Iluk 24:30-49

³⁰Keko beli, am kawtem wanin wanomin kesiliw ding dim bakate, Yesus e belet wanin be kuluko, Sunbin-Got elo “Weso! Seyo!”, dangeko, belet wanin be fakal fakal keleweko, aso ilo duyemse kale.

³¹Em duyemse ding dim bakate, aso im kiin akal, ibolow fukunin akal, silel angeko, elo dolon kuw atemsiliw kale. Atemiwi, Yesus em ka kel be ding dim bakate, e banim banim kelei, aso i elo ateminba kesiliw kale.

³²Kanese ding dim bakate, aso i bokolew bokolew keko, bokolomeliw: “Em aso nuso deiw teleko, aso nulo Sunbin-Got em fut tem em weng mongom be kilele bokoyem kembe ding dim bakate, aso nu em yange kembe weng be kilisomeluwi, aso num ibolow bi silel angeko, dolon keko, ibolow kakat ati ke kembuluw te!”, angsiliw kale.

³³Aso im angsiliw ding dim bakate, aso i iti ikalem abiw koleweko, Selusalem abiw mutuk fian kalo uneko, Yesus em guel kel gelewkabiliw kunum so, iso biliw kunum waneng bi so, alik alik ka kel makuw wensansiliw kunum waneng ilo yetebam unsiliw kale.

³⁴Yetebam uneko, aso im abiw ka talsiliw ding dim bakate, ka biliw kunum waneng i aso ilo bokoyemomeliw: “Feinka! Kamok Fian moko, finik so be te! Saimon akal elo atem kembe kasike!”, yangsiliw kale.

³⁵Yangiwi, aso ikal ilo bokoyemomeliw: “Aso nukati elo deiw kel atem kembuluw kate, aso nu elo abelew kuw keleweko, dolon kelinba kelew kembuluw te. Kate, Yesus em belet wanin fakal fakal keleweko, nulo duyemse ding dim kabalak e, aso nukati elo kal keleweko, dolon kelew kembuluw te.”, yangsiliw kale.

³⁶Im yangsiliw ding dim bakate, Yesus akati im mutuk ka kel moko, alik alik ilo bokoyemomele: “Ibolow menew so boliwka!”, yangse kale.

³⁷Yangei, i elo atemeko, yol angeko, finganin mak kuluko, ibolow fukunomeliw: “Ibo! Yakei! Sawkal mak telbe sako!”, angeko, olsiliw kale.

³⁸Oliwi, e ilo bokoyemomele: “Nimtew angom ete yu finganeko, ‘Fein!’, nanginba kebiliw a?

³⁹Yu teleko, nem yan o, teing o, kale atenemina! Atenemsomi, teleko, nem kal dim kalakati nauleko, kal keliwete: Ne sawkal ba kate, kal so kun so kunum nete te!”, yangse kale.

⁴⁰Yangeko, ilo akalem yan a teing a be kukuyemse kasike,

⁴¹i elo atemsomi, yol angeko, kakatsiliw kate, i elo kilele “Fein!”, danginba kesiliw kale. Keko kasike, e ilo bokoyemomele: “Wanin mak de teliw kano, ne yom kiin dim kel wano yo!”, yangse kale.

⁴²Yangei, i fein takam gis anung mak delew teliwi,

⁴³e kuluko, im kiin dim kel wanse kale.

⁴⁴Wansomelei, e iti weng mak bokoyemomele: “Nem yuso kakabisi ding dim kabalak e, ne Moses em weng so, Sunbin-Got em bontem dim bakamin kunum im weng iso, Sunbin-Got em kunum alik biim fut ayem tem bosiliw em weng beem mongom e yulo dolon kuw keyemeko, kukuyemomeli: ‘Kanele eisneng be nem dulum elo fein keloke te!’, yangsi te.”, yangse kale.

⁴⁵Yangeko, im ibolow silel keyemeko, Sunbin-Got em fut tem em weng beem mongom e dolon kuw keyemeko,

⁴⁶bokoyemomele: “Sunbin-Got em fut tem weng bokolomele: ‘I Mesaya elo aliwi, e kuaneko, alemsal kel ding dim kabalak e, e iti baba teineko, finik so keloke te.

⁴⁷Keloke kasike, kawin dim kaleem aneng aneng angom im kasel alik alik i Weng Kal Ken Ati be kilisomi, ibolow famdeliw kano, Sunbin-Got e im sili sili ibolow be sak misim kuw kulu koyemoke te. Kasike kame, yu emisik keko, Selusalem abiw mutuk fian em kasel ilo weng be bakayem unoliwka!

⁴⁸Alik yu kane kembe beem sang be kilele kiinwalako, atem kembiliw te.

⁴⁹Yu kilele kililoliwka! Aatim em ‘Kaneyemoki te!’, yangse weng be yom dulum elo fein keloke kate kame, yu uneko, abiw mutuk fian kawtem kel beem kaneloke ding fenem unoliwka! Kaneloke ding dim kabalak e, yu abiil tikin em auk so kitil so fein kulokoliw kasike.”, yangse kale.