Luka 24:30-49

³⁰Na ia ie bawa hatahata eai maedi se aiai, falawa ie abi, eo i aihelahui, eo i ihi, abo i mosei aridi eai.

³¹Isi matadi abo se lala, ia se italobai, ia matadi eai i tauyamui.

³²Taudi labui edi ribariba si ene, “Nuaboeada eai se alaalasi, ia dobila eai maeda ta ribariba wa, eo ia buka tabuna i hemasarahadi, e nige’e?”

³³Nei mahanana eai ne isi se torohai, se uio Ierusalema, saudoudoi‐esega se lobaidi se oigogo esega, eo adi sasaguyao hinage maediyao.

³⁴Si ene, “Mamohoi, Guiau i toroo i taumasaraha Simona arinai.”

³⁵Wau dobila eai wa wasana se heriheribadi, eo hinage areto ihina arinai ia se italobai.

³⁶Ribana sora ma ribaribadi, na Iesu i toro isi boeadi eai, i ribalau aridi eai, i ene, “Loni au abi.”

³⁷Na isi se matausi ariri, eo se tagugu, edi nuatu si ene earuyarua se ita.

³⁸Ia i ribalau aridi eai, i ene, “Omi saha au nuadubuei? Hari nuatu, hari nuatu, se saha nuamiu eai se saesae?

³⁹Nimagu eo aegu au itadi: eau mo ede ina, au abiitagu abo au ita; earua wa nige bulumana eo nige siadana, doha au ita ea abi ta.”

⁴⁰Ia ie riba ina doha ia nimana eo aena abo i heitadi.

⁴¹Isi sora nige se awamamohoi paana se kode ariri, eo se noonooei, ia i ribalau aridi eai i ene, “Ami aiai, e nige’e?”

⁴²Eama se ligaauriyao tupona se mosei ia arinai, eo amoamo hinage.

⁴³Ia ie abi, eo matadi eai i aiai.

⁴⁴Ia ie ribalau aridi eai i ene, “Teina riba ta ia ede lahinae wa ea heribamiuo, eau sora nige ea laugabaemiu, ea ’ne, ginauri gamagamagari enagu Mose ena laugagaeo bukana eai, eo peroveta, eo wana eai se uridi abo se hemamohoiedi.”

⁴⁵Edi nuatu abo i hemasarahadi, isi bena uriuri tabudi aniodi abo se nuatulobaidi.

⁴⁶I ribalau aridi eai, i ene, “Ina doha se uriyao, ina doha hinage bena Keriso i amamna, eo asubena hehaionana eai mate eai i torouio;

⁴⁷ia esana debana eai basileia gamagamagari boeadi eai, nuabui eo baaea ribagigirina abo se lauguguiaei, na Ierusalema eai se hetubu.

⁴⁸Omi teina ginauridi tauribaribaedi ede.

⁴⁹Na Tamagu ena ribahesunuma ea hetamariawa ta omi potamiu eai; Ierusalema eanuana eai au bawa i lau e gigibori ewa eai i laoma, abo se leawa.”