wakimpa kipande kimoja ca inswi wakumanikiwa.

⁴³Insa akitwala, akitafuna mbere yawo.

⁴⁴Ikisa akiwambira: “Mida patíkiwa onse, nukwambirani kuwa piya vyaandikiwe kuhusu omi nTaureti na nvitabu vya minabii na nZaburi víjuzi vitimiziwe.”

⁴⁵Ikisa akiwafungula viswa awerere Mandiko Matakatifu,

⁴⁶na akiwambira: “Yandikiwa javi, Almasihi akijuzi atabike, na suku ya tatu afufuke kati ya wafwi,

⁴⁷na kwa zina rake itangaziwe kwa piya kabila, mwanzo wa Yerusalemu, habari yake kuhusu kutubiya ipate wanu waswamiiwe madambi awo.

⁴⁸Umwe muwa mashahidi wa eya mambo‑ya.

⁴⁹Visitoshe, omi mwanyewe nukuperekerani caalavire tamaa Baba. Fala rindirani Yerusalemu nopa, mpaka mupokerere uwezo usaka kukwisukirani kulawa mbinguni.”